ក្រោយពី អយ្យការអមសាលាដំបូងរាជធានីភ្នំពេញ បានប្រកាសសាលក្រម ឲ្យដោះលែងអ្នកទាំង២៣នាក់​ឲ្យមាន​សេរីភាពវិញ មន្រ្តីសង្គមស៊ីវិល និងក្រុមមេធាវីការពារក្តីឱ្យជនជាប់ទាំង២១នាក់ បានលើកឡើងថា មានចំនុច​តិច​តួចណាស់ដែលអាចទទួលយកបាន ពីការសម្រេចសេចក្តីទៅសំណុំរឿងនេះ ហើយក្រុមមេធាវី​នឹងពិភាក្សាជាមួយ​កូនក្តី ដើម្បីបន្តបណ្ដឹងទាស់ទៅសាលាឧទ្ធរណ៍។

លោក វ៉ន ពៅ ប្រធានសមាគមន៍​សេដ្ឋកិច្ចក្រៅប្រព័ន្ធនៅកម្ពុជា នៅក្នុងការតវ៉ារបស់លោក ជាមួយកម្មករ នៅមុខការចាប់ខ្លួន។ (រូបថត ហ្វេសប៊ុក)

ប្រព័ន្ធយុត្តិធម៌ - ប្រធានផ្នែកបច្ចេកទេសនៃអង្គការសិទ្ធមនុស្សលីកាដូ លោកអំ សំអាត បានលើកឡើងថា លោក​អបអរសារទរចំពោះការប្រកាសសាលក្រមនេះ ដោយបានកាត់តម្រឹមទោសជនទាំង២៣នាក់ និងមានការដោះលែង​នៅថ្ងៃទី៣០ ខែឧសភានេះ ប៉ុន្តែទន្ទឹមនឹងការដោះលែងនេះ លោកក៏ដូចជាក្រុមមេធាវីការពារក្តី ឱ្យជនជាប់ចោទ មានការសោកស្តាយនឹងការសម្រេចរបស់ចៅក្រម សាលាដំបូងរាជធានីភ្នំពេញនេះ។ សោកស្តាយដោយសារ​តែអ្នក​ទាំងនោះ ត្រូវបានគេផ្តន្ទាទោស និងត្រូវបានកាត់ ដោយម្នាក់ៗជាប់ទោសពី២ឆ្នាំកន្លះ ទៅដល់៤ឆ្នាំកន្លះ។

លោកបន្តថា៖ «អញ្ចឹង យើងមានការសោកស្តាយដោយសារមនុស្សមិនមានកំហុស ហើយត្រូវបានមានទោស​កំហុស ជាប់ពន្ធនាគារកន្លងមក ធ្វើឱ្យមានបញ្ហាទៅដល់ជីវភាពគ្រួសាររបស់ពួកគាត់ ក្នុងអំឡុងពេលជាប់ពន្ធនាគារ ហើយគាត់នៅតែមានឈ្មោះថា ជាអ្នកជាប់ពន្ធធានារត្រួវបានតុលាការកាត់ទោសដដែល»។

ចំណែកលោក សំ សុគង់ និងលោក គង់ ពិសី មេធាវីការពារក្តីឱ្យលោក វន់ ពៅ បានឱ្យដឹងដែរថា បានក្រុមមេធាវី​មិនពេញចិត្តនឹងសេចក្តីសម្រេចនេះទេ។ ក្រុមមេធាវីនឹងមានបំណងប្តឹង ទៅសាលាឧទ្ធរណ៍បន្តទៀត បន្ទាប់ពី​ពិភាក្សា​ជាមួយកូនក្តីរួច ដើម្បីបញ្ជាក់ថាអ្នកទាំង២៣នាក់ មិនបានប្រព្រឹត្តអ្វីដូចដែលការចោទប្រកាន់នោះទេ និង​ទាមទារនូវភាពយុត្តិធម៌សម្រាប់ពួកគាត់មកវិញ។

លោក សំ សុគង់ ថ្លែងបន្តយ៉ាងដូច្នេះថា៖ «ទាក់ទងនឹងសេចក្តីសម្រេចនេះ ក្រុមមេធាវីនៅមិនទាន់ អាចទទួលយក​បាននៅឡើយទាំងស្រុងទេ ដោយសារទាក់ទងនឹងការកំណត់ពីទោសគាត់ហ្នឹង គឺគេដាក់ទោសពី៣ឆ្នាំទៅដល់៤ឆ្នាំ ហើយបើយើងប្រៀបធៀបសវនាការកន្លងមកហ្នឹង មិនមានការបង្ហាញណាមួយថា គាត់ហ្នឹងបានប្រព្រឹត្ត ឬក៏មាន​កំហុស ក្នុងការចោទប្រកាន់នោះទេ»។

បន្ទាប់ពីបញ្ចប់ការប្រកាសសាលក្រមចប់ជាស្ថាពរ នៅម៉ោងប្រហែល១១ និង៣០នាទីនេះ ជនជាប់ចោទទាំង២១ ដែល​បានចាប់ខ្លួននៅរោងចក្រយ៉ាកជិន និងនៅសួនកាដាឌីយ៉ាលើផ្លូវវ៉េងស្រេង កាលពីដើមខែមករា ឆ្នាំ២០១៤ និងជនជាប់ចោទ២នាក់ទៀត ដែលបានចាប់ខ្លួនកាលពីថ្ងៃទី១២ ខែវិច្ឆិកា ឆ្នាំ២០១៣ ក្នុងព្រឹត្តិការណ៍ផ្ទុះអំពើ​ហិង្សា​នៅស្ទឹងមានជ័យ ត្រូវបានដោះលែងពីពន្ធនាគារព្រៃសវិញហើយ៕