បន្ទាប់ពីចាញ់ឆ្នោតគណបក្សឆ្វេងនិយម ទាំងពេលជ្រើសរើសប្រធានាធិបតី និងតំណាងរាស្រ្តកន្លងមក គណបក្សស្ដាំនិយម​បារាំង​ថ្ងៃនេះ កំពុងឆ្លងកាត់នូវសង្គ្រាមផ្ទៃក្នុងមួយ ដែលអាចនឹងឈានទៅរកការបែកបាក់ដ៏ធំមួយ ក្នុងបក្សនយោបាយនេះ ហើយថែម​ទាំងបាន​នាំមក នូវរូបភាពដ៏អាក្រក់ ដល់ពិភពអ្នកនយោបាយ នៃប្រទេសប្រជាធិបតេយ្យមួយនេះទៀតផង។

 
លោក ហ្សង់ ហ្វ្រង់ស៊័រ កូប៉េ និងលោក ហ្វ្រង់ស៊័រ ហ្វីយ៉ុង។ រូបថត របស់គណបក្ស UMP។

លោកហ្រ្វង់ស៊័រ ហ្វីយ៉ុង (François Fillon) អតីតនាយករដ្ឋមន្ត្រី សម័យប្រធានាធិបតី នីកូឡា ស្សាកូហ្សី (Nicolas Sarkozy) បាន​ទាមទារកាលពីល្ងាចថ្ងៃពុធទី២១វិច្ឆិកា អោយគេរាប់បញ្ចូលនូវសម្លេងឆ្នោត នៃមណ្ឌលចំនួន៣ ដែលសមាជិកបាន​បោះឆ្នោត​ផ្ដល់​ការទុកចិត្ត ទៅអោយបេក្ខជន ប្រធានបក្ស កាលពីថ្ងៃអាទិត្យទី ១៨វិច្ឆិកា កន្លងទៅ។ មណ្ឌលទាំងបីដែលស្ថិតនៅ ទឹកដី​បារាំង​ឯ​នាយសមុទ្រ ត្រូវបានលោក ហ្វ្រង់ស៊័រ ហ្វីយ៉ុង និងក្រុមរបស់លោក លើកឡើងថា ត្រូវគេបំភ្លេចមិនបានរាប់បញ្ចូល ដែលជាហេតុ​ធ្វើអោយ លោកបានចាញ់ឆ្នោត ទល់នឹងគូរប្រជែងរបស់លោក គឺលោកហ្សង់ ហ្វ្រង់ស៊័រ កូប៉េ (Jean-François Copé) ក្នុងការបោះ​ឆ្នោត​រើសប្រធានបក្ស សម្ព័ន្ធចលនាប្រជាជន (UMP) នោះ។

ប៉ុន្ដែអ្វីដែលលោក ហ្វ្រង់ស៊័រ ហ្វីយ៉ុង បានតវ៉ានៅពេលនេះ ហាក់ដូចជា«យឺតពេល»ទៅហើយ សម្រាប់ក្រុមអ្នកស្ថិតនឹងលោក ហ្សង់ ហ្វ្រង់ស៊័រ កូប៉េ ដោយហេតុថា លោក​ ហ្វីយ៉ុង បានទទួលស្គាល់ពីលទ្ធផលនៃការបោះឆ្នោតនេះ ដែលប្រកាសកាលពីយប់​ថ្ងៃច័ន្ទទី១៩វិច្ឆិកា ដោយគណកម្មាធិការរៀបចំ និងត្រួតពិនិត្យ នៃយុទ្ធនាការបោះឆ្នោត ហៅកាត់ថា (Cocoe)។

នៅក្នុងការទាមទារ អោយរាប់បញ្ចូលនូវសម្លេងឆ្នោតនេះ លោកហ្វីយ៉ុង មិនបានគិតថានឹងឈានទៅ ទាញយកតំណែងជាប្រធាន​បក្ស​ត្រឡប់មកវិញនោះទេ តែជា«គោលជំហរនយោបាយ» ដែលបក្សនយោបាយបារាំងធំជាងគេនេះ គួរតែប្រកាន់ខ្ជាប់។ នេះជា​ប្រកាសអោយដឹង នៅតាមកញ្ចក់ទូរទស្សន៍ របស់លោកហ្វីយ៉ុង កាលពីយប់ថ្ងៃពុធដដែល។លោកបាននិយាយថា ស្នើសុំអោយ លោកអាឡាំង ហ្សីប៉េ (Alain Juppé) អតីតប្រធានស្ថាបនិករបស់បក្ស (អតីតរដ្ឋមន្ត្រីការបរទេស និងសព្វថ្ងៃជាចៅហ្វាយ​ទីក្រុង​ប៊កដូ) មកធ្វើជាប្រធានបក្ស និងរៀបចំគណកម្មាធិការនាយករបស់បក្ស ជាលក្ខណៈបណ្ដោះអាសន្នសិន។

អ្នកជិតស្និតនឹងលោកហ្វីយ៉ុង បានបង្ហើបអោយដឹងថា «លោកហ្វ្រង់ស៊័រ ហ្វីយ៉ុង បានសារភាពពីបានត្រិះរិះគិតយ៉ាងច្រើន មុននឹង​ទម្លាយរឿងមណ្ឌលបោះឆ្នោតទាំងបីនេះចេញមក ដោយលោកដឹងជាមុនហើយថា នឹងមានបញ្ហាដ៏ធំមួយ។ ប៉ុន្ដែតើអោយយើង យល់ព្រមទទួលស្គាល់ ការផាត់ចេញទុកដោយឡែក នូវសម្លេងឆ្នោតបោះដោយសមាជិកគណបក្ស​ យ៉ាងដូចម្ដេច?»

លោកហ្វីយ៉ុង មិនទុកចិត្ត

លោកអាឡាំង ហ្សីប៉េ បាននិយាយនៅល្ងាចថ្ងៃពុធនោះថា «មានការអំពាវនាវអោយខ្ញុំ រៀបចំជាអាជ្ញាកណ្ដាលមួយឡើង។ ខ្ញុំ​ត្រៀម​ខ្លួនរួចហើយ ក្នុងលក្ខខ័ណ្ឌមានការយល់ព្រម ពីភាគីទាំងសងខាង។» រីឯលោកស្រីអតីតរដ្ឋមន្រ្តីការពារជាតិបារាំង មីឆែល អាលីយ៉ូ ម៉ារី (Michèle Alliot-Marie) ក៏ថាត្រៀមខ្លួន ដើម្បីចូលរួមក្នុងការត្រឡប់មករក នូវភាពស្ងប់ស្ងាត់ឡើងវិញដែរ ដោយលោកស្រី​មិន​ទាមទារតំណែង ឬតួនាទីអ្វីទាំងអស់។

ចំណែកលោក ហ្សង់ ហ្វ្រង់ស៊័រ កូប៉េ វិញ បានសម្ដែងអោយដឹង ពីភាពមិនអាចទទួលយកបាន នូវការទាមទារទាំងនេះ ហើយបាន​ស្នើសុំអោយ លោកហ្វីយ៉ុង ដាក់ពាក្យតវ៉ា នៅចំពោះគណកម្មាធិការឧទ្ទរណ៍របស់គណបក្សជាមុនសិន។ តែគណកម្មាធិការ​ឧទ្ទរណ៍នេះ ត្រូវក្រុមអ្នកស្និតនឹងលោកហ្វីយ៉ុង ចោទថាជាអ្នកដែលផ្អៀងទៅលោក កូប៉េ។ ក្នុងបទសម្ភាសតាមកញ្ចក់ទូរទស្សន៍ លោក​ហ្វីយ៉ុង ក៏បានសម្ដែងនូវភាពមិនទុកចិត្ត ដោយបានបញ្ជាក់ថា «បើខ្ញុំដាក់ពាក្យឧទ្ទរណ៍ គឺខ្ញុំនឹងធ្វើនៅមុខតុលាការ»។ លោក​បាន​បរិហាថា «គណបក្សមិនអាចរស់នៅ ជាមួយនឹងភាពបោកបញ្ឆោតយ៉ាងដូច្នេះទេ»។

ប៉ុន្ដែនៅព្រឹកថ្ងៃព្រហស្បត្តិ៍ទី២២វិច្ឆិកានេះ លោកហ្សង់ ហ្វ្រង់ស៊័រ កូប៉េ បានប្រកាសថាលោកនឹងដាក់ពាក្យតវ៉ាដោយខ្លួនលោក ទៅគណកម្មាធិការឧទ្ទរណ៍របស់គណបក្ស ហើយបានស្នើសុំអោយគណកម្មាធិការនេះ ស្ថិតនៅកណ្ដាលមិនលម្អៀង និងធ្វើការ​ប្រកបដោយតម្លាភាព។ មកទល់នឹងម៉ោងនេះ គេនៅមិនទាន់ដឹង ពីជំហររបស់ក្រុមលោក ហ្វ្រង់ស៊័រ ហ្វីយ៉ុង នៅឡើយទេ។

តើគណបក្សនយោបាយ របស់អតីតប្រធានាធិបតី នីកូឡា ស្សាកូហ្សី នឹងត្រូវផ្ទុះបែកឬយ៉ាងណា? តើនរណាម្នាក់ដែលនឹងអាច ជួយស្រោចស្រង់គណបក្សនេះបាន? សូមតាមដានជាបន្ដ។

--------------------------------------------------------
ដោយ សេក មនោរកុមារ - ប៉ារីស​ ថ្ងៃទី២២ ខែវិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ