នៅចំពោះបាតុកម្ម ដែលបានធ្វើឡើងជាបន្តបន្ទាប់ ជាពិសេសបាតុកម្ម គាំទ្រគណបក្សប្រជាជនកម្ពុជា និង​ទាមទារឲ្យទម្លាក់លោក កឹម សុខា ឲ្យចេញពីតំណែង ជាអនុប្រធានទីមួយនោះ ទស្សនាវដ្ដីមនោរម្យ.អាំងហ្វូ បានជួបសម្ភាសជាមួយពលរដ្ឋម្នាក់ ដែលកំពុងប្រកបរបរ ជាអ្នករត់ម៉ូតូឌុប និងឈប់រេរានៅមុខរដ្ឋសភា​ជាតិ។ បុរសម្នាក់នេះ ដែលបានផ្ដល់ការថតសម្លេង តែសុំលាក់មិនបញ្ចេញឈ្មោះ បានអះអាងថា នៅកម្ពុជាមាន​បាតុកម្ម បីប្រភេទ៖ បាតុកម្មគាំទ្រគណបក្សប្រជាជនកម្ពុជា បាតុកម្មគាំទ្រគណបក្សសង្គ្រោះជាតិ និង​បាតុកម្ម​របស់ពលរដ្ឋ ដែលសំដែងមតិ មិនពេញចិត្ត ឬទាមទារពីរឿងអ្វីមួយ។

ប៉ុន្តែទោះជាបាតុកម្ម ក្នុងប្រភេទណាក៏ដោយ ក៏លោកបានសង្កេតឃើញថា មានការអនុវត្តច្បាប់«ពីរ» ដោយ​ឡែកពីរគ្នា។ ការអនុវត្តច្បាប់បែបទីមួយ បើបាតុកម្មណា ដែលមាននិន្នាការប្រឆាំងការគ្រប់គ្រង ឬការ​ដោះ​ស្រាយ របស់អាជ្ញាធររដ្ឋ តែងមានការរារាំង ឬការបង្ក្រាប ពីកម្លាំងមានសមត្ថកិច្ចរបស់ជាតិ ដែលដឹកនាំ​ដោយ គណបក្សប្រជាជនកម្ពុជានោះឯង។

លោកបានលើកជាឧទាហរណ៍ថា ដូចជាករណីក្រុមបាតុករ ជាប្រជាពលរដ្ឋ កម្មករ ឬនិស្សិត យុវជន ដែល​ទាមទារ ស្វែងរកកិច្ចដោះស្រាយ ពីរដ្ឋាភិបាលនូវបញ្ហាដីធ្លី, បញ្ហាការកាប់បំផ្លាញព្រៃឈើ, បញ្ហា​ការពារ​ធនធាន​ធម្មជាតិ, បញ្ហាសិទ្ធិសេរីភាព, បញ្ហាប្រាក់ខែ (ដូចជាកម្មករ គ្រូបង្រៀន), បញ្ហាបង្កើត​ច្បាប់​គ្រង់​គ្រង​អង្គការ ឬបញ្ហាទាមទារនានា របស់គណបក្សប្រឆាំងជាដើម រមែងរដ្ឋាភិបាលកម្ពុជា ប្រើប្រាស់កម្លាំងចម្រុះ ឬក្រុមសន្តិសុខតាមបណ្តាខណ្ឌនានា មកធ្វើការរារាំង ចាប់យកសម្ភារៈមានតម្លៃ រហូតប្រើប្រាស់នូវហិង្សា មកលើស្រីភេទ និងកុមារ ហើយឈានដល់ការចាប់ខ្លួន ក្រុមបាតុករភ្លាមៗក៏មាន។

អ្នករត់ម៉តូឌុបរូបនេះ បានបន្តថា ជាក់ស្តែងដូចជាក្រុមយុវជន ត្រឹមតែពីរទៅបីនាក់ប៉ុណ្ណោះ ធ្វើការសម្តែងមតិ ដោយស្នើឲ្យរដ្ឋាភិបាលរក្សា និងការពារតំបន់ធម្មជាតិ អារ៉ែង ខេត្តកោះកុងជាដើម តែងតែមានការរារាំង ដោយ​កម្លាំងសមត្ថកិច្ចរាប់រយនាក់ មានអាវុធយុទ្ធភ័ណ្ឌសឹងគ្រប់ដៃ ជាមួយនឹងរនាំងដែក បិទបាំង និង​ហាម​ឃាត់ មិនឲ្យសម្តែងមតិឡើយ។ ពួកគេ (សមត្ថកិច្ច) ក្រោមហេតុផលប្រឆាំងនឹងអាជ្ញាធរសាធារណៈ ដែល​ក្រុមយុវជននោះ មិនឈប់សម្តែងមតិ តាមការបង្គាប់បញ្ជារបស់ខ្លួន ក៏ត្រូវបានចាប់ និងឃាត់ខ្លួន និងឃុំខ្លួន នៅពន្ធនាគារជាដើម។

លោកបន្តថា ក្នុងពេលកន្លងមកនេះ រាល់«បាតុកម្ម»របស់ប្រជាពលរដ្ឋ ឬយុវជនដែលទាមទារ​ឲ្យរដ្ឋាភិបាល​ដោះស្រាយបញ្ហាអ្វីមួយនោះ ជាមួយនិងមធ្យោបាយ ដើរដោយថ្មើជើង ឬជិះកង់ ម៉ូតូ ឬម៉ូតូកង់បី (ទុកទុក) ក៏តែងតែមានការរារាំង ពីក្រុមសមត្ថកិច្ច ក្រោមការបង្គាប់បញ្ជា របស់សាលារាជធានីភ្នំពេញ ក៏ដូចជា​ក្រុម​សន្តិសុខសណ្តាប់ធ្នាប់ ក្រោមការបញ្ជាដោយសាលាខណ្ឌជាដើម មកចាប់កង់ ម៉ូតូ ឬទុកទុក មិនឲ្យធ្វើ​ចរាចរណ៍​ឡើយ ក្រោមហេតុផលសណ្តាប់ធ្នាប់ល្អសង្គម និងការកកស្ទះចរាចរ ឬការធ្វើដោយគ្មានច្បាប់​អនុញាត។ លោកសង្កេតឃើញថា ជានិច្ចកាល ក្រុមសមត្ថកិច្ច រួមទាំងក្រុមសន្តិសុខរបស់ខណ្ឌ តែងតែមាន​ចំនួនច្រើនជាងក្រុមបាតុករ ដែលទាមទារ និងធ្វើការសម្តែងមតិទៅទៀត។

លោកបានបង្ហាញ នូវការអនុវត្តច្បាប់បែបទី«ពីរ» ចំពោះបាតុកម្មនៅកម្ពុជាថា ជាក់ស្តែងបើបាតុករ ដែល​បានធ្វើបាតុកម្ម តាមបែបគាំទ្រ «រដ្ឋាភិបាល ប្រឆាំងទៅនឹងនណាម្នាក់ ក្រុមណាមួយ ឬបក្សណាមួយ ដែល​ប្រឆាំងនឹងរដ្ឋាភិបាលនោះ អាជ្ញាធរសាធារណៈ ក្រោមការបង្គាប់បញ្ជារបស់លាលាក្រុង ក៏ដូចជាខណ្ឌ មិន​បានធ្វើការរាំរាំងឡើយ។ ផ្ទុយទៅវិញ អាជ្ញាធរថែមទាំងផ្តល់ជាកម្លាំងចិត្ត ឬកិច្ចការពារយ៉ាងមាំទាំ ថែម​ទៀត​ផង។»

ចំពោះច្បាប់ទីពីរ ដែលរដ្ឋាភិបាលកំពុងអនុវត្តនេះ លោកថា វាបានបង្ហាញឲ្យឃើញយ៉ាងច្បាប់ ចំពោះករណី «ហិង្សា»នៅមុខរដ្ឋសភា ដែលជាបាតុកម្មទាមទារ ឲ្យទម្លាក់លោក កឹម សុខា ចេញពីតំណែង ជា​អនុប្រធាន​ទីមួយ នៃរដ្ឋសភាកាលពីថ្ងៃទី២៦ ខែតុលានេះឯង។ លោកបន្តថា បាតុកម្មនៅមុខរដ្ឋសភា នាថ្ងៃទី២៦ ខែ​តុលា​នេះ លោក «មិន»បានឃើញ «វត្តមានសមត្ថកិច្ចចម្រុះ ឬក្រុមសន្តិសុខ នៃខណ្ឌចំការមន ឬខណ្ឌ​ដូនពេញ មករារាំងដូចមុនៗ»នោះឡើយ។ ហើយក៏«មិនមានការដាក់រនាំងដែកបិទ បាំង» មិនឲ្យចូលមុខ​វិមាន​រដ្ឋសភា ដូចបាតុកម្មប្រជាពលរដ្ឋ និងក្រុមយុវជន ដែលតែងចោទថា មាននិន្នាការគាំទ្របក្សប្រឆាំង ដូចមុនៗនោះដែរ។ លោកបន្តថា ក្រុមបាតុករដែលមាននិន្នាការ គាំទ្រគណបក្សប្រជាជនកម្ពុជាទាំងនោះ អាចធ្វើដំណើរ ដោយរថយន្តធុនធំៗ និងរថយន្តធុនទំនើបៗ មកចុះផ្ទាល់ នៅនឹងមុខរដ្ឋសភាតែម្តង។

» សូមទស្សនាវីដេអូ៖

ជាមួយនឹងបញ្ហាខាងលើ ក្នុងនាមលោកជាប្រជាពលរដ្ឋម្នាក់ បានលើកជាសំនួរថា តើកម្លាំងសមត្ថកិច្ច​ចម្រុះ​របស់ក្រសួងមហាផ្ទៃ របស់សាលារាជធានីភ្នំពេញ ឬកម្លាំងសន្តិខុសទាំងអស់របស់ខណ្ឌ បាត់ទៅណាអស់​ហើយ បានជាបណ្តែតបណ្តោយ ឲ្យក្រុមបាតុករទាំងនោះ អាចជិះរថយន្តយ៉ាងគគ្រឹកគ្រេង ចូលដល់មុខ​រដ្ឋសភា​យ៉ាងដូច្នេះ? ឬមួយកម្លាំងទាំងនេះ «រវល់»តែចូលរួមក្នុងបាតុកម្មនេះដែ?

លោកបានអះអាងថា៖ «កុំលើកហេតុផលថាមិនដឹង បើសូម្បីតែលោកនាយករដ្ឋមន្រ្តី ហ៊ុន សែន នៅដល់​ប្រទេសបារាំង ក៏លោកបានដឹងថា នៅកម្ពុជាមាន«បាតុកម្ម»ទម្លាក់លោក កឹម សុខា ពីអនុប្រធានទីមួយ នៃ​រដ្ឋសភាដែរ។ តើរឿងអ្វីក្រុមសមត្ថកិច្ច ថាមិនដឹងនោះ មិនអាចទៅរួចឡើយ!?។ (...) ចុះ​អារឿងក្រុមយុវជន​មាតាធម្មជាតិ, រឿងអ្នកបឹងកក់, រឿងអ្នកបុរីកីឡា, អ្នកថ្មគោល និងរឿងសមាគមន៍ខ្មែរ កម្ពុជាក្រោមជាដើម នាពេលកន្លងមក មិនទាន់ទាំងបានជួបជុំគ្នា ក្នុងគម្រោងសម្តែងមតិ ទាមទារអ្វីមួយផងនោះ ក៏ស្រាប់តែ​មាន​សមត្ថកិច្ចរាប់រយនាក់ ងើបមកទាំងយប់ ធ្វើការត្រៀមចាំបំបែក និងបិទច្រកចេញចូលអស់ទៅហើយ។ (...) ហេតុអ្វីបានជាដឹងលឿនម្លេះ?»

សម្រាប់អ្នកសារព័ត៌មាន របស់ទស្សនាវដ្តីមនោរម្យ.អាំងហ្វូ ដែលបានចុះផ្ទាល់នឹងកន្លែងកើតហេតុ ឬកន្លែង​បាតុកម្មមុខរដ្ឋសភានេះ ក៏បានសង្កេតឃើញដែរថា ក្នុងចំណោមបាតុករទាំងអស់នោះ ភាគច្រើនជា​សន្តិសុខ មកពីតាមបណ្តាខណ្ឌនានា និងមានបុគ្គលមួយចំនួន ចេញពីទីស្តីការគណរដ្ឋមន្រ្តីផងដែរ។ ក្នុង​ចំណោម​បាតុករនោះ ក៏មានវត្តមាន លោកអភិបាលរងខណ្ឌចំការមន ចូលរួមផងដែរ។ ហើយអភិបាល​រង​រូប​នេះ ថែម​ទាំងហាមឃាត់ មិនឲ្យអ្នកយកព័ត៌មាន របស់ទស្សនាវដ្តីចូលយកព័ត៌មានឡើយ ក្រៅពីក្រុមបាតុករ ដែល​មាន​សញ្ញាសម្គាល់របស់ពួកគេ។ ក្រៅពីនោះ នៅមានប្រធានក្រុមសន្តិសុខ សណ្តាប់ធ្នាប់ខណ្ឌដូនពេញ ដែល​ធ្លាប់​ព្យាយាម និងប៉ុនប៉ងចាប់យកការមេរ៉ា របស់ទស្សនាវដ្តីកាលពីបាតុកម្ម នៅវត្តភ្នំដើមឆ្នាំ២០១៥​នេះ​ទៀត​ផង៕