តាមការចុះផ្សាយ របស់សារព័ត៌មានដើមអំពិល ក្នុងថ្ងៃទី២៧ ខែតុលានេះ បានលើកសរសេរថា លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានអះអាងជាថ្មីថា បាតុកម្មនេះបានជូនដំណឹង ដល់សាលា​រាជធានី​រួចរាល់ហើយ មុននឹងធ្វើបាតុកម្មនោះ។ សារព័ត៌មានដដែល បានលើកសំដី របស់អ្នកនាំពាក្យ​រូប​នេះ មកសរសេរក្នុងអត្ថបទរបស់ខ្លួន ដែលមានចំណងជើងថា «សាលារាជធានីភ្នំពេញបញ្ជាក់ឡើងវិញ៖ ការ​ធ្វើ​បាតុកម្មនៅមុខរដ្ឋសភា បានជូនដំណឹងដល់អាជ្ញាធរ នឹងបញ្ចប់ការតវ៉ា នៅម៉ោង១០៖៣០នាទី»។

តាមខ្លឹមសារនៃការសែត ដែលមាននិន្នាការស្និត នឹងរដ្ឋាភិបាលមួយនេះ បានបរិយាយថា៖ «លោក ឡង់ ឌីម៉ង់ អ្នកនាំពាក្យសាលារាជធានីភ្នំពេញ បានថ្លែងបញ្ជាក់ឡើងវិញ ប្រាប់មជ្ឈមណ្ឌលព័ត៌មានដើមអម្ពិល នៅ​មុន​នេះបន្តិច នាល្ងាច ថ្ងៃទី២៧ ខែតុលានេះថា ការធ្វើបាតុកម្មតវ៉ា របស់ក្រុមបាតុករ នៅមុខវិមាន​រដ្ឋសភា គឺ​បាន​ជូនដំណឹង ដល់អាជ្ញាធរមុននឹងធ្វើការតវ៉ា»។

សារព័ត៌មានដដែល បានស្រង់សំដីលោក ឡុង ឌីម៉ង់ មកបញ្ជាក់ដូច្នេះថា៖ «អាជ្ញាធរក្រុងភ្នំពេញ បានកោះ​អញ្ជើញតំណាង ក្រុមអ្នកតវ៉ាមកពិភាក្សាសួរនាំ និងណែនាំពីនីតិវិធីច្បាប់ នៃការធ្វើបាតុកម្ម ដោយក្នុងនោះ តំណាងបាតុករបានឯកភាពបញ្ឈប់ និងរំសាយបាតុកម្មនេះ នៅម៉ោង ១០៖៣០នាទីព្រឹកថ្ងៃដដែល ក្រោយ​ពីបានដាក់ញតិ្តជូនរដ្ឋសភា។ ប៉ុន្ដែនៅម៉ោងជាង ១២៖១៥នាទីថ្ងៃត្រង់ ក៏មានកើតឡើង នូវអំពើហិង្សាមួយ ដែលស្មានមិនដល់ ពីសំណាក់ជន មួយក្រុមតូចមិនស្គាល់អត្តសញ្ញាណ បានប្រព្រឹត្តអំពើហិង្សា ដល់​តំណាង​រាស្រ្ត ចំនួនពីររូបដោយ មិនដឹងមូលហេតុ។»

ការអះអាងជាថ្មី របស់អ្នកនាំពាក្យសាលារាជធានីភ្នំពេញនេះ មានលក្ខណៈផ្ទុយទាំងស្រុង ទៅនឹងការ​ផ្តល់កិច្ច​សម្ភាស ជាមួយវិទ្យុសម្លេងប្រជាធិបតេយ្យ (VOD) ដែលបញ្ជាក់ថា បាតុកម្មនេះធ្វើឡើង ដោយមិន​មាន​ការសុំ​អនុញ្ញាត ឬជូនដំណឹងជាមុនឡើយ។ វិទ្យុវីអូឌី បានសរសេរក្នុងអត្ថបទរបស់ខ្លួន ចេញផ្សាយក្នុងថ្ងៃ​ទី២៧ ខែតុលា ឆ្នាំ២០១៥ ក្រោមចំណងជើងថា «លោក កឹម សុខា ថាសមត្ថកិច្ចមិនអើពើ ពីសុវត្ថិភាព​របស់​លោក និងក្រុមគ្រួសារ» យ៉ាងដូច្នេះថា៖ «អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ប្រាប់វីអូឌី​ថា បាតុកម្ម​នោះធ្វើឡើង ដោយមិនមានការសុំអនុញ្ញាតត្រឹមត្រូវ។ លោកបន្តថា សាលា​រាជធានីបានហៅ​តំណាង​ដឹកនាំ ធ្វើបាតុកម្មមកជួបពិភាក្សា នៅពេលដឹងថា ពួកគេធ្វើបាតុកម្ម។ លោកបន្ថែមថា តំណាងអ្នក​ដឹកនាំ​ធ្វើ​បាតុកម្មសន្យាថា នឹងរំសាយបាតុកម្ម នៅម៉ោង១០និង៣០នាទីព្រឹក។»

ក្នុងអត្ថបទមួយទៀត នៃវិទ្យុ វីអូឌី ដែលចេញផ្សាយតាមអ៊ិនធើណែត មានចំណងជើងថា «គណបក្ស​សង្គ្រោះ​ជាតិ ចាត់ទុកហិង្សាកើតលើតំណាងរាស្រ្ត ថាជាអំពើព្រៃផ្សៃ» និងបានចេញផ្សាយ ក្នុងថ្ងៃនៃព្រឹត្តការណ៍​ហិង្សា លើតំណាងរាស្ត្រ មកពីគណបក្សសង្គ្រោះជាតិទាំងពីរូបនោះ ក៏បានបង្ហាញនូវការលើកឡើង របស់​លោក ឡុង ឌីម៉ង់ ដូចគ្នាថា បាតុកម្មប្រឆាំងលោក កឹម សុខា នោះ មិនបានសុំការអនុញ្ញាត ពីសាលា​រាជធានី​នោះ​ទេ។

អត្ថបទបានសរសេរថា៖ «អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានចាត់ទុកហិង្សា​ដែល​បណ្តាលឲ្យតំណាងរាស្រ្តគណបក្សសង្រ្គោះជាតិពីររូបរងរបួសជា “រឿងនឹកស្មានមិនដល់”។ ហើយថា​បាតុកម្ម​ប្រឆាំងលោក កឹម សុខា មិនបានសុំការអនុញ្ញាត ពីសាលារាជធានីនោះទេ។ (...) នៅពេលបាតុកម្ម​កើត​ឡើង សាលារាជធានីបានហៅ តំណាងដឹកនាំបាតុកម្ម មកសាកសួរនៅម៉ោង ប្រមាណ៩ និង៣០នាទី។ ហើយ​ពួក​គេ​សន្យាថា នឹងរំសាយនៅម៉ោង១០និង៣០នាទី។ (...) “យើងកំពុងតែស៊ើបអង្កេត រកជនដៃដល់ ថាតើវា​ជា​ក្រុមបាតុករ ឬក៏អ្នកមានគំនុំផ្ទាល់ខ្លួន”។»

តើករណីនេះ មកពីសារព័ត៌មានស្រង់សំដីខុស ឬមានកិច្ចកលអ្វី នៅពីក្រោយកំណែតម្រូវជាថ្មី? ទស្សនាវដ្ដី​មនោរម្យ.អាំងហ្វូ ព្យាយាមសុំការបកស្រាយ ដោយផ្ទាល់ពីលោក ឡុង ឌីម៉ង់ តែមិនមានការឆ្លើយ​តប​ទេ។

ក្រុមអ្នកតាមដានហេតុការណ៍នេះ បានលើកឡើងថា កន្លងមក បើសិនជាបានការជួបជុំរបស់ក្រុមយុវជន ប្រជា​ពលរដ្ឋ មកពីតាមបណ្តាខេត្តនានា ឬអ្នកបឹងកក់ អ្នកបូរីកីឡាជាដើម ទោះមានអ្នកចូលរួម មិនលើស​ពី៥០នាក់ក៏ដោយ តែបើគ្មានការជូនដំណឹង ទៅសាលារាជធានីភ្នំពេញជាមុនទេ នោះអាជ្ញាធររាជធានី​មួយ​នេះ នឹងមិនអនុញាតឲ្យធ្វើឡើយ។ ហើយបើមានការជួនជុំ ឬប្រមួលផ្តុំគ្នា ទោះត្រឹមតែពីរទៅបីនាក់​ក៏​ដោយ ក៏ត្រូវបានសាលារាជធានីភ្នំពេញ ដាក់កម្លាំងសន្តិសុខតាមខណ្ឌ ឬតាមផ្លូវនានា យ៉ាងសន្ធឹក​សន្ធាប់ រហូត​ឈានទៅបំបែក ឬទៅវាយកម្ទេចនូវសម្ភារៈ របស់ក្រុមយុវជន ឬពលរដ្ឋទាំងនោះ។ នៅក្នុង​ហេតុការណ៍​ខ្លះ ក្រុមយុវជន និងពលរដ្ឋទាំងនោះ ថែមទាំងត្រូវបានអាជ្ញាធរចាប់ខ្លួន ដាក់ឡានយកទៅសាកសួរ រួច​ធ្វើ​កិច្ច​សន្យា នៅខណ្ឌនោះទៀតផង។

រីឯមតិក្នុងបណ្តាញសង្គម ក៏បានលើកឡើងស្រដៀងគ្នាដែរថា៖ «ចុះបាតុកម្ម ដែលគាំទ្រគណបក្ស​ប្រជាជន​កម្ពុជានេះ ដែលមានគ្នារាប់ពាក់នាក់ ជិះរថយន្តធំៗ ជិះរថយន្តទំនើបៗ មកធ្វើបាតុកម្ម បែជាគ្មាន​សមត្ថកិច្ច ឬសន្តិសុខណាម្នាក់ ចេញមកហាមឃាត់ ឬរារាំង តែបែរជាជួយសម្រួល រហូតមានហិង្សាកើតមានឡើង​យ៉ាង​ដូច្នេះ? រួចហើយ តាំងឆ្លើយដាក់កំហុស ទៅលើក្រុមមួយ ដែលមិនស្គាល់អត្តសញ្ញាណ។»៕