ដោយមានអ្នកចូលរួម ប្រមាណជិត៥០០នាក់ ពីតំណាងគណបក្សនយោបាយទាំងពីរ ពីអង្គការសង្គមស៊ីវិល បណ្តា​ស្ថាប័ន និងក្រសួងរដ្ឋមួយចំនួន និងការចូលរួមរបស់មហាជនផថនោះ អង្គសិក្ខាសាលាពិគ្រោះយោបល់ ពីសេចក្ដី​ព្រាង សេចក្តីស្នើច្បាប់ ស្តីពីការបោះឆ្នោតជ្រើសតាំង តំណាងរាស្រ្ត បានផ្ដើមដំណើរការរបស់ខ្លួនហើយ កាលពី​ម៉ោង​ជិត៩ នាព្រឹកថ្ងៃចន្ទ ទី៩ ខែមីនានេះ នៅក្នុងវិមានរដ្ឋសភា។ អ្នកចូលរួមទាំងអស់ ចាំបាច់ត្រូវបានចុះឈ្មោះជាមុន ដើម្បី​បានចូលរួម និងមានឱកាសត្រឹមតែ៣នាទីម្នាក់ ដើម្បីបញ្ចេញនូវគំនិតយោបល់ រួមទាំងការចោទសួរនានា។

សិក្ខាសាលាពិគ្រោះយោបល់ លើសេចក្ដីព្រាង សេចក្តីស្នើច្បាប់ ស្តីពីការបោះឆ្នោតជ្រើសតាំង តំណាងរាស្រ្ត ជា​សមិទ្ធិ​ផលរួមគ្នាមួយ ចុះហត្ថលេខាកាលពីថ្ងៃទី៦ ខែមិនា ឆ្នាំ២០១៥ រវាងគណបក្សប្រជាជនកម្ពុជា និងគណបក្ស​សង្គ្រោះ​ជាតិ ដែលបានបង្ខំសង្រួមចិត្តថ្លើម លើខ្លឹមសារ នៃសេចក្ដីព្រាង សេចក្តីស្នើច្បាប់បោះឆ្នោតថ្មី ដ៏ចម្រូង​ចម្រាស់​នេះ។ សេចក្ដីព្រាង សេចក្តីស្នើច្បាប់ថ្មីនេះ មាន១២ជំពូក និង១៧១ មាត្រា និងត្រូវបានគណបក្សទាំងពីរចំណាយពេល ជិត​បួន​ខែ ដើម្បីធ្វើការពិភាក្សា។

ឯច្បាប់ស្តីពីការប្រព្រឹត្តទៅ នៃគណៈកម្មាធិការជាតិ រៀបចំការបោះឆ្នោត(គ.ជ.ប) មាន ៧ជំពូក ស្មើនឹង៦៦មាត្រា ក៏ត្រូវ​បានបង្ហាញខ្លួនជាលើកទីមួយដែរ បន្ទាប់ពីបានបញ្ចប់ ក្រោមការឯកភាពគ្នា នៃគណបក្សទាំងពីរនាពេលកន្លងមក។ តាមច្បាប់នេះ ប្រធាន គ.ជ.ប ថ្មី មានឋានៈ និងបុព្វសិទ្ធិ ស្មើនឹងឧបនាយករដ្ឋមន្រ្តី។ ឯអនុប្រធានក៏មានឋានៈ និង​បុព្វ​សិទ្ធិ​ស្មើនឹងទេសរដ្ឋមន្រ្តីដែរ ខណៈសមាជិក គ.ជ.ប វិញ មានឋានៈនឹងបុព្វសិទ្ធិស្មើនឹងរដ្ឋមន្រ្តី។ នេះបើតាមការអាន របស់​ក្រុមការងារគណបក្សសង្រ្គោះជាតិ លោក យ៉ែម បុញ្ញឫទ្ធិ លើសេចក្តីព្រាង និងសេចក្តីស្នើច្បាប់នោះ។

លោក យ៉ែម បុញ្ញឫទ្ធិ បានអានបញ្ជាក់បន្ថែមថា សមាជិករបស់ គ.ជ.ប ថ្មី នឹងត្រូវផុតអាណត្តិរបស់ខ្លួន ក្នុង​រយៈពេល​៥ឆ្នាំ បន្ទាប់ពីសមាជិកថ្មី ចូលកាន់មុខតំណែង។ ហើយសមាជិក(ថ្មី)ទាំងនោះ មានការងារ និងតួនាទី «វិសមិតភាព»​ទៅនឹងមុខងារសាធារណៈ ឬជាសមាជិកនៃស្ថាប័នដទៃទៀត ដូចមានចែងក្នុងច្បាប់ និងរដ្ឋធម្មនុញ្ញ៕