សង្គ្រាមពាក្យសម្ដី ដែលបានធ្វើការ វាយប្រហាររិះគន់ ទំនងជានឹងបាត់ឥទ្ធិពលទៅវិញ បន្ទាប់ពីខ្លោងទ្វារចាស់ ត្រូវបាន​ឆេះសល់តែតួ និងអ្នករៀបចំកម្មវិធីដ៏ធំនេះ បានសម្រេចចិត្ត ធ្វើការផ្លាស់ប្ដូរ ដាក់ខ្លោងទ្វារ «អង្គរ​សង្ក្រាន្ត» ថ្មីមួយ មក​ជំនួសវិញ។ រហូតមកដល់ពេលនេះ ក្រុម​ជាង កំពុង​ញាប់ដៃ​ញាប់ជើង រុះរើខ្លោងទ្វារចាស់ និង​រៀបចំតម្លើង  តាម​គំនូស​ពង្រាង ​ខ្លោងទ្វារ​ថ្មី ដែល​ទើបនឹងគូរជាថ្មី។

ជាមួយនឹងផ្ទាំង​គំរូ​ប្លង់ នៃ​​ខ្លោងទ្វារ​ថ្មី ចងភ្ជាប់​នៅ​ជិត​ខ្លោងទ្វារ​ចាស់ ​សហភាពសហព័ន្ធយុវជនកម្ពុជា ដែលជាអ្នករៀបចំ​ព្រឹត្តិការណ៍ ​អង្គរ​សង្ក្រាន្តឆ្នាំ២០១៥ ដឹកនាំដោយលោក ហ៊ុន ម៉ានី កូនប្រុសលោក ហ៊ុន សែន​ បានបញ្ជាក់ថា ខ្លោងទ្វារ​លើកក្រោយនេះ មាន​លក្ខណៈ​ជា​ខ្មែរ​«ជាង​មុន»។ រីឯការរិះគន់នានា ថាជា«ក្លោងទ្វារចិន-យួន» ដែលធ្វើតាម​បណ្ដាញ​សង្គម ក៏ហាក់ដូចជា បានថមថយដែរ។ អ្នកប្រើប្រាស់បណ្ដាញសង្គមមួយចំនួន បែរជាត្រឡប់ មកសរសើរខ្លោងទ្វារ​ថ្មី​នេះ​វិញ ថា​អាច​​ទទួល​យកបាន។

អតីតមន្ត្រីជំនាញមួយរូប មកពីក្រសួងវប្បធម៌ និងវិចិត្រសិល្បៈកម្ពុជា លោក វ៉ា រឿន ដែលកំពុងរស់នៅ ក្នុងប្រទេស​បារាំង និងដែលធ្លាប់ផ្ដល់មតិ ទៅលើខ្លោងទ្វារចាស់នោះ បានសំដែងការសប្បាយចិត្ត ប្រាប់ទស្សនាវដ្ដី​មនោរម្យ.អាំងហ្វូ នៅពេលដែលលោកបានឃើញ ខ្លោងទ្វាក្រោយ ដោយលោកចាត់ទុកថា​ មានការបោះជំហានទៅរក រចនាបថ​ខ្មែរ​​ច្រើន​​ជាង​​មុន។ ប៉ុន្តែ​លោក នៅមិនទាន់យល់ស្របនៅឡើយថា ខ្លោងទ្វារនេះ បានបង្ហាញពីសភាពថ្កុំថ្កើន​រុងរឿង នៃ​ស្ថាបត្យកម្ម និងសិល្បៈខ្មែរ ដែលបានបុព្វបុរសបានបន្សល់ទុក ពីដើមរៀងមកនោះទេ។ ហើយកន្លែងខ្លះ នៃ​ខ្លោង​ទ្វារថ្មី ក៏នៅមិនចំជា​ស្ថាបត្យកម្ម​នៃ​ខ្លោង​ទ្វារ​នៅ​ឡើយ ដូចករណីជើងពានទប់សរសរ ដែលធ្វើនៅខាងក្នុងជាដើម។

យ៉ាងណាក៏ដោយ បុរសចំណាស់វ័យច្រើនជាង ៧០ឆ្នាំរូបនេះ​ បានបន្តផ្ដល់យោបល់ សម្រាប់កម្មវិធីលើកក្រោយ ឬ​សម្រាប់​ព្រឹត្តិការណ៍ណាផ្សេង ទៀតថា៖ «ស្ថាបត្យករ មានពេញស្រុក ហើយពួកគេ សុទ្ធតែទទួលបានការសិក្សាជំនាញ ខាង​ផ្នែក​ស្ថាបត្យកម្ម​បុរាណ និងពីសិល្បៈខ្មែរនេះ។ ហេតុអ្វី មិនផ្ដល់ឱកាសឲ្យពួកគេទាំងនោះ អាចបញ្ចេញ​ស្នារដៃ​បាន?»

បើទោះជាលោករស់នៅ ក្នុងប្រទេសបារាំង តែលោក វ៉ា រឿន បានថ្លែងដោយមោទនភាពថា លោកបានតាម​ដាន​ហេតុ​ការណ៍​នេះ តាំងពីដំបូងមក។ លោកពន្យល់ថា គេអាចផ្ដល់ឱកាសឲ្យស្ថាបត្យករទាំងនោះ តាមរយៈការប្រឡង​ប្រណាំង​ស្នាដៃ ឬអាចឲ្យនរណាមួយ ពីសហភាព ចូលទៅសុំយោបល់ ពីស្ថាបត្យករដែលមានបទពិសោធន៍ណាម្នាក់ ដើម្បីឲ្យ​ស្នាដៃ​មួយ​នេះ នៅពេល​សាង​សង់​ចេញមក មានតម្លៃជាសកល ឫតម្លៃនៃស្ថាបត្យកម្មខ្មែរមួយច្បាស់លាស់។

លោក បញ្ជាក់ថា៖ «ខ្ញុំឃើញ គេឲ្យបណ្ឌិតៗផ្នែកបុរាណវិទ្យា និងប្រវត្ដិសិល្បៈ មកធ្វើការបកស្រាយ ការពារទៅលើខ្លោង​ទ្វា​រចាស់។ នេះ ជាកំហុសមួយ។ ព្រោះបណ្ឌិតទាំងនោះ គាត់បានតែស្រាវជ្រាវ ដឹងថាក្បាច់នេះអញ្ចេះ ក្បាច់នោះអញ្ចុះ តែ​ពួកគាត់អត់ចេះ ធ្វើយ៉ាងម៉េចដើម្បីឲ្យសំណង់មួយនេះ ចេញរូបរាងមកទេ ឬធ្វើយ៉ាងណា ឲ្យមានរូបរាងសមសួន និង​មានអត្ថន័យនោះឡើយ។ ហើយជំនាញនេះ វាផ្ទុយស្រឡះ ពីពួកខាងស្ថាបត្យករ ដែលពួកគេសុទ្ធតែសិក្សាខាងនេះ។ ស្ថាបត្យករ​ខ្លះ​ មាន​ឯកទេស យកតែមែនទែន ខាងរចនាបថខ្មែរបុរាណនេះ។»៕