បើទោះជាគណបក្សប្រជាជនកម្ពុជា និងគណបក្សសង្រ្គោះជាតិ ក្រោមមូលដ្ឋានផលប្រយោជន៍រួមរបស់ជាតិ និង​ប្រជារាស្រ្ត បានប្តេជ្ញាដូចគ្នាថា នឹងទម្លាយភាពជាប់គាំងផ្នែកនយោបាយឲ្យបាន ត្រឹមការចរចាកម្រិតកំពូល​នៅ​វិមានព្រឹទ្ធសភានៅថ្ងៃស្អែកក៏ដោយ ក៏លទ្ធផលវិជ្ជមាននៅតែជាមន្ទិលសង្ស័យនៅឡើយ ព្រោះគណបក្ស​ទាំងពីរ​បានបង្ហើបឲ្យឃើញពីការខ្វែគំនិតគ្នា លើចំណុចគន្លឹះនៃការជាប់គាំងនយោបាយ តាំងពីមុនការចរចាទៅទៀត។

លោក សម រង្ស៊ី (ខាងឆ្វេង) និងលោក ហ៊ុន សែន មេដឹកនាំនយោបាយនៅកម្ពុជា។ (រូបថតឯកសារ)

ការបោះឆ្នោត - សមាជិកគណៈកម្មការចម្រុះ របស់គណបក្សប្រជាជនកម្ពុជាលោក ជាម យៀប បានបង្ហើបប្រាប់​ការសែត​ក្នុងប្រទេសថា គណបក្សប្រជាជនកម្ពុជា ផ្តល់រូបមន្តពីរយ៉ាង ក្នុងការផ្លាស់ប្ដូរ សមាសភាពគណៈ​កម្មា​ធិការ​ជាតិរៀបចំការបោះឆ្នោត គ.ជ.ប ដល់គណបក្សសង្រ្គោះជាតិ ជាជម្រើស គឺទី១ តាមរូបមន្ត គណបក្សប្រជាជនកម្ពុជា ៣ រូប រីឯគណបក្សសង្គ្រោះជាតិ ២ រូប។ ហើយរូបមន្តទី២-តាមរូបមន្ត គណបក្ស​ប្រជាជនកម្ពុជា ៤ រូប រីឯគណបក្ស​សង្គ្រោះជាតិ ៣ រូប។ ហើយសង្កត់ធ្ងន់ថាក្នុងរូបមន្តទាំងពីរ ខាងលើនេះ គឺគណបក្សប្រជាជនកម្ពុជាជាប្រធាន ហើយ​អនុប្រធាន បានទៅលើគណបក្សសង្គ្រោះជាតិ ។

តែសម្រាប់លោក កឹម សុខា អនុប្រធានគណបក្សសង្រ្គោះជាតិ បានបញ្ជាក់មុនការចារចាថ្ងៃស្អែកនេះថា គណបក្ស​សង្រ្គោះជាតិ បានស្នើឲ្យមានការផ្លាស់ប្ដូរ សមាសភាព គ.ជ.ប នេះ ដែល​គណបក្សសង្រ្គោះជាតិវាយតម្លៃថា​គ្មាន​ភាពឯករាជ្យ ដោយលំអៀងទៅរកគណបក្សប្រជាជនកម្ពុជានោះ ត្រូវតែមានសមាសភាព៩រូប ដែលមកពីខាង​សង្គម​ស៊ីវិល៣រូប គណបក្សប្រជាជនកម្ពុជាស្នើ៣រូប និងគណបក្សសង្គ្រោះជាតិស្នើ៣រូប។

ការរំលិចឲ្យឃើញពីគោលជំហរផ្ទុយគ្នា របស់គណបក្សប្រជាជនកម្ពុជា និងគណបក្សសង្រ្គោះជាតិ លើចំណុច​ស្នូល​នៃការចរចាបាននាំឲ្យមានការព្រួយបារម្ភ ពីលទ្ធផលអវិជ្ជមានក្រោយការចរចាថ្នាក់កំពូល របស់គណបក្សទាំងពីរ។ តែក្តីសង្ឃឹមនៅតែមាន ត្បិតលោក ជាម យៀប មន្រ្តីជាន់ខ្ពស់របស់គណបក្សប្រជាជនកម្ពុជា បានព្រលយឲ្យដឹង​នៅ​ថ្ងៃទី២១ ខែកក្កដា ឆ្នាំ២០១៤ នេះថា៖ «ក្នុងកិច្ចចរចានៅថ្ងៃស្អែកនេះ គណបក្សប្រជាជនកម្ពុជា នឹងពិនិត្យលើ​រូបមន្ត​ថ្មី របស់គណបក្សសង្គ្រោះជាតិ ក្នុងការកែទម្រង់ គ.ជ.ប។»

គួរកត់សម្គាល់ថា គណបក្សប្រជាជនកម្ពុជា និងគណបក្សសង្រ្គោះជាតិ ដែលបានចរចានយោបាយជាបន្តបន្ទាប់ ដើម្បីបញ្ចប់ភាពជាប់គាំងនយោបាយជិតមួយឆ្នាំមកនេះ បានដើរដល់ភាពទាល់ច្រកចុងក្រោយ ត្រឹមគណបក្ស​សង្រ្គោះជាតិ ទាមទាររូបមន្តពីរភាគបី រីគណបក្សប្រជាជនកម្ពុជា ទាមទាររូបមន្តហាសិបបូកមួយ នៃសំឡេង​សមាជិកសភា ដើម្បីអនុម័តសមាសភាព នៃគណៈកម្មាធិការជាតិរៀបចំការបោះឆ្នោត គ.ជ.ប។

បន្ទាប់ពីមិនអាចរកឃើញចំណុចស្របគ្នា ហើយគណបក្សទាំងពីរ(គណបក្សប្រជាជន និងគណបក្សសង្រ្គោះជាតិ) បានសម្រេចដើរចេញពីតុចរចា ដែលហុចឱកាសឲ្យមាន ការផ្ទុះអំពើហិង្សានយោបាយជាថ្មី យ៉ាងជ្រាលជ្រៅ កាល​ពីថ្ងៃទី១៥ ខែកក្កដា ឆ្នាំ២០១៤ គណបក្សប្រជាជនកម្ពុជា និងគណបក្សសង្រ្គោះជាតិ បានប្តេជ្ញាដូចគ្នាថា នឹងបន្តការ​ចរចាកម្រិតកំពូលជាថ្មីនៅថ្ងៃទី២២ ខែកក្កដា ឆ្នាំ២០១៤ នេះ ដើម្បីបញ្ចប់ភាពជាប់គាំងនយោបាយឲ្យបានឆាប់៕