លោក ប្រ៊ែដ អាដាម (Brad Adams) នាយកប្រតិបត្តិទទួលបន្ទុកកិច្ចការតំបន់អាស៊ី នៃអង្គការឃ្លាំមើល​សិទ្ធិ​មនុស្ស ហៅថា Human Rights Watch បានថ្លែងថា លោកស្នើសុំឲ្យប្រទេសកម្ពុជា បញ្ចប់នូវការទាញយក កងកម្លាំងប្រដាប់អាវុធឯករាជ្យរបស់ជាតិ ដាក់បញ្ចូលទៅក្នុងគណបក្សកាន់អំណាច ដើម្បីការពារនូវ​អំណាច​របស់​គណបក្សផ្ទាល់ខ្លួននោះ។ លោកបន្តថា កងកម្លាំងប្រដាប់អាវុធទាំងនោះ គួឈរនៅជាអព្យាក្រិត្យ និង​គោរពសិទ្ធិមនុស្ស ពិសេសមិនត្រូវនៅជាកម្មសិទ្ធិផ្តាច់មុខ របស់គណបក្សកាន់អំណាចនោះឡើយ។

ការថ្លែងរបស់លោក លោក ប្រ៊ែដ អាដាម (Brad Adams) បានធ្វើឡើង បន្ទាប់ពីគណបក្សប្រជាជនកម្ពុជា បានដាក់បញ្ចូលថ្នាក់ដឹកនាំយោធា កងរាជអាវុធហត្ថ និងប៉ូលិសប្រមាណ៨០នាក់ និងមន្ត្រីសន្តិសុខ​ផ្សេង​ទៀត ទៅក្នុងគណៈកម្មាធិការកណ្ដាល នៃគណបក្សកាន់អំណាចមួយនេះ ក្នុងសមាជវិសាមញ្ញនៃគណបក្ស កាលពីថ្ងៃទី១ ខែកុម្ភៈឆ្នាំ២០១៥។

នៅថ្ងៃទី៤ ខែកុម្ភៈនេះ ក្រុមអង្គការសង្គមស៊ីវិលមួយចំនួន ក៏បានផ្សាយចេញ នូវសេចក្តីថ្លែងការណ៍របស់ខ្លួន ធ្វើការរិះគន់ដល់ថ្នាក់ដឹកនាំ របស់គណបក្សកាន់អំណាច ដែលបានគាំទ្រ តំឡើងស័ក្ត និងបញ្ចូលថ្នាក់ដឹកនាំ នៃកងកម្លាំងប្រដាប់អាវុធ ឲ្យទទួលតួនាទីថ្មីក្នុងបក្សប្រជាជនកម្ពុជា។ ក្រុមអង្គការសង្គមស៊ីវិលទាំងនោះ បានសរសេរបន្តថា អ្នកទាំងនោះ សុទ្ធសឹងមានការពាក់ព័ន្ធ នឹងការរំលោភសិទ្ធិមនុស្ស។

មន្រ្តីកងកម្លាំងប្រដាប់អាវុធទាំងនោះ មានដូចជា លោក ទា វិញ មេបញ្ជាការកងទ័ពជើងទឹក - លោក ឈុំ សុជាតិ នាំពាក្យក្រសួងការពារជាតិ - លោក ស្រី ឌឹក មេបញ្ជាការប្រចាំភូមិភាគ៤តំបន់ប្រាសាទព្រះវិហារ - លោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិ - លោក ម៉ក់ ជីតូ អគ្គស្នងការរងនៃអគ្គស្នងការ​នគរបាលជាតិ - លោក ហ៊ីង ប៊ុនហៀង អគ្គមេបញ្ជាការរងកងយោធពលខេមរភូមិន្ទ - លោក រ័ត្ន ស្រ៊ាង អគ្គមេបញ្ជាការរងកងរាជអាវុធហត្ថលើផ្ទៃប្រទេស - លោក ជួន សុវណ្ណ អគ្គស្នងការរង និងជាស្នងការ​នគរបាល​រាជធានីភ្នំពេញ និងលោក ប៉ា សុជាតិវង្ស អភិបាលរាជធានីភ្នំពេញ។

ឯមន្ត្រីជាន់ខ្ពស់ដឹកនាំកងទ័ព កំពុងមានតួនាទី ក្នុងគណៈកម្មាធិការកណ្ដាល នៃគណបក្សប្រជាជន​កម្ពុជា​កន្លងមក មានដូចជា លោក ប៉ុល សារឿន អគ្គមេបញ្ជាការកងយោធពលខេមរភូមិន្ទ - លោក ទៀ បាញ់ រដ្ឋមន្ត្រីក្រសួងការពារជាតិ - លោក គន់ គីម និងលោក មាស សុភា អគ្គមេបញ្ជាការរងកងយោធពល​ខេមរ​ភូមិន្ទ និងលោក នេត សាវឿន អគ្គស្នងការនគរបាលជាតិ។

លោក ប្រ៊ែដ អាដាម បានធ្វើចំណាប់អារម្មណ៍ លើសមាជិកគណបក្សប្រជាជនកម្ពុជា ដែល​មានតួនាទី​ខ្ពស់ៗ​ថា តែងតែរួចខ្លួន ពីការរំលោភសិទ្ធិមនុស្ស និងបង្កឲ្យមាននីទណ្ឌភាពនៅកម្ពុជា។ ព្រះ​រាជ​អាជ្ញា និង​ចៅក្រមនៅកម្ពុជា ខ្លាចអំណាចរបស់មន្ត្រីជាន់ខ្ពស់គ្រប់គ្រងផ្នែកសន្តិសុខ។ ដូច្នេះវត្តមាននៃមន្ត្រីយោធា និង​ប៉ូលិសទាំងនោះ ចូលជាសមាជិកជាន់ខ្ពស់ ក្នុងគណបក្សប្រជាជនកម្ពុជា នាំឲ្យមន្ត្រីតុលាការកាន់តែ​មានការ​ភិតភ័យ និងខ្លាចកាន់តែខ្លាំង ក្នុងពេលបំពេញ មុខងារ ការងារ និងវិជ្ជាជីវៈរបស់ខ្លួន។

អង្គការឃ្លាំមើលសិទ្ធិមនុស្ស បានសរសេរថា៖ «ការរំលោភសិទ្ធិមនុស្សធ្ងន់ធ្ងរ។ (…) ការប្រើប្រាស់កម្លាំងហួស​ហេតុ ក្នុងការសម្លាប់បាតុករ ការបណ្តេញប្រជាពលរដ្ឋដោយបង្ខំ ពីលំនៅដ្ឋាន ការសម្លាប់ និងធ្វើឃាតបែប​នយោបាយ និងការធ្វើទារុណកម្ម ការបង្ខាំងមនុស្ស ការរំលោភ និងការជួញដូរមនុស្សជាដើម ពួកគេទទួល​ខុសត្រូវចំពោះប្រវត្តិសាស្រ្ត។ (…) ការកាន់តំណែងជាន់ខ្ពស់ ក្នុងគណបក្សកាន់អំណាចរបស់ប្រទេសកម្ពុជា គឺជាវិធីងាយស្រួល គេចវ៉េសពីយុត្តិធម៌ ក្រោយពីបានប្រព្រឹត្តការរំលោភសិទ្ធិមនុស្ស។»

ឆ្លើយតបនឹងការលើកឡើងខាងលើ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានចាត់ទុកថា ការដាក់កងកម្លាំងប្រដាប់អាវុធទាំងអស់ ក្នុងគណៈកម្មាធិការកណ្ដាលនៃគណបក្សប្រជាជនកម្ពុជានោះ មិន​ប៉ះពាល់ដល់អព្យាក្រឹតភាព របស់មន្ត្រីទាំងនោះទេ។ លោកបានបញ្ជាក់ តាមរយៈសារព័ត៌មាន​ក្នុង​ស្រុក​មួយ​ថា៖ «សំខាន់ពួកគាត់អនុវត្ត ទៅតាមតួនាទីរបស់គាត់ នៅក្នុងផ្លូវរដ្ឋ ការងាររដ្ឋ គាត់អត់ធ្វើការ ប្រលូកនឹង​កិច្ចការ​បក្សទេ។ (…) ខ្ញុំអាជ្ញាធរដែនដីដូចគ្នា ការងារបក្សជារឿងមួយផ្សេង ជារឿងផ្ទាល់ខ្លួ។ ប៉ុន្តែការងាររដ្ឋ ដែលបំពេញការផ្តល់សេវាសាធារណៈ និងផ្តល់ការងារសន្តិសុខ ធ្វើតាមតួនាទី។»

សម្រាប់លោក ឈាង វុន ដែលទើបនឹងជាប់ជាសមាជិកថ្មី ក្នុងគណៈកម្មាធិការកណ្តាល នៃគណបក្ស​ប្រជាជន​កម្ពុជានោះ ក៏យល់ដែរថា ការបញ្ចូលបញ្ជាការកងកម្លាំងប្រដាប់អាវុធ ទៅក្នុងគណបក្សនោះគ្មាន​អ្វី​ខុសទេ ព្រោះលោកយល់ថា កងកម្លាំងប្រដាប់អាវុធទាំងនោះ មានសិទ្ធិចូលរួមក្នុងរឿងនយោបាយ។

យោងតាមច្បាប់ស្ដី ពីគណបក្សនយោបាយនៅកម្ពុជា មាត្រា១៥ វាក្យខណ្ឌទីពីរ បានចែងថា៖ «បុព្វជិត មន្រ្តី​តុលាការ កងយោធពលខេមរភូមិន្ទ និងកងកម្លាំងនគរបាលជាតិ អាចចូលជាសមាជិកគណបក្សនយោបាយ​នានាបាន តែមិនត្រូវធ្វើសកម្មភាពគាំទ្រ ប្រឆាំងនឹងគណបក្សនយោបាយណាមួយឡើយ។ គណបក្ស​នយោបាយ មិនត្រូវរៀបចំរចនាសម្ព័ន្ធចាត់តាំង ក្នុងស្ថាប័ន សាសនា តុលាការ កងយោធពលខេមរភូមិន្ទ និង​កង​ក​ម្លាំង​នគរបាលជាតិទេ។»

សូមរំលឹកថា ក្នុងមហាសន្និបាទគណបក្សប្រជាជនកម្ពុជាកាលពីថ្ងៃទី០១ខែកុម្ភៈ ឆ្នាំ២០១៥នេះ សមាជិកថ្មី​ប្រមាណ៣០៦រូប បានបញ្ចូលទៅក្នុងគណៈកម្មាធិការកណ្តាល នៃគណបក្សប្រជាជនកម្ពុជា ក្នុងនោះរួម​មាន​ទាំងកូនៗ របស់លោកនាយករដ្ឋមន្ត្រី ហ៊ុន សែន ផងដែរ។ ជាសរុប គណៈកម្មាធិការកណ្ដាលនេះ មានសមាជិក​ចំនួន៥៤៥នាក់ ក្នុងនោះ​មានយ៉ាងតិចណាស់ ១១៦នាក់ មានតួនាទីនៅក្នុងកងកម្លាំងប្រដាប់អាវុធ និងគ្រប់គ្រង​សន្តិសុខជាតិ បើគេរាប់ទាំងថ្មីទាំងចាស់។

អង្គការឃ្លាំមើលសិទ្ធិមនុស្ស បានបន្ថែមថា អង្គភាពជាច្រើនដែលគ្រប់គ្រង ដោយសមាជិកនៃគណៈ​កម្មាធិការ​កណ្ដាល របស់គណបក្សប្រជាជនកម្ពុជានេះ ធ្លាប់មានប្រវត្តិរំលោភសិទ្ធិមនុស្ស ការបាញ់​សម្លាប់​បាតុករ បង្ខំបណ្ដេញពលរដ្ឋចេញពីផ្ទះសម្បែង ឃាតកម្មនយោបាយ ធ្វើទារុណកម្ម ការចាប់ឃុំខ្លួន​យ៉ាង​អនាធិបតេយ្យ រំលោភសិទ្ធិមនុស្ស និងរត់ពន្ធមនុស្ស។ អង្គការនេះ ស្នើឲ្យប្រទេសជាម្ចាស់ជំនួយរបស់កម្ពុជា ជំរុញឲ្យប្រទេសនេះបញ្ឈប់ ការធ្វើការតែងតាំងកងកម្លាំងប្រដាប់អាវុធទាំងអស់ នៅក្នុងគណបក្ស​នយោបាយ៕