បើតាមអាជ្ញាធរកម្ពុជា លោក អាឡិចហ្សង់ដ្រូ ហ្គន់សាឡេស ដេវិតសិន (Alejandro Gonzalez Davidson) បានស្នាក់​នៅក្នុងប្រទេសកម្ពុជា ចំនួនបីថ្ងៃដោយ​ខុស​ច្បាប់ បន្ទាប់​ពីទិដ្ឋាការចុងក្រោយរបស់លោក បានអស់សុពលភាព កាល​ពីថ្ងៃទី២០ ខែកុម្ភៈ ឆ្នាំ២០១៥ កន្លង​មក និងបន្ទាប់ពីការសម្រេច របស់ក្រសួងមហាផ្ទៃកម្ពុជា មិនបន្តផ្ដល់ទិដ្ឋការ​«ឲ្យ»​សកម្មជនការពារបរិស្ថាន ជនជាតិអេស្ប៉ាញរូបនេះ។

ការចាប់ខ្លួនលោក អេឡិច នេះ បានធ្វើឡើងភ្លាមៗ បន្ទាប់ពីលោកនាយករដ្ឋមន្រ្តីកម្ពុជា បានបង្ហាញប្រតិកម្ម លើ​អង្គការសង្គមស៊ីវិល និងការរិះគន់ពីសាធារណៈមតិ ដែលថារដ្ឋភិបាលខ្លាចរអា និងមិនហ៊ានបន្តទិដ្ឋការ ទៅឲ្យលោក អាឡិច នៅកម្ពុជានោះ។

នៅក្នុងពិធីចែកសញ្ញាបត្រ ដល់និស្សិតសាកលវិទ្យាល័យជាតិគ្រប់គ្រង នាព្រឹកថ្ងៃទី២៣ ខែកុម្ភៈនេះ លោក ហ៊ុន សែន នាយករដ្ឋមន្រ្តីកម្ពុជា បាននិយាយថា កម្ពុជាជារដ្ឋមួយ មានអធិបតេយ្យភាពរបស់ខ្លួន មិនថាតែជនបរទេសទេ បើប្រជាពលរដ្ឋខ្មែរណា ដែលបំពានត្រូវតេមានទោសទាំងអស់។ ជាមួយគ្នានេះ លោកក៏បានលើកឡើងពាក់ព័ន្ធ ជាមួយនឹងការមិនចាកចេញ ពីប្រទេសកម្ពុជារបស់លោក អេឡិច ដូច្នេះថា «គេ(រដ្ឋាភិបាល)សុខចិត្តឲ្យនៅ រហូត​ដល់អស់ទិដ្ឋាការ។ (…) យើងចេញទៅសិនទៅ រួចហើយចាំសុំត្រឡប់មកវិញ វាទាស់ខុសអី។ (…) តែគេបណ្តេញ​ចេញហើយ វាត្រូវចូលក្នុងបញ្ជីខ្មៅ។ ចឹងវាចប់ហើយ។(…) មិនថាជនបរទេសបំពានទេ ជនជាតិខ្មែរបំពាន ក៏ត្រូវតែ​មានទោសដែរ។ (…) គ្មានបរទេសណា ស្រឡាញ់ខ្មែរជាងខ្មែរទេ។ (…) រឿងអស់ទាំងនេះ ត្រឹមតែរដ្ឋមន្រ្តីមហាផ្ទៃ ដោះស្រាយបានហើយ គេទៅរំខាន ដល់ព្រះមហាក្សត្រ(ឯ)ណោះ!»។

សូមបញ្ជាក់ដែរថា ស្របពេលនឹងការលើកឡើងខាងលើ របស់លោកនាយករដ្ឋមន្រ្តីនេះ ក្រសួងមហាផ្ទៃសេចក្តី​ប្រកាសមួយ សម្រេចបណ្តេញ លោក អេឡិច ចេញពីកម្ពុជា ក្នុងព្រឹកថ្ងៃដដែលនេះ។

មន្រ្តីនគរបាលនាយកដ្ឋាន អន្តោប្រវេសន៍មួយរូប ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ បានបញ្ជាក់​ក្នុង​ល័ក្ខខ័ណ្ឌមិនបញ្ចេញឈ្មោះថា មកដល់ម៉ោងនេះ នាយកដ្ឋានអន្តោប្រវេសន៍ កំពុងតែរៀបចំបែបបទ ដើម្បីបញ្ជូនខ្លួន​លោក អេឡិច ចេញពីកម្ពុជា។

លោក អេឡិច ធ្លាប់បានបញ្ជាក់ប្រាប់ទស្សនាវដ្តីមនោរម្យ.អាំងហ្វូ ថ្មីៗនេះថា លោកនឹងមិនចាកចេញពីកម្ពុជា ដោយ​ចិត្តឯងនោះទេ បើទោះជាទិដ្ឋការរបស់លោក ត្រូវផុតសុពលភាព ដោយការមិនបន្តឲ្យ ដោយរដ្ឋាភិបាលកម្ពុជា​ក៏​ដោយ។ លោកបានបង្ហាញថា លោកនឹងមានភាពរីករាយបំផុត នៅពេលលោកត្រូវបានកម្លាំងសមត្ថកិច្ចកម្ពុជា ចាប់​បញ្ជូនខ្លួនលោកចេញ ដោយមិនបានអនុវត្តតាមច្បាប់នានារបស់កម្ពុជា ពិសេសច្បាប់អន្តោប្រវេសន៍ ដែលត្រូវធ្វើ​ឡើង ចំពោះគ្រប់ជនជាតិទាំងអស់ ដែលមកស្នាក់នៅកម្ពុជានោះ។

សកម្មជនការពារព្រៃឈើកម្ពុជា នៅតំបន់អារ៉ែង ខេត្តកោះកុងរូបនេះ បាននិយាយថា៖ «កម្ពុជាមានច្បាប់ តែមន្រ្តី ឬរដ្ឋាភិបាលមិនដែលយកច្បាប់នោះ មកអនុវត្តឲ្យមានភាពស្មើគ្នា ចំពោះមុខច្បាប់ម្តងណាឡើយ។ (…) កម្ពុជាច្រើន​ប្រើប្រាស់ នូវអំណាចយោធា (ប៉ូលីស ទាហាន) មកប្រឆាំងនឹងបុគ្គលណា ដែលមិនស្របតាមខ្លួនជាដើម។»

លោក អំ សំអាត មន្រ្តីបច្ចេកទេសស៊ើបអង្កេតនៃអង្គការលីកាដូ ដែលស្ថិតក្នុងព្រឹត្តការណ៍ នៃការចាប់ខ្លួននោះ បាន​បង្ហាញនូវការសោកស្តាយចំពោះសកម្មភាព និងទង្វើរបស់មន្រ្តីរាជរដ្ឋាភិបាល ក្នុងការចាប់ខ្លួនលោក អេឡិច នេះ។ លោកបាននិយាយថា មិនសម្រាប់តែកម្ពុជាមួយនោះទេ ប្រទេសណា ក៏មានគោលការណ៍​អធិបតេយ្យ​ភាពរបស់​ខ្លួន​ដែរ។ តែអ្វីដែលសំខាន់នោះ នៅត្រង់ថា ការដឹកនាំរបស់ប្រទេសនោះ ស្របតាមច្បាប់ជាតិ និងច្បាប់អន្តរជាតិ​ដែរ​ឬ​ទេ? សម្រាប់លោកជាសង្គមស៊ីវិល លោកចង់ឲ្យរដ្ឋាភិបាលកម្ពុជា បន្តទិដ្ឋការដល់ជនបរទេសម្នាក់ ដែលបាន​ចូលរួម​យ៉ាងសកម្ម ក្នុងការការពារបរិដ្ឋាន និងព្រៃឈើកម្ពុជា ស្រមទៅតាមយុត្តិសាស្រ្តចតុកោណ របស់រដ្ឋាភិបាល ដែល​បានប្រកាសកន្លងមក។ លោកបន្តថា ផ្ទុយមកវិញ រដ្ឋាភិបាលកម្ពុជានាពេលនេះ ដែលមានចេតនា ក្នុងការ​បណ្តេញ​លោក អាឡិច ចេញពីកម្ពុជា កម្ពុជាខ្លួនឯង នឹងរងនូវការការរិះគន់ ពីអន្តរជាតិមិនខានឡើយ៕