សហគមន៍ឡពាងប្រកាសទារសំណងពីក្រុមហ៊ុន KDC ១ហិចតា ២ម៉ឺនដុល្លា
- ដោយ: ក. វិច្ចនី អត្ថបទ និងយកការណ៍៖ ក. វិច្ចនី ([email protected]) - ភ្នំពេញ ថ្ងៃទី ១៣ មករា ២០១៥
- កែប្រែចុងក្រោយ: January 14, 2015
- ប្រធានបទ: ដីធ្លី
- អត្ថបទ: មានបញ្ហា?
- មតិ-យោបល់
-
បន្ទាប់ពីគណៈកម្មការទី១ នៃរដ្ឋសភា បានស្នើទៅសហគមន៍ឡពាង ដែលមានជំលោះដីធ្លីសេសសល់ ជាមួយក្រុមហ៊ុន KDC ឲ្យបញ្ជាក់ពីគោលជំហរឲ្យបានច្បាស់លាស់ ពាក់ព័ន្ធទៅនឹងការទាមទារសំណង ដែលពួកគេចង់បាន អ្នកស្រី អ៊ំ សុភី តំណាងសហគមន៍ខាងលើនេះ បានធ្វើការពិភាក្សាយ៉ាងហ្មត់ចត់ ជាមួយនឹងសហគមន៍ដែលមានប្រមាណជា ១៦គ្រួសារ ថានឹងកំណត់តម្លៃដី ដែលក្រុមហ៊ុនរំលោភយកនោះ ក្នុងមួយហិចតា ២ម៉ឺនដុល្លា។
តួរលេខនេះ អ្នកស្រី អ៊ុំ សុភី បានប្រាប់ទស្សនាវដ្តីមនោរម្យ.អាំងហ្វូថា ប្រសិនបើក្រុមហ៊ុនយល់ព្រមផ្តល់សំណង ជាលុយឲ្យពួកគាត់ ដោយគ្រាន់តែសុំបញ្ចុះថ្លៃសំណងក្រោម ២ម៉ឺនដុល្លាបន្តិចបន្តួចនោះ ពួកគាត់នឹងយកទៅពិចារណាគ្នាបន្តទៀត ពោលគឺតួរលេខនេះនៅអាចចរចាគ្នាបាន។ ប៉ុន្តែប្រសិនជាក្រុមហ៊ុនមិនព្រម ផ្តល់ជាសំណងនេះមកឲ្យពួកគាត់នោះទេ ពួកគាត់នឹងដោះស្រាយបញ្ហាជំលោះដីធ្លីនេះ ទៅតាមផ្លូវច្បាប់ ព្រោះជំលោះនេះវាមានរយៈពេលយូរណាស់ដែរទៅហើយ ហើយម្យ៉ាងទៀតប្រជាពលរដ្ឋទាំងនោះ បានចំណាយថវិការអស់ជាច្រើន ក្នុងការប្តឹងផ្តល់ទាមទាររកយុត្តិធម៍យកដីស្រែចំការមកវិញ មិនតែប៉ុណ្ណោះ ពួកគាត់ត្រូវខាតពេលវេលាប្រកបរបររកស៊ីទៀតផង។
ក្រៅពីទារសំណង ចំពោះដីដែលក្រុមហ៊ុនបានរំលោភយកនោះ សហគមន៍សហគមន៍ឡពាង បានសម្រេចគ្នាថា នឹងទាមទារសំណងថ្លៃខូចខាតផ្ទះសំបែងរបស់ពួកគាត់ ដែលត្រូវបានក្រុមហ៊ុនឈូសឆាយ ដើម្បីបណ្តេញប្រជាពលរដ្ឋចេញពីកន្លែងនោះបន្ថែមទៀត។ ប៉ុន្តែការទាមទារសំណងថ្លៃខូចខាតផ្ទះសំបែងនេះ មិនទាន់ត្រូវបានក្រុមប្រជាសហគមន៍ពិភាក្សាគ្នាថា នឹងត្រូវតម្រូវឲ្យសងសំណងជាអ្វីនៅឡើយ ព្រោះពួកគាត់ចង់ដោះស្រាយបញ្ហាឲ្យចប់មួយផ្នែកៗសិន។ ប៉ុន្តែតាមការបញ្ជាក់របស់អ្នកស្រី អ៊ុំ សុភី បានឲ្យដឹងទៀតថា នឹងទាមទារឲ្យក្រុមហ៊ុនសងថ្លៃខូចខាត ក្នុងផ្ទះមួយខ្នង ១ម៉ឺនដុល្លា។
ពាក់ព័ន្ធនឹងការទាមទារសំណង ពីក្រុមហ៊ុន ជាប្រាក់២ម៉ឺនដុល្លានោះ មិនត្រូវបានលោក ស្ងួន ញឿន ដែលត្រូវជាស្វាមីរបស់អ្នកស្រី អ៊ំុ សុភី សម្ដែងក្ដីសង្ឃឹមប៉ុន្មាន ទៅលើការចរចាររបស់គណៈកម្មការទី១ នៃរដ្ឋសភា ដើម្បីដោះស្រាយទំនាស់ជាមួយ ក្រុមហ៊ុន KDC នោះទេ។
លោកបញ្ជាក់ថា គណៈកម្មការទី ១នៃរដ្ឋសភា បានលូកដៃជួយដោះស្រាយបញ្ហានេះ ឲ្យប្រជាពលរដ្ឋចំនួន ៤ លើកទៅហើយ ប៉ុន្តែគណៈកម្មការហាក់មានការលំអៀង កាន់ជើងទៅខាងក្រុមហ៊ុន ហើយថែមទាំងតម្រូវឲ្យប្រជាពលរដ្ឋដែលសេសសល់ទាំង ១៦គ្រួសារនោះ ទទួលសំណងតាមការផ្តល់ឲ្យរបស់ក្រុមហ៊ុន ត្រឹមតែ ២ពាន់ដុល្លាតែប៉ុណ្ណោះ។ លោកថាករណីក្រុមហ៊ុន KDC រំលោភយកដីពួកគាត់ បានដំណើរការនៅក្នុងប្រព័ន្ធតុលាការអស់ទៅហើយ ប៉ុន្តែដោយសារក្រុមសហគមន៍គិតថា ចង់ឲ្យរឿងនេះដោះស្រាយឲ្យកាន់តែឆាប់ចប់នោះ បានជាពួកគាត់ព្រមឲ្យគណៈកម្មការទី ១នៃរដ្ឋសភាជួយដោះស្រាយ៕