ការដាក់បេក្ខភាពលោក ហង្ស ពុទ្ធា មកជំនួសភ្លាមៗអ្នកស្រី ពុង ឈីវកេក ដែលបានប្រកាសលាឈប់ សម្រាប់​តំណែង ជាសមាជិក គ.ជ.ប ទី៩ថ្មីនោះ បានបង្កឲ្យមានភាពប្រទាំងប្រទើស ជាថ្មីទៀត រវាងគណបក្ស ជាប់ឆ្នោត​ទាំង​ពីរ។ បន្ទាប់​ពីលោក ហ៊ុន សែន នាយករដ្ឋមន្ត្រីបីទសវត្សន៍ របស់កម្ពុជា បានថ្លែងជាសាធារណៈ ទាក់ទងនឹង​សំណើរ សុំឲ្យ​ផ្លាស់ប្ដូរជាថ្មីម្ដងទៀត នូវបេក្ខភាពលោក ហង្ស ពុទ្ធា របស់លោក សម រង្ស៊ី នោះ មន្ត្រីគណបក្សសង្គ្រោះជាតិមួយរូប ក៏បានថ្លែងអះអាងដែរថា លោក ហង្ស ពុទ្ធា នាយកអង្គការឃ្លាំមើលការបោះឆ្នោតនិកហ្វិច (Nicfec) មានបុគ្គលិក​លក្ខណៈ ប្រកបដោយភាពមន្ទិល។

លោក រស់ សួរ មន្ត្រីច្បាប់របស់គណបក្សសង្គ្រោះជាតិ បានរិះគន់លោក ហង្ស ពុទ្ធា ខ្លាំងៗថា គិតប្រយោជន៍ខ្លួន ច្រើន​ជាងប្រយោជន៍រួម ឬជាតិ។ មន្ត្រីគណបក្សប្រឆាំង បានពន្យល់ថា កន្លងមក មានក្រុមអង្គការសង្គមស៊ីវិល ប្រមាណ​ជាង​៦០ ធ្លាប់បានប្រកាស ជាសាធារណៈថា សង្គមស៊ីវិលនឹង ចារឈ្មោះតំណាងរាស្រ្តណា ដែលបានចូលរួមគាំទ្រ និង​បោះឆ្នោតឲ្យច្បាប់ទាំងពីរ ទាក់ទងនឹងគ.ជ.ប លេចចេញជារូបរាង។ ហើយកាលនោះ លោក ហង្ស ពុទ្ធា ក៏ជាសមាជិក​ម្នាក់ នៃក្រុមអង្គការសង្គមស៊ីវិលនោះដែរ ដែលបានប្រកាសជំហរ យ៉ាងមុតមាំថា សង្គមស៊ីវិល នឹងមិនអាចទទួលយក​ច្បាប់ទាំងពីរនោះ បានឡើយ។

លោកបានរៀបរាប់បន្តថា កាលពីថ្ងៃទី៩ ខែមីនាកន្លងមកនេះ ក្នុងសិក្ខាសាលា ពិគ្រោះយោបល់ថ្នាក់ជាតិមួយ ជុំវិញ​បញ្ហាច្បាប់ទាំងពីរ របស់ គ.ជ.ប នៅវិមានរដ្ឋសភា ក៏គេមិនឃើញវត្តមាន របស់លោក ហង្ស ពុទ្ធា ចូលរួមតាំងជាសំនួរ ចោទជាបញ្ហា ឬក៏ការគាំទ្រអ្វីនោះដែរ។

មិនតែប៉ុណ្ណោះ កាលពីថ្ងៃទី១៧ ខែមីនា លោក ហង្ស ពុទ្ធា ដែលជាសមាជិកម្នាក់ នៃក្រុមសម្ព័ន្ធកំណែទម្រង់ ការបោះ​ឆ្នោតសម្ព័ន្ធអ៊ឺរ៉ា (ERA) បានធ្វើសេចក្តីថ្លែងការណ៍រួមមួយ ជាសាធារណៈ ដោយរិះគន់ខ្លាំងៗ ទៅលើកិច្ចព្រមព្រៀង នៃកំណែទម្រង់ការបោះឆ្នោត។ លោក រស់ សួរ បានចាត់ទុកការធ្វើបែបនេះ ព្រោះតែក្រុមទាំងនោះ ចង់បានចំណេញ​ពីប្រព័ន្ធផ្សព្វផ្សាយ និងដើម្បីខ្លួនអាចទទួលជំនួយ ពីបរទេសមកបន្ថែមប៉ុណ្ណោះ។ លោកបានបរិាហារថា ទង្វើទាំងនេះ មិនមែនដើម្បីស្វែងរកប្រយោជន៍ ចំណេញសម្រាប់ប្រទេសជាតិទេ តែជាការស្វែងរកចំណេញ សម្រាប់តែក្រពះ​ខ្លួនឯង​ប៉ុណ្ណោះ ឬគេហៅម្យ៉ាងទៀតថា ជាក្រុម «ឆ្អិនក្បាលស៊ីក្បាល ឆ្អិនកន្ទុយស៊ីកន្ទុយ»។

លោក រស់ សួរ បានហៅសកម្មភាព របស់លោក ហង្ស ពុទ្ធា ថាជា«ការចូលរួមធ្វើ ជាសមាជិក គ.ជ.ប ដើម្បី​កិត្តិយស​ខ្លួនឯង»។

កាលពីព្រឹកថ្ងៃទី០១ ខែមេសា លោក ហ៊ុន សែន បានស្រង់សម្ដីលោក សម រង្ស៊ី មកបញ្ជាក់ថា ក្រុមប្រឆាំងបាន​ប្តូរ​ចិត្ត​ លែង​ចង់បាន​លោក ហង្ស ពុទ្ធា មកធ្វើជា​បេក្ខជន​សមាជិក​ទី ៩ នៃ​គណៈកម្មាធិការ​ជាតិ​រៀបចំ​ ការបោះឆ្នោតហើយ។ បើតាម​លោក ហ៊ុន សែន បានឲ្យដឹងថា មូលហេតុ​ដែល​លោក សម រង្ស៊ី ចង់​ប្តូរ​ចិត្ត​នោះ ដោយសារ​លោក ហង្ស ពុទ្ធា មាន​ជំងឺ​ទឹកនោមផ្អែម។ ប៉ុន្តែបន្ទាប់ពីបានអះអាង នូវសម្ដីរបស់មេដឹកនាំ គណបក្សសង្គ្រោះជាតិរួច លោក ហ៊ុន សែន ក៏បានឆ្លើយដោយខ្លួនឯងដែរថា៖ «ខ្ញុំ​សូម​អធ្យាស្រ័យ​ ដែល​មិនអាច​ទទួលយក ​នូវ​សំណើ​ឯកឧត្តម​បាន»។ លោក​នាយក​រដ្ឋមន្ត្រី បានប្រកាសជំហរ យ៉ាងមុតមាំថា ក្រៅពីលោក ហង្ស ពុទ្ធា លោកនឹងមិនទទួល យកបុគ្កលណា មកពី​សង្គម​ស៊ីវិល ធ្វើជាសមាជិកទី៩ នៃ គ.ជ.ប នោះទេ។

ទស្សនាវដ្តីមនោរម្យ.អាំងហ្វូព្យាយាមទាក់ទង សុំប្រតិកម្មពីលោក ហង្ស ពុទ្ធា ចំពោះការថ្លែងបរិហា របស់មន្ត្រី​គណបក្ស​សង្គ្រោះជាតិ ខាងលើ តែត្រូវបានលោកបដិសេធ ដោយគ្រាន់តែបញ្ជាក់ថា ជាប់រវល់ រួចបានបិទទូរស័ព្ទ ភ្ជាប់​ទំនាក់​ទំនង​លែងបាន។

តែក្នុងកិច្ចសម្ភាស ជាមួយវិទ្យុក្នុងស្រុកមួយ លោក ហង្ស ពុទ្ធា បានបង្ហាញជំហររបស់ខ្លួន ក្រោយក្លាយជា​សមាជិក​របស់ គ.ជ.ប ថា លោកសន្យានឹងខិតខំប្រឹងប្រែង ធ្វើការងារបោះឆ្នោត ដើម្បីកែទម្រង់ការបោះឆ្នោតនៅកម្ពុជា ឲ្យមាន​លក្ខណៈសេរី និងយុត្តិធម៌។ លោកបានបញ្ជាក់យ៉ាងដូច្នេះថា៖ «ប្រសិនបើខ្ញុំមានឱកាស ធ្វើការនៅក្នុង​គណៈកម្មាធិការ​ជាតិ រៀបចំការបោះឆ្នោត ខ្ញុំគិតថា ខ្ញុំជាអ្នករួមចំណែកមួយយ៉ាងសំខាន់ ក្នុងការចូលរួម ឲ្យដំណើរ​ការបោះឆ្នោត​នៅ​កម្ពុជា ឲ្យមានលក្ខណៈល្អប្រសើរ»៕