ក្នុងកិច្ចសម្ភាសន៍ ជាមួយទស្សនាវដ្តីមនោរម្យ.អាំងហ្វូ ប្រធានគណៈកម្មការទី៨រដ្ឋសភា លោកស្រី កែ សុវណ្ណរតន៍ បាន​បង្ហាញពីការមិនចាប់អារម្មណ៍ ចំពោះក្រុមការងារមួយចំនួន នៃគណបក្សសង្គ្រោះជាតិខេត្តសៀមរាប ដែល​ទាម​ទារ​ទម្លាក់លោកស្រី នាពេលនេះឡើយ។ អ្នកស្រីបន្តថា អ្វីដែលត្រូវដោះស្រាយចំពោះមុខ គឺបញ្ហាជាតិ សង្គម និង​ប្រជា​រាស្រ្តទាំងមូល។

ការលើកឡើងនេះ បន្ទាប់ពីក្រុមការងារនៃគណបក្រសង្គ្រោះជាតិ មកពីខេត្តសៀមរាបប្រមាណ៥៥នាក់ នាព្រឹក​ថ្ងៃទី​០២ ខែមីនា ឆ្នាំ២០១៥នេះ នៅមុសស្នាក់ការគណបក្សសង្គ្រោះជាតិ សង្កាត់ចាក់អង្រែរក្រោម ខណ្ឌមានជ័យ ភ្នំពេញ។ ការប្រមូលផ្តុំនៃក្រុមការងារគណបក្សសង្គ្រោះជាតិនាពេលនេះ ក្នុងគោលបំណងឲ្យមានការផ្លាស់ប្តូរលោកស្រី កែវ សុវណ្ណរតន៍ ចេញពីប្រធានក្រុមការងារខេត្តសៀមរាប ក្រោមមូលហេតុបក្សពួកនិយមគ្មានយុត្តិធម៌ គ្មានតម្លាភាព។

ទស្សនាវដ្តីមនោរម្យ.អាំងហ្វូមិនអាចសមការបញ្ជាក់ពីលោក យឹម សុវណ្ណ អ្នកនាំពាក្យ​គណបក្សសង្គ្រោះជាតិ​នោះ​បាន​ឡើយ ដោយគ្មានអ្នកទទួលទូរស័ព្ទ។ ក្នុងកិច្ចសម្ភាសជាមួយវិទ្យុអាស៊ីសេរី កាលពីថ្ងៃទី០១ ខែមីនា ម្សិលម៉ិញនេះ លោក​បានបង្ហាញថា បើមិនមែនជា«ល្បិចនយោបាយ»នៃគូបដិបក្ខ ដែលជ្រើសរើសដើម្បីបំបែកផ្ទៃក្នុងនោះទេ គណបក្ស​នឹងស្រាវជ្រាវឲ្យច្បាស់ នូវការចោទប្រកាន់រឿងបក្សពួកនិយមនោះ។ លោក យឹម សុណ្ណ បានថ្លែង​ឲ្យដឹង​ទៀត​ថា៖ «ក្នុងឆាកនយោបាយ មានរឿងល្អនិងរឿងអាក្រក់ច្រើនណាស់ ដែលយើងត្រូវដោះស្រាយដោយ​ប្រុង​ប្រយ័ត្ន។ គូបដិបក្ខរបស់យើង នៅសល់ចំណុចខ្លាំងតែមួយគត់ គឺបំបែកបំបាក់ផ្ទៃក្នុងរបស់គណបក្ស។»។

ករណីមានមនុស្ស នៅពីក្រោយឆាក នៃការតវ៉ាប្រឆាំងលោកស្រី កែ សុវណ្ណរតន៍ នេះ ត្រូវបានលោកស្រី​ខ្លួនឯង​បញ្ជាក់​ថា៖ «វាគង់តែដឹងការពិត។ (...) គេស្គាល់ខ្ញុំច្រើនហើយ ថ្នាក់មេដឹកនាំធំៗ មិនមានអ្វីត្រូវបិទបាំងនោះឡើយ។ ហើយ​ខ្ញុំ​ក៏មិនដែលធ្លាប់ត្រូវបានគេ (សាធារណជន ឬប្រធានបក្ស) ថ្គោលទោសនោះដែរ។ (...) រឿងវាដដែលៗ គ្មានអ្វីដែល​ត្រូវ​ព្រួយបារម្ភឡើយ។ ខ្ញុំលះបង់ពេលវេលា និងបញ្ហាផ្សេងៗទៀត ដើម្បីតែផលប្រយោជន៍ជាតិ និងយុត្តិធម៌សង្គម។ ខ្ញុំ​ការពារ​ពលរដ្ឋរឿងដីធ្លី និងការដោះស្រាយទុក្ខកង្វល់ របស់ប្រជាពលរដ្ឋជាដើម។»

ប្រធានគណៈកម្មការទី៨រដ្ឋសភារូបនេះបានបន្តថា ក្នុងសង្គមប្រជាធិបតេយ្យ មិនមានអ្វីដែលធ្វើឲ្យលោកស្រី មាន​ការ​ខ្វល់ខ្វាយ ចំពោះការចោទប្រកាន់ណាមួយ មកលើលោកស្រីឡើយ។ លោកស្រីបានបន្តថា សម្រាប់គណបក្ស​សង្គ្រោះ​ជាតិ ក៏មិនមានរបងហ៊ុំព័ត៌អ្វីដែរ សមាជិកបក្សទាំងអស់ អាចបង្ហាញនូវអ្វី ដែលខ្លួនមិនពេញចិត្ត ជូនថ្នាក់ដឹកនាំរបស់​ខ្លួន។ «ខ្ញុំមិនមានអ្វីលាក់ការទេ។ គណបក្សសង្គ្រោះជាតិ ជាគណបក្សប្រជាធិបតេយ្យ មិនមានអ្វីមកបិទបាំងឡើយ ហើយ​ម្នាក់ៗសុទ្ធតែមកធ្វើការដោយស្ម័គ្រចិត្ត។»

លោកស្រី កែ សុវណ្ណរតន៍ បានការពារគណបក្សសង្គ្រោះជាតិទៀតថា៖ «បើរារាំង ឬបិទបាំង ប្រហែលមិនបាន​ជោគ​ជ័យ​ទេ។ យើងធ្លាប់មានការកំហែងខ្លាំងណាស់ និងក៏មានការតតាំងច្រើនដែរ។ លទ្ធផលជាក់ស្តែង នឹងបង្ហាញតាម​សកម្មភាព និងការងារ។ គ្មាននណាម្នាក់ អាចធ្វើការម្នាក់ឯងបាននោះឡើយ ត្រូវតែមានសហការីជួយ។ ខ្ញុំ អ្នកណា​ជួយ គឺយកទាំងអស់។ យើងនឹងមិនរង់ចាំការងារ ដែលត្រូវធ្វើម៉ោងនេះ ហើយអង្គុយរង់ចាំអ្នក ដែលមិនទាន់ទំនេរ មក​ជួយនោះឡើយ។ អ្នកណាទំនេរអ្នកនោះធ្វើទៅ។ (...) ការសម្រេចនានា ទុកឲ្យខាងថ្នាក់ដឹកនាំគណបក្ស ជាអ្នកផ្តល់​យុត្តិធម៌។»៕