ជនរងគ្រោះ គ្មានជម្រកត្រឹមត្រូវ ជាជនអាមេរិកស្បែកខ្មៅមួយរូប ដែលមានសតិមិនធម្មតា បានព្យាយាមឆក់យកអាវុធ ពីនគរបាលម្នាក់ ដែលកំពុងបង្ខំឲ្យជននេះ ក្រាបជាប់នឹងដី។ នៅក្នុងវីដេអូ គេបានស្ដាប់ឮនគរបាលស្រែកឡើងថា៖ «ទម្លាក់​អាវុធចោលៗ» មុននឹងឭសូរ គ្រាប់កាំភ្លើងជាច្រើនគ្រាប់ បានផ្ទុះឡើង ហើយបន្ទាប់មកសម្លេងអ្នកនៅក្បែរនោះ ស្រែក​ឲ្យ​រកជំនួយជាបន្ទាន់។

ហេតុការណ៍នេះ បានកើតឡើងកាលពីថ្ងៃទី០១ ខែមីនានេះ នៅក្នុងសង្កាត់ក្រីក្រ ស្គីតរ៉ូវ (Skid Row) ដែលស្ថិត​នៅមិន​ឆ្ងាយ​ប៉ុន្មាន ពីកណ្ដាលក្រុង ឡូសអែជឺឡេស ដែលសម្បូរទៅដោយ ជនគ្មានជម្រករស់នៅ តាមចិញ្ចើមថ្នល់ ឬនៅ​តាម​សួន​ច្បារ។ បើតាមប្រព័ន្ធផ្សព្វផ្សាយក្នុងស្រុក បានឲ្យដឹងថា យ៉ាងហោចណាស់ នគរបាលម្នាក់ បានបាញ់ ទៅលើជន​គ្មាន​ជម្រកស្បែកខ្មៅនេះ។ បន្ទាប់ពីហេតុការណ៍នេះ ប៉ុន្មានម៉ោង ជនរងគ្រោះត្រូវបានគេដឹងថា បានស្លាប់ នៅក្នុង​មន្ទីរពេទ្យ កន្លែងដែលគេបានបញ្ជូនជននេះ ទៅព្យាបាល។

នាយនគរបាល ប្រចាំសង្កាត់នោះ លោក ឆាលី ប៊េក (Charlie Beck) បានឲ្យដឹង នៅក្នុងសន្និសីទការសែតថា ការ​ប្រើប្រាស់​កម្លាំង ជារឿងមួយចាំបាច់ នៅក្នុងហេតុការណ៍នោះ។ លោកបានបញ្ជាក់ទៀតថា៖ «កងកម្លាំងទាំងអស់ ដែល​ស្ថិត​ក្នុងព្រឹត្តិការណ៍ សុទ្ធតែបានដឹងថា តើត្រូវគ្រប់គ្រងស្ថានការណ៍យ៉ាងម៉េច ជាមួយនឹងជនគ្មានជម្រកទាំងនោះ ឬជា​មួយ​ជនដែលមានសតិមិនធម្មតា។ ពួកគេ សុទ្ធតែទទួលបាន ការហ្វឹកហាត់ពិសេស នៅក្នុងកិច្ចអន្តរាគមន៍របៀបនេះ។»

តែការលើកឡើង របស់នាយនគរបាល មានលក្ខណៈផ្ទុយ ទៅនឹងមតិសាធារណៈជនទូទៅ។ អ្នករស់នៅក្នុង​សង្កាត់​នោះ​មួយរូប បានថ្លែងឡើងថា៖ «មាននគរបាលច្រើននាក់ ដែលធ្វើការឡោមព័ទ្ធ បុរសស្បែកខ្មៅ។ នគរបាលទាំងនោះ អាច​បង្ក្រាបបុរសម្នាក់នេះបាន ដោយស្រួល បើទោះជាបុរស មានសតិមិនធម្មតាក៏ដោយ។ តែបើសិនជានគរបាលធ្វើមិនបាន បានន័យថា វាមានបញ្ហាអ្វីមួយហើយ។ នគរបាលបានប្រើប្រាស់មធ្យោបាយ ដែលមានលក្ខណៈជ្រុលហួសហេតុ។»

ហេតុការណ៍ខាងលើ បានកំពុងដុតបញ្ឆេះឲ្យផ្ទុះសង្គ្រាមពាក្យសម្ដីឡើងវិញ នៅសហរដ្ឋអាមេរិក នៅតែប៉ុន្មានខែប៉ុណ្ណោះ ក្រោយ​ការបាញ់សម្លាប់ យុវជនស្បែកខ្មៅម្នាក់ នៅក្រុង ហ្វែហ្គឺសាន់ (Ferguson) ដោយនគរបាលនៅតំបន់នោះ។ មរណភាព​របស់យុវជនស្បែកខ្មៅ នាពេលនោះ បានបង្កឲ្យមានរលកតវ៉ាមួយយ៉ាងខ្លាំងក្លា ប្រឆាំងនឹងការរើសអើង ដែល​កើត​មាន​នៅ​ក្នុង​ជួរនគរបាលអាមេរិក៕