បុរសម្នាក់ជាជនស៊ីវិល ដែលគេនៅមិនទាន់ស្គាល់ អត្តសញ្ញាណនៅឡើយ ត្រូវបានបាញ់ស្លាប់ និងភ្នាក់ងារ​នគរបាលបីនាក់ទៀត ដែលទទួលបន្ទុកការពារតំបន់នោះ បានរងរបួស។ នេះបើតាមផ្សាយឲ្យដឹង ពីកង​កម្លាំងនគរបាល នៃប្រទេសដាណឺម៉ាក។ តុល្យភាពដំបូងនេះ ត្រូវបានផ្សាយឲ្យដឹង បន្ទាប់ពីការផ្ទុះ​អាវុធ​ប្រមាណជា២០០គ្រាប់ ត្រូវបានគេស្ដាប់ឮនៅខាងក្រៅអាគារមួយ ដែលជាមជ្ឈមណ្ឌលវប្បធម៌ កណ្ដាល​រាជធានី​កូផេនអាក ប្រទេសដាណឺម៉ាក កាលពីរសៀលថ្ងៃសៅរ៍ ទី១៤ ខែកុម្ភៈនេះ។ អាគារនោះ ជាទីកន្លែង​ដែលជំនួបមួយ ត្រូវបានរៀបចំធ្វើ ដើម្បីជជែកអំពី«អ៊ីស្លាមនិយម» និងសិទ្ធិសេរីភាពនៃការបញ្ចេញមតិ។

នគរបាលបានឲ្យដឹងទៀតថា បុរសពីរនាក់ជាខ្មាន់កាំភ្លើង និងជិះនៅក្នុងរថយន្ដមួយគ្រឿង កំពុងត្រូវ​បាន​អាជ្ញាធរដាណឺម៉ាក តាមស្វែងរកចាប់ខ្លួន។ ជនទាំងពីរពាក់មុខបិទជិត បានជិះរថយន្ដធុនតូច យីហោ វុលវ៉ាហ្គ័ន ប៉ូឡូ (volkswagen polo) ដែលគេស្គាល់ស្លាកលេខច្បាស់។

នៅក្នុងជំនួបនោះ ឯកអគ្គរដ្ឋទូតបារាំង ប្រចាំប្រទេសដាណឺម៉ាក និងវិចិត្រករជាតិដាណឺម៉ាក លោក ឡាក វិល្ក៍ (Lars Vilk) ដែលធ្លាប់បានគូររូបសាវ័កមហាមេដ របស់សាសនាអ៊ីស្លាម បានចូលរួម និងមានវត្តមាន​នៅ​ក្នុង​ជំនួបនោះ។ នេះ បើតាមសេចក្ដីរាយការណ៍ របស់ប្រព័ន្ធផ្សព្វផ្សាយដាណឺម៉ាក។ ប៉ុន្តែអ្នកទាំងពីរ មិនមានជួប​គ្រោះថ្នាក់អ្វីទេ។

ឯកអគ្គរដ្ឋទូតបារាំង លោក ហ្វ្រង់ស៊័រ ហ្សីមរ៉េ (François Zimeray) ក៏បានសរសេរនៅក្នុងទំព័រទ្វីសធើរ (Twitter) របស់លោកដែរថា លោកនៅមានជីវិតធម្មតា។ លោកបានថ្លែងប្រាប់ ទីភ្នាក់ងារសារព័ត៌មានបារាំង AFP ថា៖ «ពួកវាបានបាញ់យើងយ៉ាងសន្ធាប់ ពីខាងក្រៅមក។ វាមានបំណងដូចទៅនឹងព្រឹត្តិការណ៍បាញ់​ប្រហារ នៅការិយាល័យទស្សនាវដ្ដី Charlie Hebdo កណ្ដាលរដ្ឋធានីប៉ារីសអញ្ចឹង តែពួកវាចូលមកក្នុងអាគារ មិនបាន។»

លោកបានបន្ថែមទៀតថា «បើតាមស្ដាប់ឮ ការផ្ទុះកាំភ្លើងនេះ មានប្រមាណជា៥០គ្រាប់។ តែនគរបាល​និយាយ​ប្រាប់យើងថា មានចំនួនជាង២០០គ្រាប់។ គ្រាប់ទាំងនោះបានបាញ់ទម្លុះទ្វាកញ្ចក់ ហើយមនុស្ស​គ្រប់​គ្នា បានក្រាបជាប់នឹងដី។»៕