ក្នុងតៀមកាហ្វេមួយ ក្បែរមន្ទីរពេទ្យព្រះកុសុមៈ (ពេទ្យលោកសង្ឃ) មានក្រុមបុរសចំណាស់ប្រាំពីរនាក់ បាន​ជុំគ្នានៅជុំវិញតុមួយ ហើយបានជជែកគ្នាពីនេះពីនោះ មិនចេះអស់មិនចេះហើយ រហូតដល់ដំណាក់​កាល​មួយ ដែលបានក្លាយជាការឆ្លងឆ្លើយប្រកបដោយការរិះគន់ ទៅលើលោកនាយករដ្ឋមន្រ្តី ហ៊ុន សែន ជុំវិញ​ការ​ប្រើប្រាស់​វេទិកា​សាធារណៈរបស់ជាតិ មកផ្សព្វផ្សាយឲ្យគណបក្សនយោបាយ គ្រួសារ និងក្រុមរបស់ខ្លួន​។

បុរសវ័យចំណាស់ម្នាក់ អាយុខ្ទង់៦០ឆ្នាំប្លាយ បានលើកឡើងថា លោកតែងតែតាមដាននូវរាល់ការនិយាយ របស់លោកនាយករដ្ឋមន្ត្រីស្ទើមិនចន្លោះ តែមិនដែលមានពេលណាមួយ ដែលលោកនាយករដ្ឋមន្រ្តី​មិន​និយាយពី«បក្ស» បក្សពួកនិយម បុគ្គលខ្លួន ឬពីគ្រួសារនោះទេ។ លោកបន្តថា ​ជាពិសេសនៅពេល​លើក​ឡើង ទាក់ទងនឹងរបបប៉ុលពតខ្មែរក្រហម​តែម្តង។

បុរសម្នាក់ទៀតបានបន្ទរឡើងដែរថា លោកនាយករដ្ឋមន្រ្តី ហ៊ុន សែន ដឹងច្បាស់ថានឹងមានការ​ចាក់ផ្សាយ​សម្តីគាត់ តាមកញ្ចក់ទូរទស្សន៍ ឬផ្សាយតាមវិទ្យុជាដើម ដូច្នេះគាត់ដឹងថា វានឹងឮដល់ប្រជាពលរដ្ឋច្រើន។ លោក ហ៊ុន សែន ចូលចិត្តនិយាយតែពីប្រយោជន៍«បក្ស» ក្រុមខ្លួន ឬការវាយប្រហារទៅលើអ្នកដទៃ ដែល​អ្នកទាំងនោះ នឹងគ្មាន​ឱកាស​មក​និយាយ ឬ តបតនឹងលោកបានឡើយ។ បុរសចំណាស់នោះបញ្ជាក់ថា នោះ​ស្មើនឹងមិនអាច​ឲ្យ​គេ​ប្រកែកបាន ឬអ្នកដែលស្ដាប់លោក ហ៊ុន សែន ដាច់​ខាត​ត្រូវតែទទួលយក។

ការថ្លែងនៅតាមវេទិកាសាធារណៈ របស់លោកនាយករដ្ឋមន្ត្រីកម្ពុជា តែងត្រូវបានធ្វើឡើងរាប់ម៉ោង ហើយ​វិទ្យុ និង​ទូរទស្សន៍ក្នុងស្រុកជាច្រើន ត្រូវផ្អាកកម្មវិធីប្រចាំថ្ងៃរបស់ខ្លួន ដើម្បីប្ដូរមកចាក់ផ្សាយសម្ដី​នោះ​ទាំង​ស្រុង​ទៅវិញ។ ការថ្លែងរបស់លោក ហ៊ុន សែន មានច្រើនសណ្ឋានគ្រប់បែបយ៉ាង ទាំងសារ​នយោបាយ ទាំង​សារ​បច្ចេកទេស ទាំងការវាយប្រហារ។ល។ ដែលវាបានក្លាយជា «វប្បធម៌»ទៅហើយ នៃ​ការ​យក​វេទិកា​បែបនេះ ដើម្បីជាការចំណេញទាំងខាង​រូបភាព​របស់លោកផ្ទាល់ និងខាង​នយោបាយ​នោះ។

នៅអង្គុយជុំតុតែមួយ ក្នុងតៀមដដែល បុរសម្នាក់មានពុកមាត់ស្រមូម បានធ្វើការរំលឹកថា នេះមិនមែន​ជា​លើក​ទីមួយនោះទេ ជាច្រើនលើកច្រើនសារមកហើយ ដែលលោកនាយករដ្ឋមន្រ្តី ហ៊ុន សែន តែងតែ​លើក​យក​បញ្ហាបក្ស បញ្ហាពួក និងបញ្ហាគ្រួសារមកនិយាយក្នុងវេទិការសាធារណៈ។ ជាង៣០ឆ្នាំផ្លាយហើយ នៅ​តែ​គ្មាន​ការកែប្រែទម្លាប់ដ៏អាក្រក់នេះ។ ទម្លាប់នេះ ត្រូវបានបុរសស្រមូមនេះសង្គត់ធ្ងន់ ឬប្រដូច​ទៅនឹង​ពាក្យ​មួយ​ឃ្លា​ថា «គ្មានគ្រូអាចារ្យណាប្រដៅព្រះអង្គបានឡើយ»។

ឯបុរសម្នាក់ទៀត ពន្យល់ថា ក្រោយកិច្ចព្រមព្រៀងថ្ងៃទី២២ ខែកក្កដា គណបក្សនយោបាយទាំងពីរ គួត្រូវរួម​ដៃគ្នាធ្វើការ និងដោះស្រាយបញ្ហាទាំងឡាយ ដើម្បីប្រយោជន៍ប្រជាពលរដ្ឋ សង្គម និងប្រទេសជាតិ។ ចុះ​ហេតុអ្វីគ្រាន់តែលោក កឹម សុខា ចង់ប្រើយន្ដការសភា ដើម្បីទម្លាក់នាយករដ្ឋមន្ត្រី ឬរដ្ឋមន្ត្រីណា ដែល​ប្រព្រឹត្ត​​អំពើពុករលួយ ស្រាប់តែលោកនាយករដ្ឋមន្រ្តី ហ៊ុន សែន មានប្រតិកម្ម ដោយគម្រាមនឹងប្រមូល​តំណាងរាស្ត្រ ពីគណបក្សប្រជាជនកម្ពុជាទាំងអស់ ឲ្យបោះឆ្នោតទម្លាក់ លោក កឹម សុខា ពីអនុប្រធាន​ទី​១ នៃរដ្ឋសភា? បុរស​ចំណាស់​នេះបញ្ជាក់ដូច្នេះថា «នេះមិនមែនជាការគិតពីប្រយោជន៍បុគ្គល និងបក្សពួក​ទេ​ឬ? ចុះ​ប្រយោជន៍​ប្រជាពលរដ្ឋ សង្គម និងប្រទេសជាតិ ទុកនៅទីណា?»៕