ដូចអត្ថបទ «ហ៊ុន សែន ដកតំណែងមន្ត្រីរដ្ឋ ដើម្បីយកចិត្តឯកជន» របស់ទស្សនាវដ្ដីមនោរម្យ.អាំងហ្វូ ដែល​បាន​ចេញផ្សាយ កាលពិម្សិលម៉ិញថា នោះគឺជាការដកដំណែង​​ប្រធានមន្ទីរសុខាភិបាល​រាជធានី ដ៏​ប្រទាំង​ប្រទើសមួយ ពីសំណាក់នាយករដ្ឋមន្ត្រីកម្ពុជា ដោយហេតុថាមន្ត្រីលេខាធិការដ្ឋាន ដែលស្ថិត​ក្រោម​បង្គាប់ របស់​មន្ទីរ​សុខាភិបាលរាជធានី បានធ្វើការឃាត់រថយន្ដគិលានសង្គ្រោះបន្ទាន់មួយ របស់ស្ថានីយ៍​វិទ្យុ ABC ដែល​គ្មាន​ច្បាប់​អនុញ្ញាត និងដែលបែរជាត្រូវបាន យកទៅប្រើប្រាស់ដឹកទឹកត្របែក ដូចជា​រថយន្ដ​ដឹក​​ទំនិញ​ធម្មតា ដើម្បី​យក​ទៅ​ប្រគល់ ឲ្យអតិថិជនរបស់ខ្លួនទៅវិញ។ ចំណាត់ការនោះ បានបង្ក​ចំងល់​ដល់​​មតិ​សាធារណ​ជន ឲ្យ​​ចោទ​​សួរ​​ឡើង​ថា តើវាជាផ្នែកមួយ នៃយុទ្ធនាការធ្វើ​«ប្រជាភិថុតិ»​របស់​លោក ហ៊ុន សែន ឬ?

លោកនាយករដ្ឋមន្ត្រី ហ៊ុន សែន នៅថ្ងៃអាទិត្យទី១៤ ខែសីហា ឆ្នាំ២០១៦នេះ បានសរសេរពន្យល់ ពីការ​សម្រេច​​ចិត្ត​របស់លោក ក្នុងការដកតំណែងប្រធានមន្ទីររូបនោះ និងថែមទាំងបានអះអាង​ដោយ​ខ្លួនលោក ថា​កិច្ច​​​អន្តរាគមន៍​​​របស់លោក ដោយសារមាន«បងប្អូន ដែលនិយមស្តាប់វិទ្យុ​ ABC កាន់តែងឿងឆ្ងល់ ហើយ​បន្ត​អំពាវនាវ មកនាយករដ្ឋមន្ត្រីឲ្យជួយ»។

នាយករដ្ឋមន្ត្រី​បីទសវត្សន៍​ជាង​របស់​កម្ពុជា បានពន្យល់ថា លោកមិនបានលូកដៃ ចូលអន្តរាគមន៍​ក្នុង​កិច្ចការ​នេះ ពីដំបូងមកទេ ដោយសារលោកចង់តាមដានបញ្ហានេះ ឲ្យបានច្បាស់សិន និងដោយសារលោក​យល់​ថា រឿង​តូចតាច​បែបនេះ មិនគួរលោកជានាយករដ្ឋមន្ត្រី លូកដៃទៅដោះស្រាយឡើយ។

លោក ហ៊ុន សែន បានសរសេរថា៖ «ចាំបាត់ៗ ហើយក៏គ្មានការបកស្រាយណាមួយ ពីភាគីអ្នកចាប់ថា មកពី​មូលហេតុអ្វី បានចាប់ឡាននេះ ធ្វើឱ្យបងប្អូន​​ដែល​និយម​ស្តាប់វិទ្យុ ​ABC កាន់តែងឿងឆ្ងល់ ហើយបន្តអំពាវនាវ មក​នាយករដ្ឋមន្ត្រីឲ្យជួយ។ "បាតដៃក៏សាច់ ខ្នងដៃក៏សាច់" នេះជាចំណុច​ដែលត្រូវគិត ម្ខាងជាស្ថាប័នរដ្ឋ និង​ម្ខាង​ទៀត​ជាស្ថាប័នផ្សព្វផ្សាយ ដែលបានរួមចំណែកច្រើន (...) បាន​ជួយដល់ជនក្រីក្រ ដែលក្នុងនោះឡាន​ដែល​ត្រូវ​ចាប់​នេះ ជាមធ្យោបាយដ៏សំខាន់ ជួយ​អ្នក​ក្រីក្រ។ ចំណុចខ្វះខាតរបស់រថយន្តនេះ គឺពុំទាន់មានផ្លាក​លេខ ដែល​ខ្ញុំ​ប្រាប់ លោក ឃួន ស្រេង រៀបចំផ្លាក​លេខ​ជូន និង​ផ្តល់​ថែមរថយន្តសង្គ្រោះ ២គ្រឿងទៀត ជូន​វិទ្យុ ABC។»

បន្ទាប់ពីការប្រកាសដកតំណែងលោក សុខ សុគន្ធ ចេញពីតំណងជាប្រធានមន្ទីរ មតិរិះគន់ជាច្រើន បានផ្ទុះ​ឡើង នៅតាមបណ្ដាញសង្គម និងនៅតាមប្រព័ន្ធផ្សព្វផ្សាយឯករាជ្យផ្សេងទៀត។ មតិទាំងនោះ បានលើក​ឡើង​ថា បេសកកម្ម​មនុស្សធម៌ ជួយជនក្រីក្រ ជាទង្វើដ៏ប្រពៃមួយហើយ តែរថយន្ដគិលានសង្គ្រោះបន្ទាន់ វា​ចាំ​បាច់​ត្រូវ​មាន​អ្នកបម្រើការ ប្រកបដោយជំនាញ និងមានបំពាក់​ដោយសម្ភារៈបរិក្ខា ក្នុងការជួយសង្គ្រោះ និង​ត្រូវ​តាម​បទដ្ឋាន​សុខាភិបាល។ ម្យ៉ាងទៀត រថយន្ដគិលានសង្គ្រោះ ត្រូវតែនៅជារថយន្ដគិលានសង្គ្រោះ ដោយ​មិន​ត្រូវ​បាន​លើក​សម្ភារៈបរិក្ខានេះចេញ ដើម្បីយកទៅដឹកទឹកផ្លៃឈើ ឬទំនិញ ទៅដាក់ឲ្យម៉ូយ ក្នុងការ​ធ្វើ​អាជីវកម្ម​របៀប​ផ្សេង​នោះ​ឡើយ។

នៅចំពោះការរិះគន់នេះ លោក ហ៊ុន សែន បានពន្យល់ទទួលស្គាល់ ពីភាពត្រឹមត្រូវ នៃចំណាត់ការរបស់​មន្ទីរ​សុខាភិបាល​រាជធានី ទៅលើការបង្ក្រាប​បទល្មើស តែលោកហ៊ុន សែន បានបន្ទោសលោក សុខ សុគន្ធ ថា​មិន​បាន​ធ្វើ​តាម​នីតិវិធី ដោយត្រូវរាយការណ៍ សុំការដឹកនាំ និងសម្របសម្រួល‌ពីព្រះរាជអាជ្ញា ស្របតាមនីតិវិធី​ជា​ធរមាន។ លោកនាយរដ្ឋមន្ត្រីបានសរសេរថា៖ «ក្នុងកំណត់ហេតុឃាត់រថយន្ត លោកប្រធានមន្ទីរ បាន​ប្រើ​ប្រាស់​​តួនាទី ជាលេខាធិការដ្ឋាន​លប់បំបាត់​ឱសថក្លែងក្លាយ និងសេវាសុខាភិបាល​ឯកជនខុសច្បាប់ ហើយ​ប្រត្តិបត្តិការ ដោយកម្លាំងមន្ទីរសុខាភិបាលទាំងអស់ ដោយគ្មានការចូលរួម ពីនគរបាលឬអាវុធហត្ថ ឬស្ថាប័ន​អយ្យការ​នោះទេ។ បន្ថែមលើនោះ គឺគ្មានរបាយការណ៍មកថ្នាក់លើ ឬស្ថាបន័អយ្យការ ពាក់ពន្ធ័​បន្ទាប់​ពី​ការ​ឃាត់​​រថយន្ត​នោះ​ដែរ។»

បទល្មើស«ជាក់ស្ដែង»

ការអះអាងរបស់លោក ហ៊ុន សែន ខាងលើនេះ ត្រូវបានមន្ត្រីមួយរូប ពីលេខាធិការដ្ឋានលប់បំបាត់​ឱសថ​ក្លែង​ក្លាយ និងសេវាសុខាភិបាល​ឯកជនខុសច្បាប់ បរិហារថា វាគ្រាន់តែជាការស្វែងរកចាប់កំហុស ដើម្បី​បក​ស្រាយ​​ពី​ការ​ដកដំណែង លោក សុខ សុគន្ធ ពីសំណាក់នាយករដ្ឋមន្ត្រី តែប៉ុណ្ណោះ។ ថ្លែងប្រាប់ទស្សនាវដ្ដី ក្នុង​លក្ខខណ្ឌ​មិនបញ្ចេញឈ្មោះ មន្ត្រីរូបនោះបាននិយាយថា ការឃាត់រថយន្ដនោះ បានធ្វើឡើងនៅពេល​ដែល​រថយន្ដ​គិលាន​សង្គ្រោះ បាន​ប្រព្រឹត្តិ​បទល្មើស«ជាក់ស្ដែង» ដោយសាររថយន្ដនោះ​កំពុងដឹកទំនិញ ដែលមិន​មាន​ចុះ​បញ្ជី​ការ និងខុសពីបទដ្ឋានសុខាភិបាល។

មន្ត្រី​លេខាធិការដ្ឋាន បានថ្លែងឡើងថា៖ «នេះមិនចាំបាច់‌ដល់ទៅ​‌មន្ត្រី‌នគរបាល‌យុត្តិធម៌ (មន្ត្រីរបស់​លេខា​ធិការ​​ដ្ឋាន)​ ផង​ទេ ទើបអាចឃាត់រថយន្ដនោះបាន បើសូម្បីប្រជាជនសមញ្ញ ក៏អាចធ្វើបានដែរ ដោយ​គ្រាន់​តែ​ពលរដ្ឋ គាត់​គ្មាន​ជំនាញ ដើម្បីដឹងថា តើនេះជាបទល្មើសឬអត់ប៉ុណ្ណោះ។ ដូច្នេះ យើងអាចឃាត់រថយន្ដនោះ​បាន ដោយ​មិនចាំបាច់​រាយការណ៍​​ជា​មុន​ឡើយ»។

ចំពោះការលើកឡើងថា មន្ទីរមិនធ្វើរបាយការណ៍ឡើងទៅថ្នាក់លើ ត្រូវបានមន្ត្រីដដែល​សួរត្រឡប់ទៅវិញថា ចុះ​កំណត់ហេតុដែលលោក ហ៊ុន សែន យកមកអះអាងនេះ គឺជាអ្វី? លោកថា លេខាធិការដ្ឋានក៏កំពុង​ដោះ​​ស្រាយ ជា​មួយ​ភាគីវិទ្យុ ABC ពីករណីនេះជាបណ្ដើរៗ រាប់ចាប់តាំងពី ពីការឃាត់ខ្លួននោះមក។ តែផ្ទុយទៅវិញ គឺ​ភាគី​វិទ្យុ ABC ទៅវិញទេ ដែលបានបំផុសរឿងនេះឡើង តាមប្រព័ន្ធផ្សព្វផ្សាយរបស់ខ្លួន និងរាយការណ៍​ខុស​ការ​ពិត ប្រាប់​ទៅនាយករដ្ឋមន្ត្រី។

» សំណេរជូនដំណឹងមួយ របស់មន្ទីរសុខាភិបាលរាជធានី នៅថ្ងៃទី១១ ខែសីហា៖

មន្ត្រីសុខាភិបាលរូបនោះ បានបន្ត​បក​ស្រាយ​​ទៀតថា បើទោះជាប្រធានមន្ទីរសុខាភិបាលរាជធានី លោក សុខ សុគន្ធ បានប្រព្រឹត្តិកំហុស និងមាន​កង្វះ​ខាត​មួយចំនួនក្ដី តែមន្ត្រីនៅក្រោមមន្ទីរសុខាភិបាលរាជធានី និង​នៅ​ក្រោម​​​លេខា​ធិការ​ដ្ឋាន ពិតជា​បាន​ធ្វើ​ការងារ​របស់ខ្លួន ទៅតាមបទដ្ឋានច្បាប់ និងបទដ្ឋានសុខាភិបាល ដោយ​មាន​​លិខិត​​បញ្ជាក់ និងបញ្ជា​ត្រឹមត្រូវ​ពី​ថ្នាក់​លើ ជា​ពិសេស​ពី​ថ្នាក់​រដ្ឋមន្ត្រី។ ផ្ទុយទៅវិញ ការអនុវត្តភារកិច្ច​របស់​ខ្លួន​នេះ បែរ​ជា​ត្រូវ​បាន​ចាត់ទុកថា ខុស​​នីតិវិធី និងមិនបានរាយការណ៍ ទៅថ្នាក់លើ ដែលជាហេតុការណ៍មួយ គួរ ឲ្យ​មាន​ការ​អាក់អន់​ស្រពន់​ចិត្តជាទូទៅ នៅ​ក្នុង​ចំណោម​មន្ត្រី​រាជការ ក្រោមឱវាទមន្ទីរ។

យ៉ាងណា លោក ហ៊ុន សែន ដែលទំនងជាយល់​ដល់បញ្ហានេះ បានសរសេរ​«អង្អែល»​តបមកវិញ នៅក្នុង​ការ​បក​ស្រាយ​​របស់​លោក ទៀតថា៖ «ការដកតួនាទីលោកប្រធានមន្ទីរ មិនមានន័យថា យើង​បោះ​បង់​គាត់​ចោល​នោះ​ទេ យើង​អាច​តែង​តាំង​គាត់ ​ក្នុងមុខតំណែងសមស្របណាមួយ​ នាពេលខាងមុខ ទាំងនៅថ្នាក់ជាតិ និងថ្នាក់​ក្រោម​ជាតិ»។ ជាការ​ហុច​«ផ្កា»​មួយ​ទង ដែលកំពុងចេញ​ទៅ​ជា​​«ផ្លែ»​បណ្ដើរៗ ជូន​ទៅអតីតប្រធានមន្ទីរ ដោយ​ហេតុ​ថា​ដំណឹងថ្មី​មួយ ទើប​​នឹង​ធ្លាប់​មកដល់ ក្នុងពេលល្ងាចនេះ គឺលោក សុខ សុគន្ធ ទំនងជាត្រូវបាន​តែង​តាំង ឲ្យ​ក្លាយ​ជា​«អគ្គាធិការ​​រង នៃក្រសួងសុខាភិបាល»​ហើយ៕