សម្រែក​អ្នក​ស្រែក​ឃ្លាន​យុត្តិធម៌ នឹង​«ឈ្នះ»​អំពើ​អយុត្តិធម៌?

«យុត្តិធម៌» និងឈ្នះអំពើ«អយុត្តិធម៌» ការសម្រែកដែលស្រែកឡើងព្រមៗគ្នា ក្នុងពិធីជួបជុំបែបសាសនាមួយ ដើម្បី​គោរព​វិញ្ញាណក្ខន្ធលោក ជា វិជ្ជា ដែលបានស្លាប់១១ឆ្នាំ ដោយអយុត្តិធម៌នោះ។ សម្រែកងរំពងរបស់អ្នកគាំទ្រលោក ជា វិជ្ជា នេះ ក្នុងគោលបំណងស្វែងរកយុត្តិធម៌ តាមរយៈការចាប់ឃាតករពិត មកផ្តន្ទាទោស។
Loading...
  • ដោយ: អ៊ុម វ៉ារី អត្ថបទ ៖ អ៊ុម វ៉ារី ([email protected]) - យកការណ៍៖ហេង វុទ្ធី -ភ្នំពេញថ្ងៃទី២២ មករា ២០១៥
  • កែប្រែចុងក្រោយ: January 23, 2015
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

ដើម្បី​«បំបាត់​វប្បធម៌​និទណ្ឌភាព និង​ពង្រឹង​យុត្តិធម៌​នៅ​កម្ពុជា» ក្រុម​អ្នក​ចូល​រួម​គោរព​វិញ្ញាណក្ខន្ធ លោក ជា វិជ្ជា នា​ព្រឹក​ថ្ងៃ​ទី​២២ ខែ​មករា ឆ្នាំ​២០១៥ នេះ បាន​ទាមទារ​ឲ្យ​ស្វែង​រក​យុត្តិធម៌ និង​ធ្វើការ​អំពាវ​នាវ​ដល់​តុលាការ ឲ្យ​វែក​រក​មុខ​ឃាតក​«ពិត​ប្រាកដ» ដែល​បាន​បាញ់​សម្លាប់​លោក ជា វិជ្ជា ជា​មួយ​អ្នក​បញ្ជា​ពី​ក្រោយ​ខ្នង មក​ផ្ដន្ទាទោស​តាម​ច្បាប់​ជា​កំហិត។ អ្នក​ចូលរួម ដែល​ក្រៅ​ពី​ក្រុម​កម្មករ និង​ក្រុម​សមាជិក​សហជីព​សេរី​កម្មករ នៃ​ព្រះ​រាជាណាចក្រ​កម្ពុជា នៅ​មាន​មន្ត្រី​គណបក្ស​សង្គ្រោះ​ជាតិ និង​មេ​ដឹកនាំ ដូច​ជា​លោក កឹម សុខា លោក សម រង្ស៊ី ព្រម​ទាំង​លោក ម៉ម សូណង់ដូ ប្រធាន​វិទ្យុ​សំបុក​ឃ្មុំ​នោះ​ផង។

លោក រ៉ុង ឈុន ដែល​ធ្លាប់​ជា​ក្លើ​ជិត​ដិត​របស់​លោក ជា វិជ្ជា បាន​ថ្លែង​ឡើង​ថា៖ «ទោះ​បី​ជា​មាន​ការ​គំរាម​យ៉ាង​ណា ក៏​ខ្ញុំ​មិន​ចេញ​ទៅ​រស់​នៅ​ប្រទេស​ខាង​ក្រៅ​ដែរ។ (…) ខ្ញុំ​នឹង​ធ្វើ​ជា​គំរូ​ល្អ​សម្រាប់​ពលរដ្ឋ​ខ្មែរ ជា​ពិសេស​យុវជន​ខ្មែរ​នៅ​កម្ពុជា។ (…) ក្នុង​នាម​ជា​មិត្ត​ភក្តិ ខ្ញុំ​សូម​ឲ្យ​អាជ្ញាធរ​កម្ពុជា ត្រូវ​តែ​ស្វែង​រក​ឃាតករ​ពិត និង​អ្នក​នៅ​ពី​ក្រោយ​ខ្នង យក​មក​ផ្តន្ទា​ទោស​តាម​ច្បាប់ ដើម្បី​ផ្ដល់​យុត្តិធម៌​ជូន​លោក ជា វិជ្ជា។»

ប្រធានគណបក្សសង្គ្រោះជាតិ លោក សម រង្ស៊ី ក្នុងឱកាសនេះ បានថ្លែងឡើងថា៖ «យើងមិនអាចបំភ្លេច​ភាព​ឃោរឃៅ ភាពអមនុស្សធម៌មកលើជនរងគ្រោះស្លូតត្រង់បានទេ។ (…) យើងត្រូវតែជំរុញឲ្យមានការ​ស៊ើប​អង្កេត ឲ្យមានការចាត់ការ ពីសំណាក់តុលាការដោយឯករាជ្យនៅថ្ងៃណាមួយ ដើម្បីផ្ដល់យុត្តិធម៌ជូនរងគ្រោះ និងវែកមុខអ្នកបញ្ជានៅពីក្រោយ។»

លោក ជា មុន្នី ដែលត្រូវជាប្អូនប្រុសបង្កើតរបស់លោក ជា វិជ្ជា និងជាប្រធានសហជីពសេរីកម្មករនៃ​ព្រះរាជា​ណាចក្រកម្ពុជា បានថ្លែងបញ្ជាក់ថា កាលពីថ្ងៃទី២៨ ខែមករា ឆ្នាំ២០១៤កន្លងទៅ តំណាងអយ្យការអម​សាលា​ដំបូងរាជធានីភ្នំពេញលោក សុខ រឿន បានស្នើឲ្យអគ្គស្នងការនគរបាលជាតិ និងសមត្ថកិច្ច​ធ្វើការ​ស្រាវជ្រាវស៊ើបអង្កេត កំណត់អត្តសញ្ញាណជនប្រព្រឹត្តបទល្មើស។ មកទល់ពេលនេះ ជិតមួយឆ្នាំហើយ ស្ថាប័ន​ពាក់ព័ន្ធរបស់រដ្ឋាភិបាល មិនទាន់បង្ហាញពីការធ្វើការស្រាវ របស់ខ្លួន ដើម្បីវែកមុខ និងកំណត់​អត្ត​សញ្ញាណឃាតករ និងអ្នកនៅពីក្រោយឡើយ។

ទស្សនាវដ្តីមិនអាចសំការបញ្ជាក់ពីលោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី បានទេនារសៀល​នេះ ដោយទូរស័ព្ទរបស់លោកមិនអាចភ្ជាប់ទំនាក់ទំនងបាន។ តែលោកបាន បានបកស្រាយតាម​សាព័ត៌មាន​ដើមអំពិលថា រដ្ឋាភិបាលបានកំពុងដំណើការនីតិវិធីលើសំណុំរឿងលោក ជា វិជ្ជា ដោយ«ចំហរ»។ យ៉ាងណា លោកបានបន្ថែមថា សំណុំរឿងនេះជាសមត្ថកិច្ចរបស់តុលាការសុទ្ធសាធ។

រីឯលោក ម៉ម សូណង់ដូ ប្រធានវិទ្យុសម្បុកឃ្មុំបានថ្លែងយ៉ាងខ្លីថា ថ្វីត្បិតតែលោក ជា វិជ្ជា បានស្លាប់បង់ជីវិត អស់រយៈជាយូរណាស់មកហើយក៍ដោយ ប៉ុន្តែលោកតែងតែស្ថិតនៅក្នុងបេះដូងប្រជាពលរដ្ឋខ្មែរជាង ១៤​លាននាក់ដដែលរហូតមកដល់សព្វថ្ងៃនេះ ព្រោះលោកគឺជាវិរៈបុរស ដែលបានជួយដឹកនាំកម្មករខ្មែរ​ឲ្យចេះ​ ប្រើប្រាស់សិទ្ធិសេរីភាពក្នុងការបញ្ចេញមតិ ដើម្បីទាមទារឲ្យមានការដំឡើងប្រាក់បៀវត្សរបស់ខ្លួន៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...