ទំនងមានអ្នកញុះញង់ឲ្យសម្លាប់គ្រូសូត្រឆ្វេង បើតាមចៅអធិការវត្ត
- ដោយ: ប្រាថ្នា អត្ថបទ៖ ប្រាថ្នា ([email protected]) យកការណ៍៖ ស្រ៊ុន ទិត្យ - ភ្នំពេញ ថ្ងៃទី១២ មករា ២០១៥
- កែប្រែចុងក្រោយ: January 13, 2015
- ប្រធានបទ: ឃាតកម្ម
- អត្ថបទ: មានបញ្ហា?
- មតិ-យោបល់
-
ដោយសារតែមានបុគ្គលញុះញង់ ឱ្យនេនតូចរូបនេះប្រើអំពើហឹង្សា ទើបព្រះភិក្ខុដែលមានព្រះជន្ម១៨ព្រះវស្សាអង្គនេះ ហ៊ានលើកកាំបិតចាក់សម្លាប់ គ្រូសូត្រឆ្វេងព្រះនាម ថាច់ ខាន់ នៃវត្តសាមគ្គីរង្សីកាលពីថ្ងៃទី១២ ខែមករា ម្សិលម៉ិញ។ ព្រោះកន្លងមកព្រះភិក្ខុអង្គនេះ មិនដែលមានគំនិតប្រើអំពើហឹង្សាអញ្ចឹងទេ តែឥលូវនេះ ស្រាប់តែឃើញនេនអង្គនេះមានការប្រែប្រួល។ នេះជាការសង្កេតរបស់ព្រះសង្ឃ សៀង សុវណ្ណារ៉ា ចៅអធិការវត្តសាមគ្គីរង្សី ថ្លែងប្រាប់ទស្សនាវដ្ដីមនោរម្យ.អាំងហ្វូ។
យ៉ាងណាក៏ដោយ ព្រះតេជគុណមានសង្ឃដីការថា ជនដែលញុះញង់នៅពីក្រោយនោះ មិនដឹងថាជាបុគ្គលណាឡើយ។ ព្រះតេជគុណ បានបញ្ជាក់បន្ថែមថា៖ «ប៉ុន្តែនៅលើកចុងក្រោយ លោកដូចជាមានបញ្ជា ឬក៏មានការញុះញង់ពីណាក្រោយខ្នង ទើបធ្វើឱ្យលោកហ៊ានដល់កម្រិតចាក់គ្រូសូត្រនេះឯង»។
ចៅអធិការវត្តសាមគ្គីរង្សីបានឱ្យដឹងបន្តថា សង្ឃជាជនដៃដល់មានព្រះនាម ទឹង ជាមនុស្សចូលចិត្តលេងសើច និងល្បែងមួយចំនួនដូចជាការទាត់សី នៅក្នុងវត្ត ដែលមើលទៅដូចជាមិនសម ដូច្នេះហើយគ្រូសូត្រឆ្វេងតែងហៅទៅស្តីបន្ទោស។ ព្រះអង្គថា ព្រះតេជគុណ ថាច់ ខាន់ ធ្លាប់ហៅជនដៃដល់រូបនោះ ទៅស្តីបន្ទោសពីរបីដងរួចមកហើយ ប៉ុន្តែជនដៃដល់មិនដែលស្តាប់ការទូន្មានរបស់គ្រូសូត្រឆ្វេងនោះទេ។ ហើយនៅថ្ងៃកើតហេតុ មានការហៅទៅទូន្មានម្តងទៀត ក៏មានការចាក់សម្លាប់គ្នាតែម្តង។
ចំពោះការសុគតរបស់គ្រូសូត្រឆ្វេងវត្តសាមគ្គីរង្សី បានធ្វើឱ្យប្រជាពលរដ្ឋមានការសោកស្តាយជាខ្លាំង ជាពិសេសព្រះតេជគុណជាចៅអធិការផ្ទាល់តែម្តង។ ព្រះតេជគុណសៀង សុវណ្ណារ៉ា មានថេរៈដីការថា គ្រូសូត្រឆ្វេងជាមនុស្សស្លូតត្រង់ ជាមនុស្សមិនចូលចិត្តមាត់ករ ព្រះអង្គជាមនុស្សស្វាហាប់នឹងការងារសង្គម និងការងារកសាងវត្ត៕
ព្រះភិក្ខុជាប់សង្ស័យថាបានចាក់សម្លាប់គ្រូសូត្រ។ (រូបថត monoROOM.info/ S. tith)