លោក ហេង សួរ អ្នកនាំពាក្យ​ក្រសួង​ការងារ បាន​លើក​ឡើង​ថា «ចាប់​ពី​ពេល​នេះ​ត​ទៅ យើង​មិន​ធ្វើ​សន្និសិទ្ធិ​បែក​គ្នា​ទេ បំភ្លឺ​គ្នា​ទៅ​វិញ​ទៅ​មក កុំ​ខ្លាច។ (….) គោល​បំណង​នៃ​ការ​ជួប​គ្នា ហើយ​ជួប​គ្នា​ទៀត ចាប់​ដៃ​គ្នា ការពារ​ផល​ប្រយោជន៏​រួម។» ការ​លើក​ឡើង​របស់​មន្ត្រី​អ្នក​នាំ​ពាក្យ​រូប​នេះ ជា​ផ្នែក​មួយ នៅ​ក្នុង​ចំណុច​ជា​ច្រើន នៃ​ការ​បង្កើត​ឲ្យ​មាន​នូវ​ស្មារតី​ខិត​មក​កៀក​គ្នា នៃ​គ្រប់​ភាគី​ចូល​រួម​ទាំង​អស់ សម្រាប់​ពិភាក្សា លើ​ការ​តម្លើង​ប្រាក់​ឈ្នួល​អប្បបរមា ឲ្យ​ដល់​កម្មករ​កម្ពុជា។

ក្នុងជំនួបត្រីភាគីថ្ងៃទី២០ ខែ​តុលា ឆ្នាំ​២០១៤នេះ លោក ហេង សួរ បាន​លើក​មក​បញ្ជាក់​នូវ​ក្រម​សីលធម៌ ចំនួន​ប្រាំ​មួយ​ចំណុច សម្រាប់​អនុវត្ត ក្នុង​ការ​ពិភាក្សា​គ្នា​ពេល​ក្រោយៗ​ទៀត រួម​មាន៖

១. មិនត្រូវប្រើប្រាស់ពាក្យពេចន៍បែបហិង្សា និងបង្កអរិភាពរវាងគ្នា និងគ្នា។
២. មិនត្រូវផ្សព្វផ្សាយព័ត៌មានណាមួយ ដែលអាចបង្កឲ្យមានអំបើហិង្សា ការប្រមូលផ្តុំខុសច្បាប់ ដែល​ប៉ះ​ពាល់​ដល់បរិយាកាសវិនិយោគ សន្តិសុខ និងសណ្តាប់។
៣. មិនត្រូវអវត្តមានពីកិច្ចប្រជុំ និងមិនអនុញ្ញាតឲ្យមានតំណាងជំនួសនោះឡើយ លើកលែងតែ​មានបញ្ហា​សុខភាពធ្ងន់ធ្ងរ។ បុគ្គល ដែលអវត្តមានក្នុងកិច្ចប្រជុំ អាចប្រឈមនឹងការបាត់បង់សុពលភាព នៃការចូលរួម​សកម្មភាពត្រីភាគី នាពេលអនាគត។
៤. ត្រូវប្រើប្រាស់ហេតុផល និងទឡ្ហីករណ៍សមរម្យ ក្នុងការការពារអំណះអំណាងរបស់ខ្លួន ឬភាគីខ្លួន។
៥. ត្រូវរក្សានូវការសម្ងាត់ នៃព័ត៌មាន ប្រសិនជាមានសំណូមពរ។
៦. ត្រូវមានសុឆន្ទៈក្នុងការចរចា ដើម្បីរកដំណោះស្រាយ និងការពារនូវផលប្រយោជន៍​សេដ្ឋកិច្ច​ របស់វិស័យ​វាយនភ័ណ្ឌកាត់ដេរសម្លៀកបំពាក់ និងផលិតស្បែកជើង ក៏ដូចជាផលប្រយោជន៍របស់បងប្អូនកម្មករ និយោជិក​ក្នុងវិស័យនេះ។

អគ្គលេខាធិកានៃ សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក គង់ អាទិត្យ តំណាងឲ្យភាគី​កម្មករ បានលើកឡើងថា លោកគាំទ្រចំពោះសម្មភាពរបស់ក្រសួងការងារនៅពេលនេះ ដែលឈរជា​កណ្តាល មិនមាននិន្នាការទៅរកភាគីណាមួយនោះ។ លោកបន្តថា យ៉ាងណាក៏ដោយ សម្រាប់ប្រាក់ឈ្នួល​អប្បបរមា​កម្មករ និយោជិត ត្រូវស្ថិតនៅលើការថ្លឹងថ្លែងដោយស្មើភាពគ្នា ធ្វើយ៉ាងណាស្វែងរកយុត្តិធម៌ បាន​ទៅ​ដល់​កម្មករ ដែលចាត់ទុកថាវិស័យកាត់ដេរទាំងមូល ឬសង្គមមាន«សន្តិភាព»បាន។

សម្រាប់លោក រ៉ុង ឈុន ប្រធានសហភាពសហជីពកម្ពុជាវិញ ចាត់ទុកក្រមសីលធម៌ខាងលើនេះ ថាជាការ​ឥតប្រយោជន៍ និងនាំមកនូវផលអាក្រក់។ តាមសេចក្តីថ្លែងការណ៍ របស់សហភាពសហជីពកម្ពុជា ចុះថ្ងៃ​ទី២១ ខែតុលានេះ បានលើកឡើងថា កិច្ចប្រជុំដែលចាត់ទុកថាមានដំណើរការល្អ ត្រូវតែផ្តល់សេរីភាព សម្រាប់​​អ្នក​ចូលរូមគ្រប់ភាគី ក្នុងការបញ្ចេញនូវមតិរបស់ខ្លួន មិនត្រួវធ្វើការហាមឃាត់ ឬដាក់គំនាបយ៉ាង​ដូច្នេះ​ទេ ដែល​អាចបង្ហាញថា លទ្ធផលដែលបានពីកិច្ចប្រជុំនោះ មានលទ្ធផលមិនល្អដែល​អាចទទួលយក​បាន។

ដោយឡែក ចំពោះការកំណត់ប្រាក់ឈ្នួលអប្បបរមា សម្រាប់កម្មករ នៅមិនទាន់មានលទ្ធផលឲ្យប្រាកដ ពី​ការជជែកគ្នានេះទេ។ អគ្គលេខាធិការ សមាគមរោងចក្រកាត់ដេរនៅកម្ពុជា លោក ខេន លូ តំណាងឲ្យខាង​ភាគីនិយោជក ក្នុងកិច្ចសម្ភាសជាមួយអ្នកសារព័ត៌មាន បានលើកឡើងថា ចំពោះលទ្ធផល ពីជំនួបពីថ្ងៃទី២០ ខែតុលា នៅមិនទាន់ចាត់ទុកថា ជាលទ្ធផលនៃការខិតទៅរកភាពជិតគ្នា រវាងកម្មករនិយោជិក និងនិយោជក​នៅឡើយ៕

---------------------------------------

សូមទស្សនាកិច្ចសម្ភាស នៃជំនួនត្រីភាគីជាមួយអ្នកសារព័ត៌មានដូចខាងក្រោម៖