«លំនៅដ្ឋានរបស់ខ្ញុំ ជាបច្ឆាដុតខ្មោច!»
- ដោយ: ក. សោភណ្ឌ អត្ថបទ៖ ក. សោភ័ណ្ឌ ([email protected]) - យកការណ៍៖ ហេង វុទ្ធី - ភ្នំពេញ ថ្ងៃទី១២ធ្នូ ២០១៤
- កែប្រែចុងក្រោយ: December 12, 2014
- ប្រធានបទ: ជីវិត
- អត្ថបទ: មានបញ្ហា?
- មតិ-យោបល់
-
នៅព្រះរាជាណាចក្រទីពីរនេះ មានរឿងប្លែកចម្លែកជាច្រើន បានកើតឡើង។ គេមិនចាំបាច់ ទៅមើលពលរដ្ឋដែលរស់នៅ តំបន់ទីដាច់ស្រយ៉ាលនោះផងទេ ព្រោះបើសូម្បីពលរដ្ឋជាច្រើននាក់ នៅកណ្ដាលរាជធានី ក៏មានករណី«ចម្លែក»ដ៏ច្រើនសម្បូរហូរហៀរ នៅក្បែរនឹងចុងច្រមុះដែរ។ បើមានពលរដ្ឋខ្លះ រស់នៅជាប់ជាប្រចាំ នៅលើចិញ្ចើមខ្នល់ ឬក្នុងគេហដ្ឋានដែលលិចលង់នៅក្នុងទឹកជំនន់ សឹងតែខួបប្រាំងខួបវស្សានោះ តែនៅពេលនេះ ទស្សនាវដ្ដីសូមយកករណីមួយទៀត បញ្ជាក់ថា ពលរដ្ឋខ្លះទៀត បានយកទីបច្ឆាដុតសាកសព មកធ្វើជាលំនៅដ្ឋានរបស់ខ្លួន។
ទីបច្ឆាដុតសពនោះ ស្ថិតក្នុងវត្ត នួនមណ្នីរាម ហៅវត្ត «ខណ្ឌ» ស្ថិតនៅភូមិអំពិល សង្កាត់ទន្លេបាសាក់ ខណ្ឌចំការមន រាជធានីភ្នំពេញ ដែលបានក្លាយជាជម្រក របស់ពលរដ្ឋប្រមាណជាប្រាំពីរគ្រួសារ។ រស់នៅជាមួយសភាពងងឹតក្នុងបច្ឆា លោកយាយ ស ឡៃ វ័យ៦៦ឆ្នាំបានប្រាប់ទស្សនាវដ្តីមនោរម្យ.អាំងហ្វូថា ដំបូងឡើយប្តីលោកយាយ ដែលជាប្រធានមន្ទីរចិញ្ចិមសត្វនៅទីនេះ បានរស់នៅជាមួយគ្នា។ តែបន្ទាប់ពីប្តីលោកយាយ មានប្រពន្ធថ្មីបែកគ្នាទៅ គាត់ក៏បន្តរស់នៅមកដល់សព្វថ្ងៃ ជាមួយកូនប្រុសពីរនាក់ និងស្រីម្នាក់។
ស្ត្រីវ័យចំណាស់ខាងលើ បានបន្ថែមទៀតថា គាត់រស់នៅក្នុងវត្ត ខណ្ឌ នេះតាំងពីមិនទាន់មានព្រះសង្ឃមកម្លេះ មកដល់ពេលបច្ចុប្បន្ន ទើបមានព្រះសង្ឃ លោកយាយមិនបានចាំច្បាស់ថា ប៉ុន្មានឆ្នាំមកហើយទេ។
ហេតុផលដែលលោកយាយ និងគ្រួសារទាំងប្រាំពីរទៀត យកអតីតបច្ឆាដុតខ្មោចនេះជាផ្ទះ ដោយសារ មិនមានលុយកាក់គ្រប់គ្រាន់ ដើម្បីជួលផ្ទះគេនៅ ព្រោះតែជីវភាពក្រពេក។ ស្រ្តីមេម៉ាយ ស ឡៃ បានបន្ថែមថា ពេលប្រជាពលរដ្ឋភូមិ អំពិល នេះ មានបុណ្យសព្វម្តងៗ គេយកទៅដុតនៅ នៅវត្តក្រពើហា ឬ វត្តចាក់អង្រែរជំនួសវិញ។
ការរស់នៅដោយខុសទំនង ឬមានជម្រកហើយ តែគ្មានប្លង់កម្មសិទ្ធិច្បាស់ ងាយនឹងត្រូវបានអាជ្ញាធរធ្វើការបណ្ដេញចេញណាស់។ រីឯការយកបច្ឆា ជាទីជម្រកនេះ ក៏ជៀសមិនផុតពីព្រឹត្តិការណ៍នេះដែរ។ លោកយាយ ស ឡៃ បានរំលឹកបន្ថែមទៀតថា កាលពីមុន ធ្លាប់មានអាជ្ញាធរគេដេញគាត់ម្តងដែរហើយ មានបំណងវាយកំទេច បច្ឆាដុតខ្មោចនេះចោល។ តែអ្នកជិតខាងស្រដីថា បើគេឲ្យគាត់ចេញនោះ ពួកគេនឹងរៃលុយគ្នាសង់ផ្ទះថ្មី ឲ្យក្រុមគ្រួសារលោកយាយរស់នៅ តែគាត់មិនព្រមចេញ ក៏នៅដល់សព្វថ្ងៃនេះ៕
