សម រង្ស៊ី៖ ផ្សាយ​តម្លៃ​ផែនទី​​ខ្មែរ​ទិញ​ពី​បារាំង ជា​ព័ត៌មាន​ធម្មតា

ការផ្សាយ ពីការទិញច្បាប់ចម្លង ផែនទីកម្ពុជា ពីវិទ្យាស្ថានជាតិ នៃព័ត៌មានភូមិសាស្ត្រ នៃប្រទេសបារាំង ក្នុង​តម្លៃ​១៦៨​ដុល្លារ​នោះ គ្រាន់​តែ​ជា​ព័ត៌មាន​ ផ្ដល់ជូនពលរដ្ឋខ្មែរប៉ុណ្ណោះ មិនមានបំណងអ្វីផ្សេង ដូចការលើកឡើង របស់​ទីស្ដីការ​គណៈ​រដ្ឋមន្ត្រី​ ឬក្រសួង​ការបរទេស​កម្ពុជា​នោះ​ឡើយ។ នេះជាការអះអាង របស់លោក​ សម រង្ស៊ី នៅថ្ងៃនេះ។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញ ថ្ងៃទី១៩ កក្កដា ២០១៥
  • កែប្រែចុងក្រោយ: July 19, 2015
  • ប្រធានបទ: ព្រំដែន
  • អត្ថបទ: មានបញ្ហា?
  • មតិ-យោបល់

«​ខ្ញុំ​ចង់​ផ្តល់ព័ត៌មាន ​ជូន​ប្រជាពលរដ្ឋ ថា​អ្វីដែល​យើង​កំពុងតែ​ត្រូវការ កំពុងតែ​ចង់បាន នៅ​ស្រុក​គេ ​ចំហរ​​ជា​សាធារណៈ​ អត់​មាន​ពាក់ព័ន្ធ​អី​សោះ» នេះជាការថ្លែងឡើង របស់ប្រធាន​គណបក្ស​សង្គ្រោះ​ជាតិ លោក សម រង្ស៊ី នៅក្នុងពិធីជួបជាមួយ​ តំណាង​កម្មករ-កម្មការិនី នៅក្នុង​ទីស្នាក់ការ​ សហជីព​សេរី​កម្មករ​ នៃ​ព្រះរាជា​ណា​ចក្រ​​កម្ពុជា កាលពី​ព្រឹកថ្ងៃទី​១៩ ខែកក្កដានេះ​ ។

ការលើកឡើង របស់មដឹកនាំគណបក្សប្រឆាំង ជាការឆ្លើយតប ទៅនឹងការចោទប្រកាន់ របស់អង្គភាព​ព័ត៌មាន និង​ប្រតិកម្ម​រហ័ស ​របស់​ទីស្តីការគណៈរដ្ឋមន្ត្រី រួមទាំង​រដ្ឋមន្ត្រីការបរទេស លោក ហោ ណាំហុង ផង ដែល​ថា​ការបង្ហោះ នៅលើទំព័រហ្វេសប៊ុកផ្លូវការ របស់លោក សម រង្ស៊ី ពីតម្លៃច្បាប់ចម្លងផែនទី ដែលគណបក្ស​សង្គ្រោះ​ជាតិ បានស្នើទិញពីវិទ្យាស្ថានជាតិ នៃព័ត៌មានភូមិសាស្ត្រ បារាំង ក្នុងតម្លៃ ១៦៨ដុល្លារនោះ ជា​ចេតនា​មាក់​ងាយ​​លើ​​ផែនទី​ប្រទេស​កម្ពុជា។

តែការចោទប្រកាន់នេះ ត្រូវបានលោក សម រង្ស៊ី បដិសេធ ដោយហៅ ការបង្ហោះរបស់លោកនោះ គឺជាព័ត៌មាន​សុទ្ធសាធ និងបាន​ឆ្លុះបញ្ចាំង ​ពី​តម្លាភាព​នៅ​ប្រទេសបារាំង ដែល​គេ​មាន​សិទ្ធិសេរីភាព ​ពេញលេញ សម្រាប់​ពលរដ្ឋរបស់គេ ដែលមានបំណងចង់ដឹង ពីឯកសារភូមិសាស្ត្រ ឬផែនទីតំបន់អ្វីមួយ។ ប្រធានគណបក្ស​សង្គ្រោះ​ជាតិ បាន​ថ្លែងថា៖ «​នេះ​តម្លាភាព ហើយ​ការទិញ​នេះ គឺ​ខ្ញុំ​ចង់​ជម្រាប​ព័ត៌មាន និង​ប្រជាពលរដ្ឋ​ខ្មែរ​ថា នៅ​​ស្រុក​​គេ​នៅ​បណ្ណាល័យ ហើយ​បណ្ណាល័យ​មានតែ​មួយ​ទេ បណ្ណាល័យ​ពិសេស ​ដែល​គេ​តម្កល់ទុក​ផែនទី ​យើង​​អាច​​ទៅ​រក​ឃើញ ហើយ​យើង​អាច​ទិញ​បាន ហើយ​នេះ​ជា​នីតិវិធី ​នៅ​ស្រុក​ប្រកាន់យក​លទ្ធិ​ប្រជាធិប​តេយ្យ គឺ​អ្នកណា​មាន​សិទ្ធិ​ ចង់ទៅ​មើល​ឯកសារ ហើយ​បើ​ចង់​ឲ្យ​គេ​ថតចម្លង គេ​អាច​ថតចម្លង​ចេញ​ទៀត គឺ​​អ្នក​ចង់​ទៅយក ទៅថត​ក៏បាន»។

សូមបញ្ជាក់ថា ទំព័រហ្វេសប៊ុក របស់លោក សម រង្ស៊ី បាន​បង្ហោះ កាលពី​ថ្ងៃទី​១៦ ខែកក្កដា កន្លងទៅនេះ ​ថា​ផែនទី​បារាំង មុន​ឆ្នាំ​១៩៥៣ ខ្នាត ១/១០០.០០០ បង្ហាញ​ពី​ព្រំដែន​កម្ពុជា​-​វៀតណាម ទាំង​២៦ ផ្ទាំង ដែល​ទាំង​អស់គ្នា​ចង់បាន​ នាពេលនេះ មាន​ដាក់លក់​នៅ​ប្រទេស​បារាំង ក្នុងតម្លៃ​ ១៥៣,៩១ អ៊ឺរ៉ូ ស្មើនឹង​១៦៨ ដុល្លារ​អាមេរិក ហើយ​គណបក្ស​សង្គ្រោះ​ជាតិ បាន​ទិញ​ផែនទី​ទាំង​២៦ ផ្ទាំង (​វិក្កយបត្រ​ភ្ជាប់​មក​ជាមួយនេះ​) យក​មក​បង្ហាញ​ប្រជាពលរដ្ឋ​ខ្មែរ​ ទូទាំងប្រទេស ។

ប្រធានក្រុមតំណាងរាស្ត្រ សម្លេងភាគតិច លោក សម រង្ស៊ី បាន​បញ្ជាក់ទៀតថា ច្បាប់ដើម​នៃ​ផែនទី​នេះ មាន​តែ​មួយច្បាប់​គត់ ដែល​តម្កល់ទុក​ នៅ​ប្រទេស​បារាំង។ អ្វីដែល​គេ​ដាក់លក់​នោះ គឺជា​ច្បាប់​ចម្លង​តាម​ប្រព័ន្ធ​អេឡិច​ត្រូនិក ដែល​ដា​ក់​បញ្ចូល​ក្នុង DVD ដោយហេតុថា មកដល់សម័យទំនើបនេះ គេ​ឈប់​ផ្តល់​ច្បាប់​ចម្លង ​ឲ្យ​នៅ​លើ​ក្រដាស​ទៀតហើយ​ ជាពិសេស នៅពេលដែលច្បាប់​ចម្លង​ក្នុង ​DVD ទេ ត្រូវបានធានា​ជា​ផ្លូវការ​ថា ដូច​ច្បាប់​ដើម​​បេះ​បិទ ទោះជា​ចម្លង​មួយ​លាន​ដង ក៏​រក្សា​លក្ខណៈ​ដើម​ ពេញលេញ​ដដែល​។​

ការបង្ហោះផ្សាយ របស់លោក សម រង្ស៊ី មិនបានបង្កការសប្បាយចិត្ត ទៅឲ្យរដ្ឋាភិបាល របស់លោកនាយក​រដ្ឋមន្ត្រី ហ៊ុន សែន ដែលកំពុងមានបញ្ហាចម្រូងចម្រាស ក្នុងបញ្ហាបោះបង្គោលព្រំដែន ជាមួយប្រទេស​វៀតណាម​នោះទេ។ សេចក្តីថ្លែងការណ៍ ចំនួនពីរទំព័រ របស់អ្នកនាំពាក្យ អង្គភាព​ព័ត៌មាន និង​ប្រតិកម្ម​រហ័ស ​របស់​ទីស្តីការ​គណៈរដ្ឋមន្រ្តី កាលពីរសៀល ថ្ងៃទី១៧ ខែកក្កដានេះ បានចាត់ទុកការលើកឡើង របស់​លោក សម រង្ស៊ី នៅ​ក្នុង​បណ្ដាញសង្គម ថាមានចេតនាអាក្រក់ ក្នុងការ​បន្ទាប​បន្ថោក បន្តុះបង្អាប់ ដល់​រដ្ឋាភិបាល​កម្ពុជា ក្នុង​ការ​ប្រើប្រាស់​ផែនទី​ខ្នាត ១/១០០.០០០ ជា​មួយប្រទេសជិកខាង។

សេចក្ដីថ្លែងការណ៍នោះ បានសរសេរទៀតថា៖ «តើតម្លៃអធិបតេយ្យជាតិកម្ពុជា ក្នុងទស្សនៈរបស់ឯកឧត្តម សម រង្ស៊ី និងគណបក្សសង្គ្រោះជាតិ មានត្រឹមតែ១៦៨ដុល្លារ អាមេរិកមែនឬ?»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...