នាព្រឹកថ្ងៃទី១០ ខែសីហា ឆ្នាំ២០១៥ នៅស្នាក់ការគណបក្សសង្គ្រោះជាតិ សង្កាត់ចាក់អង្រែលើ លោកសុខ ទូច និងមន្ត្រីមួយចំនួនទៀត មកពីរាជបណ្ឌិតសភា បានចុះហត្ថលេខា ព្រមទទួលយកផែនទីខ្មែរ ជាផ្ទាំង និងជា ឌីជីថល (ជាហ្វាល់កុំព្យូទ័រ) ពីគណបក្សនេះ។ ក្នុងការទទួលយកនេះ លោក សុខ ទូច ដែលជាប្រធាន​ក្រុម​ការងារ​ស្រាវជ្រាវ បញ្ហាព្រំដែន នៃរាជបណ្ឌិតសភាកម្ពុជា បានប្រកាសជាចំហរ ដល់ពលរដ្ឋខ្មែរទាំងមូលថា នឹង​អាចមិនគាំទ្រគណបក្សទាំងពីរ ក្នុងការបោះឆ្នោតអាណត្តិក្រោយ បើគណបក្សទាំងពីរនេះ នៅមិន​ឯកភាព​គ្នា ពីបញ្ហាព្រំដេនទៀត។

លោក សុខ ទូច បានថ្លែងបញ្ជាក់ថា៖ «ធ្វើតែមួយហ្នឹងហើយ (គណបក្ស) បានជាឈ្លោះគ្នា។ អញ្ចឹងបានជា​រាជបណ្ឌិត​សភា ដើរតួលើកយកផែនទី មកដាក់លើតុហ្នឹង។ បើមួយធ្វើ មួយមិនធ្វើ!!។ អីចឹងរឿងនេះ ប្រជាជន​បានដាក់សេចក្តីទុកចិត្ត ទៅឲ្យគណបក្សទាំងពីរ។ (...) ចង់ ឬមិនចង់ គណបក្សទាំងពីរ ត្រូវតែចូលខ្លួន​ដោះ​ស្រាយបញ្ហានេះ សម្រាប់ជាតិទៅថ្ងៃអនាគត។»

ការជជែក ជាមួយតំណាងរាជបណ្ឌិតសភាកម្ពុជា ក្នុងការដោះស្រាយបញ្ហារឿងព្រំដែននេះ ក៏ត្រូវបានលោក ឡុង រី តំណាងរាស្រ្តមកពីគណបក្សសង្គ្រោះជាតិ ទទួលស្គាល់ដែរ។ លោក ឡុង រី បានលើកឡើងថា លោក​ចង់បានការឯកភាព រវាងខ្មែរតែមួយ ឯកភាពលើផែនទីតែមួយ ដើម្បីឈានទៅរកដំណោះស្រាយជាតិ ដើម្បី​ឈាន ទៅរកការដោះស្រាយបញ្ហាព្រំដែន នៃប្រទេសជិតខាង។ លោក បានថ្លែងឲ្យដឹងថា៖ «គោលដៅរួម​របស់យើង គឺការដោះស្រាយបញ្ហាជាតិ មិនត្រូវខ្លាចនឹងការប្រឈម នូវឧបសគ្គតិចតួចនោះឡើយ។»

ទាក់ទងនឹងផែនទី ដែលប្រគល់ឲ្យក្រុមស្រាវជ្រាវ របស់រាជបណ្ឌិតសភា តំណាងដោយលោក សុខ ទូច នេះ ត្រូវបានលោក ហុង ស៊ុនហួរ សមាជិកព្រឹទ្ធសភា មកពីគណបក្សសមរង្ស៊ី បានលើកឡើងថា មាន២៦ផ្ទាំង និងរួមនឹងផែនទី ឌីជីថល DVD នោះផង។ លោក ស៊ុនហួរ ដែលជាមន្ត្រីខុទ្ទកាល័យលោក សម រង្ស៊ី បាន​ពន្យល់​ថា ផែនទីនោះជាផែនទី ដែលមានខ្នាត១/១០០ពាន់ ដែលបោះពុម្ភ ដោយក្រុមភូមិសាស្រ្តឥណ្ឌូចិន នៅ​ក្នុងអំឡុងឆ្នាំ១៩៣៣ -១៩៥៣ ប៉ុន្តែមិនត្រូវបាន ក្រុមការងាររបស់លោក អះអាងថា ជាផែនទី«ពិត»ឡើយ។

លោក សុខ ទូច បានបញ្ជាក់បន្ថែមទៀតថា បច្ចុប្បន្ននេះ ក្រុមស្រាវជ្រាវរបស់លោក ក៏បានទទួលនូវផែនទី ពី​អង្គការសហប្រជាជាតិចំនួន២០ផ្ទាំង ក្នុងនោះមាន ផែនទីពង្រីកចំនួន២ផ្ទាំង។ លោកបន្ថែមថា លោកក៏បាន​ទទយលផែនទីមួយចំនួន ពីរាជរដ្ឋាភិបាលចំនួន២៦ផ្ទាំង, ពីបណ្ណាល័យសហរដ្ឋអាមេរិក ២៦ផ្ទាំង, ពី​បណ្ណា​ល័យ​កូសាំងស៊ីន នៃប្រទេសបារាំង២៦ផ្ទាំង និងពីលោក ស៊ាង ប៉េងសែ ចំនួន១៤៩ផ្ទាំង។ លោកបន្តថា លោក​នៅតែទទួលយក ផែនទីពាក់ព័ន្ធនានា ពីបណ្តាពលរដ្ឋទាំងក្នុង និងក្រៅប្រទេស ដែលចង់ផ្តល់ផែនទី​ទាំង​នោះ មកក្រុមការងារលោក។

សូមបញ្ជាក់ថា ការប្រគល់ផែនទី របស់គណបក្សសង្គ្រោះជាតិ នៅពេលនេះ មានផែនទីដែលបានបោះពុម្ភ​លើ​ក្រដាស ជាគំរូចំនួន៣ផ្ទាំង ពាក់ព័ន្ធនឹងតំបន់ទាន់ហន់ ក្នុងខេត្តខេត្តកំពតមួយផ្ទាំង ពាក់ព័ន្ធនឹងស្រុក​កំពង់រោទិ៍ ខេត្តស្វាយរៀងមួយផ្ទាំង និងមួយផ្ទាំងទៀតពាក់ព័ន្ធនឹងឃុំជាំ ស្រុកមេមត់ ខេត្តត្បូងឃ្មុំ។ ក្រៅពីនោះ ជាផែនទី ឌីជីថល ស្ថិតក្នុង DVD ចំនួន២៦ផ្ទាំង៕