កម្មករអូសរទេះបិទផ្លូវជាតិលេខ៥ ព្រោះគ្មានតំណាងគយចេញមុខដោះស្រាយ
- ដោយ: ក. សោភណ្ឌ អត្ថបទ៖ ក.សោភ័ណ្ឌ ([email protected]) - យកការណ៍៖ ហេង វុទ្ធី - ភ្នំពេញថ្ងៃទី២២ មករា ២០១៥
- កែប្រែចុងក្រោយ: January 22, 2015
- ប្រធានបទ: បាតុកម្ម
- អត្ថបទ: មានបញ្ហា?
- មតិ-យោបល់
-
នៅតែមានរឿងកើតឡើង មិនចេះចប់រវាងក្រុមតំណាងឲ្យអាជ្ញាធរជាតិ និងអ្នកក្រក្សត់ ដែលស្ទើរតែគ្មានអ្វីសម្រាប់ទទួលទានប្រចាំថ្ងៃ។ មានត្រឹមមុខរបរចិញ្ចិមជីវិតដ៏តូចតាច ទោះជាលីសែងរែកពន់ប៉ុន្មាន ក៏គ្មានការនឿយហត់ តែអ្វីដែលកម្មករអូសរទេះទាំងនោះទ្រាំមិនបាននោះ គឺការបង្ខំចាប់ឲ្យបង់ពន្ធយ៉ាងសកម្ម និងហួសសមត្ថភាព ពីសំណាក់«គយ»ដែលប្រចាំការ នៅច្រកព្រំដែនប៉ោយប៉ែតត្រង់ចំណុចផ្សាររ៉ា ស្ថិតនៅភូមិប៉ោយប៉ែត សង្កាត់ប៉ោយប៉ែត ខេត្តបន្ទាយមានជ័យ។
ប្រភពព័ត៌មាននៅនឹងកន្លែងបានឲ្យដឹងថា ការធ្វើបាតុកម្មដែលឈានដល់បិទផ្លូវជាតិលេខប្រាំនេះ ចាប់ផ្តើមនៅម៉ោង៩ព្រឹកថ្ងៃទី២២ ខែមករា ឆ្នាំ២០១៥ នៅចំណុចផ្សាររ៉ាថ្មី ពីមុខទីស្នាក់ការគយប៉ោយប៉ែត។ ការធ្វើបាតុកម្មនេះ នៅមិនទាន់មានតំណាងភាគីគយណាមួយ ចេញមកដោះស្រាយនៅឡើយក្នុងពេលភ្លាមៗនោះ។ ការទាមទារ ដែលគា្មនអ្នកចូលមកដោះស្រាយនេះ នៅមិនទាន់មានការរំសាយនៅឡើយ មកទល់នឹងរសៀលថ្ងៃដដែល។
តំណាងកម្មករអូសរទេះលោក សឿង សុភឿន បានិយាយប្រាប់ទស្សនាវដ្ដីមនោរម្យ.អាំងហ្វូថា ក្រុមកម្មករអូសរទេះទាំងអស់ប្រមាណជា១០០នាក់ នៅកំពុងធ្វើការតវាបិទផ្លូវជាតិលេខប្រាំ ពីមុខទីស្នាក់កាគយ មិនទាន់មានការដោះស្រាយពីតំណាងគយនោះទេ។ តំណាងកម្មកររូបនេះ បានបន្តទៀតថា ពួកគាត់នឹងមិនបើកផ្លូវនោះទេ បើសិនជាមន្ត្រីគយ នៅតែព្រងើយកន្តើយ មិនចេញមុខមកដោះស្រាយទៀតនោះ។ លោកថា ចំពោះបញ្ហានេះ ចៅហ្វាយខេត្តបានមកនិយាយឲ្យក្រុមកម្មករបើកផ្លូវវិញ តែក្រុមកម្មថាលើកណា ក៏មកនិយាយបែបនេះជាមួយពួកគាត់ដែរ តែមិនមានដំណោះស្រាយណាមួយសមរម្យនោះទេ។
នៅពេលកំពុងធ្វើបាតុកម្មនោះដែរ អ្នកស្រី ចាន់ ណា បានប្រាប់ទស្សនាវដ្ដីតាមទូរស័ព្ទថា ក្រុមកម្មករទាំងអស់នៅតែពង្រឹងជំហរមិនបើកផ្លូវដដែល ភ្លាមៗនោះ មានកងកម្លាំងសម្ថកិច្ចបានបើកឡានទឹកបម្រុងនឹងបាញ់ទៅលើកម្មករទាំងអស់ តែបន្តិចក្រោមមកក៏មានការស្ងប់ស្ងាត់ទៅវិញ។ ស្ត្រីអ្នកអូសរទេះរូបនេះ បានបញ្ជាក់ថា លោក ឈួន ហៃ មេគយច្រកប៉ោយប៉ែត មិនព្រមចេញមុខមកដោះស្រាយ ជាមួយកម្មករទេ ដោយព្យាយាមគេច។ ស្រ្តីខាងលើបញ្ជាក់ថា បើគ្មានការជួបចរចារជាក់លាក់ទេ នោះពួកគាត់មិនបើកផ្លូវវិញទេ។ បញ្ហារបស់កម្មករគ្រប់គ្នា ជាបញ្ហាជីវិត។ ដូច្នេះ មិនគួរណា មន្ត្រីគយមិនអើពើបែបនេះសោះ។
ចំពោះការចោទប្រកាន់មន្រ្តីគយខាងលើ ថាបានព្យាយាមគេចពីពលរដ្ឋអ្នកអូសរទេះ ជារឿពិតឬយ៉ាងណានោះទេ ដោយទស្សនាវដ្ដីបានទាក់ទងទៅលោក ឈួន ហៃ ប្រធានច្រកប៉ោយប៉ែតខាងលើ តែទូរស័ព្ទរបស់លោកមិនមានអ្នកទទួលទេ រហូតមកដល់ថ្ងៃត្រង់នេះ៕