កាលពីរសៀលថ្ងៃទី៤ ខែមីនាម្សិលម៉ិញនេះ លោកនាយករដ្ឋមន្រ្តី ក៏បានប្រកាសប្រឆាំងយ៉ាងដាច់អង្ការទៅលើក្រុមមួយ ឬជនណាម្នាក់ ដែលហ៊ានធ្វើការប្រឆាំង នឹងការដឹកនាំរបស់រដ្ឋាភិបាលសព្វថ្ងៃនេះ។ លោកចាត់ទុកថា ក្រុមនោះ ឬបុគ្កល​នោះ កំពុងតែបង្កើត ឲ្យមាន«បដិវត្តន៍ពណ៌»ឡើង ដើម្បីរុញប្រទេសជាតិ ឲ្យចូលក្នុងសង្គ្រាមស៊ីវិល រួមទាំងការដណ្តើម​អំណាច ពីអាជ្ញាធរស្របច្បាប់របស់កម្ពុជា។

ការថ្លែងរបស់លោកនាយករដ្ឋមន្រ្តីនេះ ត្រូវបានអតីតសាស្រ្តាចារ្យច្បាប់ នៃសកលវិទ្យាល័យក្នុងរាជធានីភ្នំពេញមួយរូប បានថ្លែងប្រាប់ទស្សនាវដ្តីមនោរម្យ.អាំងហ្វូថានេះ ជាសង្គ្រាមពាក្យ«សម្តី»ថ្មី ដើម្បីគម្រាម ទៅកាន់ក្រុមដែល​ហ៊ានចេញ​មុខ ប្រឆាំងនឹងសកម្មភាពនានា របស់រដ្ឋភិបាល បើទោះជារដ្ឋាភិបាលនោះធ្វើខុសច្បាប់ ឬរំលោភរដ្ឋធម្មនុញ្ញាក៏ដោយ។

សាស្រ្តាចារ្យច្បាប់ ដែលសុំមិនបញ្ចេញឈ្មោះរូបនេះ បានបន្តថា តាមពាក្យសម្តី(លោក ហ៊ុន សែន) ខាងលើនេះ នៅ​កម្ពុជា ចាប់ពីពេលនេះតទៅ សិទ្ធិ និងសេរីភាពពលរដ្ឋ អាចនឹងត្រូវបានរឹតបណ្តឹង។ គណបក្សដែលមិនកាន់អំណាច ក៏​នឹងប្រឈមនឹងភាពពិការ ក្នុងការជម្រុញឲ្យមានលិទ្ធិប្រជាធិបតេយ្យ តាមរយៈការងារ និងសកម្មភាពរបស់ខ្លួននោះដែរ។ លោកសាស្ត្រាចារ្យ បានលើកជាឧទាហរណ៏ថា៖ «បើបក្សប្រឆាំង ចង់ប្រឆាំងនឹងបុគ្គលមានអំណាចណាម្នាក់ ក្នុង​គោល​បំណងដើម្បីលិទ្ធិប្រជាធិបតេយ្យ និងសេរីភាពនៅកម្ពុជា ហើយរដ្ឋាភិបាលមិនឯកភាព តែបក្សប្រឆាំងនៅតែ​ជំទាស់​ចង់​ធ្វើ។ ក្រោមហេតុផលនេះ រដ្ឋាភិបាលអាចនឹងធ្វើការចោទប្រកាន់ថា នេះជាការបង្កើតឲ្យមានបដិវត្តពណ៌ជាដើម។»

សាស្រ្តចារ្យខាងលើ បានមើលឃើញថា ក្នុងបរិបទកម្ពុជាសព្វថ្ងៃ អំណាចទាំងអស់ ហាក់កំពុងស្ថិតលើ​គណបក្ស​ប្រជាជន​កម្ពុជាតែមួយ ដែលនោះ មិនមែនជាអំណាចឯករាជ្យ នៃប្រទេសប្រជាធិបតេយ្យនោះឡើយ។ តួយ៉ាង ដូចជា​គណបក្សប្រជាជនកម្ពុជា កំពុងបន្តប្រមូលផ្តុំអំណាចទាហាន និងទ័ពទាំងអស់ បញ្ចូលក្នុងគណៈកម្មការអចិន្ត្រៃយ៍ នៃ​គណបក្សរបស់ខ្លួន តាមរយៈថ្នាក់ដឹកនាំធំៗ នៃក្រុមសន្តិសុខជាតិទាំងនោះ។ ជាមួយគ្នានេះ គណបក្សប្រជាជន​កម្ពុជា​នេះ ក៏បានប្រមូលកម្លាំងសន្តិសុខជាតិ ដែលជាកម្លាំងអព្យាក្រិត្យ ឲ្យចូលរួមក្នុងការឃោសនា ស្វែងរកប្រយោជន៍ និងការ​គាំទ្របក្សខ្លួន ក្នុងនាមកម្លាំងការពារសន្តិសុខ សម្រាប់ជាតិទាំងមូលថែមទៀតផង។

ក្នុងពិធីបិទ សន្និបាតបូកសរុបការងារ នៅក្រសួងការពារជាតិ កាលពីថ្ងៃទី ០៤ ខែមិនា ម្សិលម៉ិញ លោកនាយក​រដ្ឋមន្រ្តី​កម្ពុជាថ្លែងដូច្នេះថា៖ «សម្រាប់កម្ពុជាយើងកន្លងទៅ យើងបានបានឃើញយ៉ាងច្បាស់ នូវឧបាយកលផ្តួលរំលំ តាមរយៈ​នៃ​ការផ្លាស់ប្តូរ តាមចិញ្ចើមថ្នល់។ ក្នុងស្ថានភាពនេះ កម្លាំងប្រដាប់អាវុធយើង បានធ្វើសកម្មភាព ដើម្បីការពាររដ្ឋធម្មនុញ្ញ ការពារជាតិ សាសនា ព្រះមហាក្សត្រ និងការពាររាជរដ្ឋាភិបាលស្របច្បាប់។ (…) សកម្មភាពទាំងនេះ មិនទាន់ត្រូវ​បាន​បញ្ចប់ទេ ពិតមែនបើមានភាពស្ងប់ស្ងាត់ ប៉ុន្ដែត្រូវតាមសម្លឹងមើលនូវបាតដៃទី៣ ដែលកំពុងធ្វើសកម្មភាពលួចលាក់ ដាច់​ខាតមិនត្រូវឲ្យមានបដិវត្ដន៍ពណ៌ នៅក្នុងប្រទេសកម្ពុជានោះទេ មិនថាបដិវត្ដន៍ពណ៌ចេញមកពីទីណាទេ ចាំបាច់ត្រូវ​ធ្វើ​សកម្មភាព​បំផ្លាញ»។

ការថ្លែងរបស់លោកនាយករដ្ឋមន្រ្តី ដែលស្នើឡើងឲ្យកម្លាំងសន្តិសុខរបស់ជាតិ ការពារដ្ខធម្មនុញ ជាតិ សាសានា និង​ព្រះ​មហាក្សត្រ នោះ គ្រាន់តែជាលេសនយោបាយប៉ុណ្ណោះ។ នេះបើតាមការអះអាងបន្ត របស់សាស្រ្តចារ្យច្បាប់ដដែល។ តែ​អ្វីដែល​លោក ហ៊ុន សែន ចង់បាននោះ គឺ ជាការការពារអំណាច តំណែង និងបក្សរបស់ខ្លួន ដូចអ្វីដែលធ្លាប់បានធ្វើស្រាប់ កន្លង​មកនេះជាដើម។ លោកសាស្ត្រាចារ្យ បានថ្លែងឲ្យដឹងទៀតថា៖ «កម្លាំងសន្តិសុខជាតិ ដែលរួមមានកងរាជអាវុធហត្ថ ទាហាន ប៉ូលីសជាដើម ជាកម្លាំងរបស់ជាតិ មិនមែនរបស់បុគ្កល របស់បក្ស ឬក្រុមណាមួយឡើយ។ កម្លាំងទាំងនេះ ធ្វើ​ការ​​ការពារសន្តិសុខជាតិទាំងមូល ដើម្បីបំរើប្រយោជន៍ជាតិ សង្គម និងប្រជា។»

លោកថ្លែងថា ការស្រែកឡើង របស់លោកនាយករដ្ឋមន្រ្តី នូវពាក្យថា «បដិវត្តពណ៌» ជាគន្លឹះគោល ក្នុងការគម្រាមកំហែង ទៅគ្រប់មជ្ឈដ្ឋានណា ដែលហ៊ានតវ៉ា ក្នុងទ្រង់ទ្រាយមួយ ដើម្បីការផ្លាស់ប្តូរអ្នកដឹកនាំនានា ដូចរយៈកាលដែល​គណបក្ស​សង្គ្រោះជាតិ ធ្លាប់ធ្វើកន្លងមកនេះជាដើម។

ទស្សនាវដ្តីមនោរម្យ.អាំងហ្វូ មិនអាចសុំការបំភ្លឺ ពីអ្នកនាំពាក្យគណបក្សសង្គ្រោះជាតិ ដែលជាគណបក្សប្រឆាំងធំជាងគេ ក្នុងប្រទេសកម្ពុជាបានទេ នាពេលនេះ ដោយគ្មានអ្នកទទួលទូរស័ទ្ធ។

ថ្មីៗនេះ លោក ផៃ ស៊ីផាន រដ្ឋលេខាធិការ និងជាមន្ត្រីអ្នកនាំពាក្យ ឲ្យទីស្ដីការគណរដ្ឋមន្ត្រី ក៏បានបង្ហាញក្នុងកិច្ចប្រជុំុំ​មួយ​ដែរ ដល់សិក្ខាកាម ដែលបានចូលរួម ឲ្យស្វែងយល់ពីបញ្ហា នៃបដិវត្តន៍ពណ៌។ ក្នុងបណ្តាញព័ត៌មានសង្គម លោក ផៃ ស៊ីផាន បានសរសេរថា ចង់បានលទ្ធិប្រជាធិបតេយ្យ យកនីតិរដ្ឋជាមូលដ្ឋាន ក្នុងកិច្ចពង្រឹង និងពង្រីក លទ្ធិ​ប្រជាធិបតេយ្យ ក្នុងកិច្ចចូលរួមរបស់មហាជន ដោយជៀសវាងនូវ«បដិវត្តន៍ពណ៌» ដែលកើតចេញពីក្រុម ឬជនដែល​មាន​និន្នាការ​ឧទ្ទាម ឬ​ក្រុម​បដិវត្តន៍ យកចលនាមហាជនជាទិសដៅ ដើម្បីផ្លាស់ប្តូររបប៕