មេធាវីព្រះសង្ឃខ្មែរក្រោម៖ ជាគោលការណ៍ ត្រូវដោះលែងកូនក្តីខ្ញុំ
- ដោយ: ប្រាថ្នា អត្ថបទ៖ ប្រាថ្នា ([email protected]) យកការណ៍៖ ស្រ៊ុន ទិត្យ - ភ្នំពេញ ថ្ងៃទី០៩ មករា ២០១៥
- កែប្រែចុងក្រោយ: January 09, 2015
- ប្រធានបទ: យុត្តិធម៌
- អត្ថបទ: មានបញ្ហា?
- មតិ-យោបល់
-
អ្នកស្រី សាម សុគន្ធា ជាមេធាវីមកពីអង្គការលីកាដូ ដែលការពារក្តីឱ្យព្រះសង្ឃ ដែលជាជនជាប់ចោទ ឃិត វណ្ណៈ និង ថាច់ សាង (ហៅ សាន កុសល) បានឱ្យដឹងពីមូលហេតុ ដែលតុលាការសម្រេចមិនឱ្យជនជាប់ចោទទាំងពីរ នៅក្រៅឃុំថា ដោយតុលាការសម្អាងរឿងក្តី ស្ថិតនៅក្នុងការស៊ើបអង្កេត និងដោយសារតែការសុំនៅក្រៅឃុំ របស់កូនក្តីលោកស្រីមិនមានហេតុផល។
ប៉ុន្តែការសម្រេចរបស់សាលាឧទ្ធរណ៍ មិនឱ្យកូនក្តីលោកស្រីនៅក្រៅឃុំនេះ ជារឿងមិនសមហេតុផល។ មេធាវីការពារជនជាប់ចោទរូបនេះ អះអាងថា ជាគោលការណ៍កូនក្តីរបស់អ្នកស្រី គួរត្រូវបានឲ្យនៅក្រៅឃុំ ព្រោះវាជាបទមជ្ឈឹម។ មួយវិញទៀត មានវិមតិសង្ស័យជាច្រើន ទាក់ទងនឹងការចោទប្រកាន់ ពីបទចូលរួមជាមួយសមាគមជនទុច្ចរិតនេះ។
អ្នកស្រី សាម សុគន្ធា ពន្យល់ថា៖ «ដោយសារតែមិនមានសកម្មភាពណាមួយ ជាធាតុផ្សំនៃបទល្មើស ដែលអាចចោទប្រកាន់ហ្នឹងបានឡើយ»។ អ្នកស្រីបន្ថែមថា កូនក្តីរបស់អ្នកស្រីមិនសុខចិត្តនោះទេ និងសំណូមពរ ឱ្យបន្តប្តឹងទៅតុលាការកំពូលបន្តទៅទៀត។
រីឯម្តាយរបស់អតីតព្រះសង្ឃកម្ពុជាក្រោមម្នាក់អ្នកស្រី ថិត យ៉ាង កំពុងតែអំពាវនាវឱ្យអង្គការសង្គមស៊ីវិល ក៏ដូចជារដ្ឋាភិបាលជួយរកយុត្តិធម៌ ឱ្យដោះលែងកូនប្រុសរបស់គាត់ដែលកំពុងជាប់ឃុំ បន្ទាប់ពីសាលាឧទ្ធរណ៍នៅព្រឹកថ្ងៃទី០៩ មករានេះ សម្រេចមិនឱ្យនៅក្រៅឃុំ។
អ្នកស្រី ថិត យ៉ាង បានថ្លែងឡើងថា៖ «អត់ឱ្យនៅក្រៅឃុំ អយុត្តិធម៌កូនខ្ញុំណាស់ លោកអត់មានកំហុសអីទៀត ហេតុអីដាក់នៅក្រៅឃុំមិនឱ្យទៀត?»។ ម្តាយរបស់ជនជាប់ចោទរូបនេះបន្តថា កូនអ្នកស្រីមិនបានធ្វើអីខុសទេ គ្រាន់តែដឹកទង់សាសនា និងទង់ជាតិតែប៉ុណ្ណោះ ប៉ុន្តែកូនអ្នកស្រីត្រូវបានគេចោទប្រកាន់ ពីបទចូលរួមជាមួយជនទុច្ចរិត។ អ្នកស្រីបន្តថា កូនអ្នកមិនជាប់ពាក់ព័ន្ធ ជាមួយនឹងរឿងនយោបាយអ្វីឡើយ កូនអ្នកស្រីគ្រាន់តែជួយតវ៉ារឿងដីធ្លីជាមួយប្រជាពលរដ្ឋរងគ្រោះ។ អ្នកស្រីអំពាវនាវឱ្យរដ្ឋាភិបាល និងអង្គសិទ្ធិមនុស្សជួយរកយុត្តិធម៌ជូនកូនអ្នកស្រី ដើម្បីឱ្យមានការដោះលែងឱ្យនៅក្រៅឃុំ។
មន្ត្រីសិទ្ធិមនុស្សនៅអង្គការលីកាដូ លោក អំ សំអាត ដែលបានតាមដានករណីនេះ បាននិយាយ ថាការចាប់ព្រះកាយព្រះសង្ឃទៅឃុំខ្លួន ជារឿងខុសនីតិវិធី ព្រោះព្រះសង្ឃទាំងបីអង្គ មិនបានប្រព្រឹត្តបទល្មើសអ្វីខុសឡើយ។
លោកអះអាងថា៖ «លោកគ្រាន់តែដឹកទង់ជាតិ និងទង់សាសនា វាអត់មានបទល្មើលទេ ព្រោះថាលោកមិនប្រើទង់ជាតិ និងទង់សាសនា ហើយវាមានអីត្រូវបទល្មើស? ហើយចោទថាចូលរួមជាមួយសមាគមនៃជនទុច្ចរិត។ លោកមានបំណងយកទង់សាសនា និងទង់ជាតិហ្នឹង ទៅឱ្យប្រជាពលរដ្ឋដែលមកពីព្រះវិហារ ដែលធ្វើការតវ៉ាទាក់ទងរឿងដីធ្លី ដែលមានគេរំលោភបំពានដីធ្លីរបស់ពួកគាត់។ អញ្ចឹងវាអត់មានអីត្រូវមានបទល្មើស ហើយសួរថាប្រជាពលរដ្ឋ មកពីព្រះវិហារហ្នឹងជាជនទុច្ចរិត ហើយអ្នកណាជាអ្នករំលោភយកដីគាត់ ឱ្យគាត់តវ៉ា?»៕