ស្ថាប័នជំនាញពាក់ព័ន្ធ ដែលធ្វើការអង្កេតបន្ថែមលើរឿងនេះ ក្រៅពីបញ្ជាក់ថា ជនទាំងបីនោះ មិនមែនជា​ជនល្មើសសិប្បនិមិ្មត តោងត្រូវស្វែងរក អ្នកបញ្ជាពីក្រោយ និងជនសមគំនិតមួយចំនួនទៀត មកផ្តន្ទាទោស​តាមច្បាប់។ នេះជាការថ្លែងអះអាង របស់លោក យ៉ង់ គឹម អេង ប្រធាមមជ្ឈមណ្ឌលប្រជាពលរដ្ឋ ដើម្បី​អភិវឌ្ឍន៍ និងសន្ដិភាព ទាក់ទងនឹងការចូលសារភាព របស់ជនបីនាក់ ដែលគេសង្ស័យថា បានប្រើ​អំពើ​ហិង្សាវាយតប់ ទៅលើតំណាងរាស្ត្រពីររូប មកពីគណបក្សសង្គ្រោះជាតិ។

ថ្លែងក្នុងកិច្ចសម្ភាស ជាមួយទស្សនាវដ្តីមនោរម្យ .អាំងហ្វូ លោក យ៉ង់ គីមអេង បានបង្ហាញនូវមន្ទិល​មួយ​ចំនួន ដែលក្រសួងមហាផ្ទៃ ធ្លាប់បានអះអាងថា អាជ្ញាធរពិបាកនឹងកំណត់អត្តសញ្ញាណជនល្មើស តែផ្ទុយ​មកវិញ ស្រាប់តែជនទាំងនោះ លេចមុខមកសារភាព ដោយខ្លួនឯងទៅវិញ។

លោកដាក់ជាសំនួរឡើងថា៖ «តើជនដែលសារភាព ពិតជាជនដែលបានវាយ តំណាងរាស្រ្តនោះដែរឬទេ? នេះជារឿងសំខាន់។ យើងមិនចង់បានឧក្រិដ្ឋជន ជាសិប្បនិមិ្មតដូចពីមុនទេ (ប៊ន សំណាង និងសុខ សំអឿន)។ សំខាន់មួយទៀត ក៏ត្រូវស្វែងរកយុត្តិធម៌ដល់ពួកគាត់ បើគាត់ជាអ្នកវាយមែន មុខជាធ្វើតាមបញ្ជា និង​មាន​បក្ស​ពួក​ទៀត។»

យ៉ាងណាប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្ដិភាពរូបនេះ បានជឿជាក់ថា ការចូល​មក​សារភាពនេះ អាចមានពាក់ព័ន្ធ ជាមួយនឹងបញ្ហា «នយោបាយ» ឬការរៀបចំទុកជាមុន។ លោកពន្យល់ថា ជនទាំងបីដែលបានចូលមក«សារភាព» ថាខ្លួនជាអ្នកវាយតំណាងរាស្រ្ត ធ្វើឡើងតែប៉ុន្មានម៉ោង មុនវត្តមាន​លោក សម រង្ស៊ី មកដល់កម្ពុជាប៉ុណ្ណោះ។ លោកបន្តថា នោះអាចជាចេតនាមួយ ដើម្បីបន្ធូបន្ថយ​បរិយាកាស​នយោបាយ និងដើម្បីកុំឲ្យលោក សម រង្ស៊ី ធ្វើការវាយប្រហារ ទៅលើអាជ្ញាធរ ឬរដ្ឋាភិបាលដឹកនាំ ដោយ​គណបក្ស​ប្រជាជនកម្ពុជា ដែលគ្មានលទ្ធភាព ចាប់ជនដៃដល់វាយតំណាងរាស្រ្ត តែបែរជាមានលទ្ធភាព ចាប់​តំណាងរាស្រ្ត (សមាជិកព្រឹទ្ធសភា) ដាក់ពន្ធនាគារ នាពេលកន្លងមកនោះទៅវិញ។

លោកបានអះអាងទៀតថា៖ «ការចាប់សកម្មជនបក្សប្រឆាំងមួយចំនួន (រដ្ឋាភិបាល) ប្រើហេតុផល​មិន​សមរម្យ​ផង។ លើកនេះមានការវាយដំ ហើយគេមានវីដេអូឃ្លីប គេកំណត់អត្តសញ្ញាណបានខ្លះ ប្រព័ន្ធ​ហ្វេសប៊ុក​រិះគន់ខ្លាំង... អញ្ចឹងយ៉ាងណា ក៏តម្រូវឲ្យមានការចេញ មកសារភាពនេះ។»

ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បានពន្យល់ថា៖ «តាមឃ្លីបវីដេអូ នៃការវាយ​តប់។ ខ្ញុំឃើញច្រើន ច្រើនជាងបីនាក់... មានប្រាំ, ប្រាំមួយនាក់យ៉ាងតិច។ ចឹងគាត់ (ជនចូលសារភាព) អាច​ចង្អុលបង្ហាញ គាត់ស្គាល់គ្នាតែទាំងអស់ បើគាត់ពិតជាជនដៃដល់មែន។ (...) ក្រសួងមហាផ្ទៃ មើលវីដេអូឃ្លីប​ថែមទៀតទៅ! ថាមានប៉ុណ្នឹងឬអត់? អ្នកខ្លះជួយចាប់ អ្នកខ្លះជួយវាយ អ្នកខ្លះជួយជ្រោមជ្រែងគ្នាហ្នឹង... នោះ​ស្ថិតក្នុងក្រុមសមគំនិត។ មានអ្នកដៃដល់ និងអ្នកសមគំនិត នៅក្នុងបទល្មើសព្រហ្មទណ្ឌ..។ ត្រូវរកមើល​បន្ថែម​ទៀតថា តើមានអ្នកសមគំនិតទេ មានអ្នកបញ្ជាពីក្រោយខ្នងទេ ត្រូវតែរកមើលចំណុចនេះបន្ថែម​ទៀត ត្រូវតេស៊ើបអង្កេតទាំងអស់។»

សូមបញ្ជាក់ថា ជនដែលបានចូលខ្លួនមកសារភាព ត្រូវបានប៉ូលិសក្រសួងនៃមហាផ្ទៃ នាំមកកាន់សាលា​ដំបូង​រាជធានីភ្នំពេញ ដោយ«មិន»មានវាយខ្នោះដៃ ដូចកាលចាប់សកម្មជនគណបក្សប្រឆាំង ឬយុវជនតវ៉ា​រឿងបរិដ្ឋាននោះឡើយ។ ជនទាំងបីរូបខាងលើនេះ ត្រូវបានចូលមកសារភាពថា ខ្លួនពិតជាអ្នកវាយ​តំណាង​រាស្ត្រ គណបក្សសង្គ្រោះជាតិទាំងពីររូបនោះ កាលពីថ្ងៃទី២៦ ខែតុលាកន្លងមក។ ហើយជនទាំងបីនាក់នេះ បានចូលមកសារភាព នារសៀលថ្ងៃទី៣ ខែវិច្ឆិកា ម្សិលម៉ិញនេះ។

តាមសេចក្តីប្រកាស របស់អ្នកនាំពាក្យក្រសួងមហាផ្ទៃ បានសរសេរថា មានបុរស ៣នាក់ បានចេញមក​សារភាព ចំពោះសកម្មភាព នៃអំពើហិង្សាលើតំណាងរាស្ត្រ គណបក្សសង្គ្រោះជាតិទាំងពីររូប។ សេចក្តី​ប្រកាស​ព័ត៌មាន ដែលចេញផ្សាយនៅវេលាយប់ ថ្ងៃ៣ ខែវិច្ឆិកា ឆ្នាំ២០១៥នេះ បានសរសេរបន្តថា ជនទាំង​បីនាក់​នោះ បានមកសារភាពនៅមុខ គណៈកម្មការស្រាវជ្រាវស៊ើបអង្កេត ករណីបង្ករបួសស្នាម លើអ្នក​តំណាង​រាស្ត្រ នៃក្រសួងមហាផ្ទៃ។ ជនទាំងបីនោះ រួមមានឈ្មោះ ចាយ សារិទ្ធ ភេទប្រុសអាយុ៣៣ឆ្នាំ រស់​នៅក្រុងតាខ្មៅខេត្តកណ្តាល។ ឈ្មោះ ម៉ៅ ហឿន ភេទប្រុសអាយុ៣៤ ឆ្នាំ រស់នៅស្រុកពាមរក៍ ខេត្តព្រៃវែង និងឈ្មោះ សុត វណ្ណនី ភេទប្រុស អាយុ៤៥ ឆ្នាំ រស់នៅក្រុងតាខ្មៅ ខេត្តកណ្តាល។

កាលពីថ្ងៃទី២៨ ខែតុលា លោកនាយករដ្ឋមន្រ្តី ហ៊ុន សែន បានចេញមុខ ធ្វើសេចក្តីថ្លែងការណ៍ ជា​សាធារណៈ​តាមវីដេអូឃ្លីបមួយ ដោយបានប្រកាសឲ្យជនដៃដល់ ដែលបានវាយដំ លើតំណាងរាស្រ្ត ចេញ​មក​សារភាព​ជាបន្ទាន់។ ជាមួយគ្នានេះ លោកក៏បាន បញ្ជាឲ្យប៉ូលិសសមត្ថកិច្ច តាមចាប់ខ្លួនជនបង្ក អំពើ​ហិង្សា​ទាំង​នោះ មកផ្តន្ទាទោសតាមច្បាប់ ដោយគ្មានការលើកលែង គ្មាននិន្នាការគណបក្សនយោបាយ ណា​មួយ​ឡើយ៕