ទារិកាចំម្លែកកើតមកខ្លួនមួយក្បាលពីរ រស់បានតែមួយម៉ោង
- ដោយ: ក. សោភណ្ឌ អត្ថបទ និងយកការណ៍៖ ក. សោភ័ណ្ឌ ([email protected]) - ភ្នំពេញ ថ្ងៃទី១២ ធ្នូ ២០១៤
- កែប្រែចុងក្រោយ: December 12, 2014
- ប្រធានបទ: ធម្មជាតិចម្លែក
- អត្ថបទ: មានបញ្ហា?
- មតិ-យោបល់
-
ស្ត្រីជាម្ដាយ ដែលបង្កើតបានកូនចម្លែកនេះ មានឈ្មោះ តូច វឿន អាយុ ២៨ឆ្នាំ ជាភរិយារបស់លោក ពេជ្រ សំអុន អាយុ៣០ឆ្នាំ។ អ្នកទាំងពីររូប ជាកសិករនៅភូមិប្រាសាទ ឃុំសំបួរ ស្រុករមាសហែក ខេត្ដស្វាយរៀង។ កូននេះ ជាកូនដំបូងរបស់អ្នកស្រី នៅក្នុងជីវិតអាពាហ៍ពិពាហ៍ ជាមួយនឹងស្វាមី អស់រយៈពេលជិត២ឆ្នាំមកនេះ។
លោក ពេជ្យ សំអុន ជាស្វាមីបានរៀបរាប់ថា ដំបូងប្រពន្ធរបស់គាត់សម្រាលកូននេះមិនរួចទេ នៅឯស្រុករមាសហែក រហូតមកដល់មន្ទីរពេទ្យបង្អែកខេត្ត ទើបគ្រូពេទ្យសម្រេចចិត្តវះកាត់។ លោកបន្តថា ពេលវះកាត់ហើយភ្លាមៗ កូនរបស់លោកមានសុខភាពល្អធម្មតាទេ មានទម្ងន់២,៩០គីឡូក្រាម។
បុរសជាឪពុកទារិកាខាងលើ និយាយទាំងហួសចិត្ត ដោយមិននឹកស្មានថាកូនរបស់ខ្លួន កើតមកមានរូបរាងខុសពីក្មេងដ៏ទៃដូច្នេះសោះ ហើយរឿងដែលគួរឲ្យសោកស្តាយបំផុតនោះ គឺកូនដំបូងរបស់លោកនេះ មកចាប់ប្រភពមានជីវិត បានតែមួយភ្លែតប៉ុណ្ណោះ។ ទារិកាក្បាលពីរខ្លួនមួយ បានស្លាប់ទៅវិញ បន្ទាប់ពីកើតបានមួយម៉ោង។
លោក សំអុន បានថ្លែងទៀតថា លោកអាណិតប្រពន្ធលោកខ្លាំងណាស់ ដែលស្រឡាញ់កូន និងខំប្រឹងសំរាលចេញមកហើយ ទោះជាកូនមានរូបរាងយ៉ាងនេះក៏ដោយ តែបែរជាកូនមិនអាចរស់បាន ហើយស្លាប់ទាំងមិនទាន់បានឃើញពន្លឺព្រះអាទិត្យ បានមួយថ្ងៃផង។
សភាពខុសធម្មជាតិបែបនេះ អាចជាករណីកម្រ តែវាតែងមានកើត ជាច្រើនដងរួចមកហើយ នៅក្នុងប្រទេសផ្សេង។ កាលពីខែមិនាកន្លងទៅ នៅក្នុងប្រទេសឥណ្ឌា ក៏មានករណីដូចគ្នានេះកើតឡើងដែរ។ ក្រុមអ្នកវិទ្យាសាស្ត្រ ជាពិសេសក្រុមគ្រូពេទ្យជំនាញ បានធ្វើការបកស្រាយថា គេអាចជួយសង្គ្រោះ«ទារកនៃធម្មជាតិចម្លែក»នេះបាន នៅមុនពេលដែលទារកចាប់ទម្រង់មកជាមនុស្ស នៅក្នុងផ្ទៃរបស់ម្ដាយ (បានន័យថា នៅក្នុងអំឡុង៣ទៅ៥ខែដំបូង នៃការពរពោះ)។ ប៉ុន្តែស្ដ្រីជាម្ដាយ ត្រូវមកធ្វើការឆ្លុះអេកូ នៅក្នុងរយៈពេលនោះ ដើម្បីមើលដឹងពីការវិវត្តន៍ដំបូងរបស់កូនខ្លួន ដែលសម្រាប់នៅជនបទក្នុងប្រទេសកម្ពុជា នៅជាក្ដីស្រមើស្រម័យនៅឡើយ។ ចំពោះកូនដែលប្រសូតរួច ចេញមកមានធម្មជាតិបែបនេះ គេអាចធ្វើការវះកាត់បំបែក ដោយអាចទុកឲ្យរស់បានតែម្នាក់ ប៉ុន្តែម្នាក់ដែលនៅរស់ពីការវះកាត់នេះ ក៏មានសង្ឃឹមដ៏ស្ដួចស្ដើងណាស់ដែរ និងទាមទារឲ្យគ្រូពេទ្យ រួមនឹងមន្ទីរពេទ្យ ត្រូវមានជំនាញច្បាស់លាស់មួយ។
ចុះនៅកម្ពុជាយើងវិញ?