អាស៊ីអាគ្នេយ៍កំពុងចាំ លោកប្រធានាធិបតី អូបាម៉ា ជាប់ឆ្នោតសារជាថ្មី
ជំនួបកំពូល របស់សមាគម ប្រជាជាតិអាស៊ី-អាគ្នេយ៍ ដែលគ្រោងធ្វើពីថ្ងៃទី១៨ ដល់ថ្ងៃទី២១ វិច្ឆិកា នៅកម្ពុជា នឹងត្រូវគេរំពឹងថា នឹងរងចាំងដំណើរមកចូលរួម របស់លោកប្រធានាធិបតីអាមេរិក ជាប់ឆ្នោតសារជាថ្មី លោកបារ៉ាក់ អូបាម៉ា។
លោកបារ៉ាក់ អូបាម៉ា និងគ្រួសាររបស់លោក ក្នុងសាលជួបប្រជុំដ៏ធំ នៅទីក្រុងឈីកាហ្គោ ពេលបានជាប់ឆ្នោតជាថ្មី។
សំរាប់ដំណើរទស្សកិច្ច ទៅក្រៅប្រទេសជាលើកដំបូង បន្ទាប់ពីបានជាប់ឆ្នោតសារជាថ្មី លោកប្រធានាធិបតីបារ៉ាក់ អូបាម៉ា នឹងត្រូវធ្វើដំណើរទៅ តំបន់ អាស៊ីប៉ែកអាគ្នេយ៍ ពោលគឺទៅកាន់រាជធានីភ្នំពេញ រាជធានីនៃប្រទេសកម្ពុជា ដើម្បីចូលរួមក្នុងជំនួបកំពូល របស់អាស៊ាន និងជំនួបកំពូលមួយទៀត ជាមួយនឹងប្រទេសមកពីតំបន់អាស៊ីខាងកើត ចាប់ពីថ្ងៃទី ១៨ ដល់ថ្ងៃទី ២១វិច្ឆិកាខាងមុខ។ ដំណើរទស្សនកិច្ចនេះ បានបញ្ជាក់រួចហើយ ហើយក៏ជាការទន្ទឹងរងចាំប្រកបដោយក្ដីសង្ឃឹមរបស់ ប្រជាពលរដ្ឋជនរងគ្រោះកម្ពុជា ដោយសារជម្លោះដីធ្លី ផ្ទះសម្បែង ក្នុងប្រទេសនេះ ដែលចេះតែរីកធំឡើងតាំងពីជាង ១០ឆ្នាំមកហើយនោះដែរ។
បណ្ដាជនរងគ្រោះកម្ពុជា ប្រមាណជា១០០នាក់ បានដាក់ញាតិមួយ ទៅកាន់ស្ថានទូតរបស់សហរដ្ឋអាមេរិក ប្រចាំនៅរាជធានីភ្នំពេញ កាលពីថ្ងៃទី៤វិច្ឆិកា ស្នើសុំអោយលោកប្រធានាធិបតី អូបាម៉ា លើក«យកមកជជែក នូវបញ្ហាដីធ្លី និងកំណែទម្រង់ នៃនយោបាយសម្បទានដីធី»។ នេះជារបាយការណ៍មួយ សរសេរដោយ កាសែតប្រចាំថ្ងៃនៅក្នុងស្រុក ជាភាសាអង់គ្លេស ឌឺ ខេមបូឌៀ ដេលី។ កាសែតបានបន្ថែមថា «ការទាមទារនេះ បានធ្លាក់មក នៅក្រោយពេលដែល សេចក្ដីសម្រេចរបស់ សភាអ៊ឺរ៉ុប កាលពីខែមុន បានចោទប្រកាន់ទៅលើ កិច្ចសម្បទានសេដ្ឋកិច្ច នៃដីធ្លី ផ្ដល់ទៅអោយ ឧស្សាហកម្មតាមបែបចំណីអាហារ ថាបានបង្ខំបណ្ដាជនកម្ពុជា ប្រមាណជា ៤០០ ០០០គ្រួសារ អោយចេញពីដីធ្លីផ្ទះសម្បែងរបស់ពួកគេ នៅក្នុងរយះពេលដប់ឆ្នាំចុងក្រោយនេះ។»
នាយកទស្សនាវដ្ដីមួយរបស់ភូមា ឈ្មោះ ឌឺ អ៊ៀរ៉ាវ៉ាឌី (The Irrawaddy) គឺលោក អ៊ុង ស៊ាវ (Aung Zaw) បាននិយាយអោយដឹងថា លោកបារ៉ាក់ អូបាម៉ា នឹងអាចធ្វើដំណើរទៅកាន់ ប្រទេសភូមា នៅក្រោយពីប្រទេសកម្ពុជា ដែលនៅទីនោះ លោកអូបាម៉ា នឹងក្លាយជាប្រធានាធិបតីអាមេរិកលើកដំបូងគេ ដែលបានដាក់ជើង ជាន់ដីប្រទេសនេះតាំងពីជាង ៥០ឆ្នាំមកហើយ។ នាយកទស្សនាវដ្ដីភូមារូបនេះ បានបញ្ជាក់ថា «ទោះជាយ៉ាងណាក៏ដោយ ក៏យុទ្ធសាស្រ្តរបស់លោកអូបាម៉ា ក្នុងការប្រើប្រាស់ភូមា ជាមូលដ្ឋានមួយនៅអាស៊ី នឹងត្រូវបានគេតាមដាន យ៉ាងយកចិត្តទុកដាក់ នៅអាស៊ី-អាគ្នេយ៍។ ប្រទេសជាច្រើននៅក្នុងតំបន់នេះ ចង់ទប់ស្កាត់ ការរីករាលដាលឥទ្ធិពល របស់ប្រទេសចិន ហើយនេះ អាចធ្វើអោយទីក្រុងវ៉ាស៊ីនតោន សប្បាយចិត្ត។»
សព្វថ្ងៃ ប្រទេសចិន ជាដៃគូរយ៉ាងសំខាន់ របស់ប្រទេសភូមា ហើយបានដាក់ទុនវិនិយោគ ប្រមាណជា ១៥កោដដុល្លា កាលពីឆ្នាំកន្លងទៅ នៅក្នុងប្រទេសនេះ។ តែទីក្រុងវ៉ាស៊ីនតោន និងទីក្រុង នៃព្យីដូ (ទីក្រុងរបស់ភូមា) បានត្រឡប់មកជជែកគ្នាវិញ បន្ទាប់ពីបានអាក់ខានមួយរយះ ក្នុងរបបយោធាផ្ដាច់ការ ដែលជាសញ្ញានៃការចូលជិតគ្នាដ៏ខ្លាំងមួយ។ សូមបញ្ជាក់ថា កងទ័ពនៃប្រទេសភូមា នឹងចូលរួម នៅក្នុងសមយុទ្ធ កូប្រា (Cobra ឬពស់វែក) ដែលដឹកនាំដោយ ប្រទេសថៃ និងកងទ័ពអាមេរិក។ នាយកទស្សនាវដ្ដី លោក អ៊ុង ស៊ាវ បានសង្កត់ធ្ងន់ថា «ទីក្រុងប៉េកាំង ដែលជាអ្នកផ្ដល់អាវុធដ៏សំខាន់របស់ភូមា កំពុងសង្កេតមើលយ៉ាងយកចិត្តទុកដាក់ ពីចំណងទាក់ទង រវាងកងទ័ពអាមេរិកាំង និងភូមានេះ។ (...) នៅក្នុងអតីតកាលកន្លងមក ចិនតែងតែប្រើប្រាស់សិទ្ធជំទាស់វេតូ នៅក្រុមប្រឹក្សាសន្តិសុខ នៃអង្គការសហប្រជាជាតិ ដើម្បីការពាររបបយោធាផ្ដាច់ការ ទល់នឹងការដាក់ទណ្ឌកម្មផ្សេងទាំងឡាយ។ បើនិយាយអោយស្រួលស្ដាប់ ចិនកំពុងគិតថា ថ្ងៃនេះភូមាដល់ពេលត្រូវសងចិនវិញហើយ៕»
---------------------------------------------------
ដោយ ៖ កេសរកូល - ភ្នំពេញ ថ្ងៃទី០៧ ខែវិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ