មន្ត្រីជាន់ខ្ពស់នៃរដ្ឋសភាជាតិ មក​ពី​គណបក្ស​ប្រជាជន​កម្ពុជា និង​ជា​ប្រធាន​គណៈកម្មការ កិច្ចការ​បរទេស សហ​ប្រតិបត្តិការ​អន្តរជាតិ ឃោសនាការ និង​ព័ត៌មាន​នៃ​រដ្ឋសភា លោក ឈាង វុន នឹង​អញ្ជើញ​លោក ខៀវ កាញារីទ្ធ រដ្ឋមន្ត្រី​ក្រសួង​ព័ត៌មាន មក​បំភ្លឺ​ជុំ​វិញ​បញ្ហា​ផ្សព្វផ្សាយ​គ្រឿង​ស្រវឹង នៅ​តាម​ទូរទស្សន៍ និង​តាម​បណ្ដាញ​ផ្សព្វផ្សាយ​ផ្សេងៗ។

សន្និសីទព័ត៌មាន នា​វិមាន​រដ្ឋសភា​កាល​ពី​ថ្ងៃ​ទី១១ ខែ​ធ្នូ ម្សិល​ម៉ិញ​នេះ ប្រធាន​គណៈកម្មការ​កិច្ចការ​បរទេស នៃ​រដ្ឋសភា​ជាតិ បាន​លើក​ឡើង​ថា លោក ខៀវ កាញារីទ្ធ គួរ​ពិចារណា​ឡើង​វិញ ពី​ការ​អនុញ្ញាតិ​ឲ្យ​មាន​ការ​ផ្សព្វ​ផ្សាយ​គ្រឿង​ស្រវឹង​យ៉ាង​ច្រើន តាម​ប្រព័ន្ធ​ផ្សព្វផ្សាយ​ដូច​ជា​វិទ្យុ និង​ទូរទស្សន៍ ជា​ដើម​នោះ។

យ៉ាងណាក៏ដោយ ការហៅរដ្ឋមន្ត្រីក្រសួងព័ត៌មានមកសួរនាំនេះ នៅមិនទាន់ បញ្ជាក់ពេលវេលា​ច្បាស់​លាស់​នោះទេ ដោយរង់ចាំកិច្ចពិភាក្សាផ្ទៃក្នុងគណៈកម្មាការលោកជាមុនសិន។ តែលោកស្នើឲ្យស្ថានីយទូរទស្សន៍ កាត់បន្ថយការផ្សព្វផ្សាយគ្រឿងស្រវឹង ឲ្យបានច្រើនជាងនេះ។

លោក ឈាង វុន បានបង្ហាញនូវការហួសចិត្តយ៉ាងដូច្នេះថា៖ «អស្ចារ្យផ្សាយស្រាបៀរ។ (…) ខ្ញុំអង្គុយ១០នាទី​នៅមុខទូរទស្សន៍មួយ ផ្សាយស្រាហ្នឹងមិនតិចជាង៨នាទីទេ។ កម្មវិធី១០នាទី ផ្សាយស្រាប្រហែល៨នាទី ខ្ញុំ​អង្គុយវាស់ ស្រាហ្នឹង៨នាទី ធ្ងន់ធ្ងរមែនទែន។ (…) ខ្ញុំយល់ហើយ នេះជាចំណូលរបស់ប្រព័ន្ធផ្សព្វផ្សាយ ប៉ុន្តែ​ចំណូលរបស់យើង ឲ្យគិតពីសេចក្តីស្លាប់របស់អ្នកផ្សេង។»។

សូមទស្សនាវីដេអូឃ្លីបដូចខាងក្រោម៖

(វីដេអូ នឹងមកដល់ក្នុងពេលបន្តិចទៀត)

សូមរំលឹកថា ជាមួយនឹងការលើកឡើងខាងលើនេះ កាលពីរសៀលថ្ងៃទី២៦ ខែវិច្ឆិកា ឆ្នាំ២០១៤កន្លងមក ប្រធានគណៈកម្មការទី៧នៃរដ្ឋសភា លោក យ៉ែម បុញ្ញឫទ្ធិ មកពីគណបក្សសង្គ្រោះជាតិ ក៏ធ្លាប់បានលើក​បញ្ហានេះទៅកាន់លោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈដែរ។ ក្នុងកិច្ចប្រជុំ​សាក​សួរដោយបិទទ្វារនេះ លោកស្រីរដ្ឋមន្ត្រីក្រសួងវប្បធម៌ និងវិចិត្រសិល្បៈ បានផ្តល់ចម្លើយតបថា កុំឲ្យលោក យ៉ែម ប៉ុញ្ញាឬទ្ធិ គិតច្រើន និងកុំដាក់អារម្ភក្នុងរឿងនោះខ្លាំងពេក ហើយធ្វើចិត្ត និងបើកចិត្តឲ្យទូលាយ​ជាងនេះ​បន្តិចទៅ។ លោកស្រីបញ្ជាក់ដូច្នេះថា៖ «ក្បាលខ្ញុំទេដែលសំខាន់ មិនមែននាឡិការ ឬរោមដៃ រោងជើងខ្ញុំ ឬខោអាវខ្ញុំទេ។»

ស្ព៉តពាណិជ្ជកម្ម«គ្រឿងស្រវឹង» ក៏ជាផ្នែកមួយដែលធ្វើឲ្យ«អត្រាអ្នកស្លាប់»ដោយសារគ្រោះ ថ្នាក់ចរាចរណ៍​មាន​ការកើនឡើងដែរ។ សមាជិករដ្ឋសភាមណ្ឌលបាត់ដំបងរូបនេះ បានប្រកាសជាផ្លូវការបែបនេះ បន្ទាប់ពី​ច្បាប់​ចរាចរណ៍ផ្លូវគោក«ថ្មី» បានរដ្ឋសភាជាតិអនុម័តចប់សព្វគ្រប់កាលពីថ្មីៗនេះ។ សេចក្តីព្រាងច្បាប់​ចរាចរណ៍​ផ្លូវគោកថ្មីនេះ បានធ្វើការផាកពិន័យជាប្រាក់ចាប់ពី៨សែនរៀល ដល់៤លានរៀល សម្រាប់អ្នកបើក​បរ​ដែលមានជាតិស្រវឹង។

វណ្ណ វិចិត្រ យុវជនមួយរូប ដែលចូលចិត្តគ្រឿងស្រវឹង បានបញ្ជាក់ប្រាប់ទស្សនាវដ្តីមនោរម្យ.អាំងហ្វូថា សម្រាប់​លោកផ្ទាល់ច្រើនតែទទួលទានសុរាទាំងនេះ នៅពេលមានកម្មវិធីជួបជុំមិត្តភ័ក្រម្តងម្កាលប៉ុណ្ណោះ។ រីឯការផ្សាយពាណិជ្ជកម្មស្រាបៀរវិញ លោករិះគន់ថាដូចជា ជ្រុលបន្តិច ហើយមិនសមផង។ យកល្អក្រសួង​ព័ត៌មាន គួតែបញ្ចប់រឿងផ្សាយពាណិជ្ជកម្មស្រា ឬស្រាបៀរនេះ តាមបណ្តាញផ្សព្វផ្សាយតទៅទៀត ពិសេស​ទូរទស្សន៍តែម្តង។

យុវជន វណ្ណ វិចិត្រ បានថ្លែងថា៖ «ខ្ញុំឃើញស្ព៉តពាណិជ្ជកម្មស្រា ឬបៀរមួយចំនួន ធ្វើឡើងមិនសមនឹងទទួល​យកបានឡើយ។ ដូចជាស្ព៉ត កាន់ដបស្រាផឹក បែរជាអាចហោះបាន ហើយហោះកាត់"វាំង" កាត់"វិមាន"​ឯករាជ្យ​ជាដើម។ (…) ស្ព៉តស្រាមួយទៀត ធ្វើមើលតែប្រទេសកម្ពុជាគ្មានភ្លើង ទាល់តែផឹកស្រាបៀរខ្លួននោះ ទើបមានភ្លើងបំភ្លឺទូទាំងប្រទេសកម្ពុជាឬ? មួយទៀតរាល់ពាណិជ្ជកម្មស្រា ឬបៀរទាំងអស់សុទ្ធតែមានរង្វាន់។ ខ្មែរក្រណាស់ឬ ទាល់តែផឹកស្រាបៀរច្រើនទទួលបានរង្វាន់ ទើបក្លាយជាអ្នកមាន?  តើស្ព៉តអស់នេះ មានអ្វី​ជាការអប់រំល្អទៅ? តែខ្ញុំគិតថា វាជាការម៉ាក់ងាយដល់ប្រទេស និងប្រជាពលរដ្ឋកម្ពុជាទៅវិញទេ។»

ទស្សនាវដ្តី មិនអាចទំនាក់ទំនងជាមួយរដ្ឋមន្រ្តីក្រសួងព័ត៌មានបានទេ នាព្រឹកនេះ ដោយទូរស័ព្ទរបស់​លោក​ពុំមានអ្នកទទួល៕