លោក ឌច វ៉េស្កុត (Doug Westcott) អាយុ៥៥ឆ្នាំ បានចិញ្ចឹមឆ្មារប្រមាណជា៣៥ក្បាល រស់យ៉ាងរហង់​នៅ​ក្នុងផ្ទះ តែបានបង្កឲ្យមានក្លិននិងរោមឆ្មារ ធ្វើឲ្យទ្រាំមិនបាន រហូតដល់ភ្នាក់ងារនគរបាលនៃក្រុង ប៉ាល់ប៊េច (Palm Beach) ដែលស្ថិតនៅក្នុងផ្នែកអាគ្នេយ៍នៃសហរដ្ឋអាមេរិក ត្រូវពាក់របាំងការពារមាត់ និងច្រមុះ​ដើម្បី​ធ្វើអន្តរាគមន៍ ពេលចូលទៅក្នុងគេហដ្ឋានរបស់លោក វ៉េស្កុត កាលពីថ្ងៃពុធទី១០​ ខែកញ្ញា កន្លងទៅ។ នេះ​បើ​តាមរបាយការណ៍ របស់សារព័ត៌មានតំបន់ The Palm Beach Post។

សាកសពសត្វឆ្មារប្រមាណជា ៥០ក្បាល ត្រូវបានរក្សាទុកឲ្យកក នៅក្នុងទូរទឹកកកចំនួនបួនគ្រឿង នៅ​ក្នុង​ផ្ទះរបស់បុរសដែលគេទើបនឹងដឹង ពីជីវិតរបស់គាត់ក្នុងពេលនេះ។

អ្នករស់នៅក្បែរខាងរបស់លោក វ៉េស្កុត បានលើកឡើងចរិកលក្ខណៈរបស់លោក ថាមានភាពចម្លែក ចេញ​ដើរទៅខាងក្រៅដោយគ្មានពាក់អាវ ហើយបានសាកល្បងឲ្យអំណោយបន្ដិចបន្តួច ទៅឲ្យកុមារៗ។ បើតាម​អ្នកជិតខាងដដែល បាននិយាយទៀតថា ក្លិនដ៏អាក្រក់ពិបាកទ្រាំ បានភាយចេញពីផ្ទះលោក វ៉េស្កុត ហើយ​ពួកគេបានបានឃើញសត្វឆ្មារជាច្រើន បានចេញចូលផ្ទះបុរសនេះ យ៉ាងសេរី។

អ្នកទទួលខុសត្រូវមួយរូប មកពីអង្គការក្នុងតំបន់ ជំនាញខាងការគាំពារសត្វ បានពន្យល់ថា លោក ឌច វ៉េស្កុត បានបដិសេធមិនចាកចោល ឆ្មាររបស់គាត់ទាំងជាង៣០ក្បាលនេះទេ ទោះក្រុមនគរបាលបាន​កំហិត​យ៉ាង​ណា​ក៏ដោយ។ តែចៅក្រមមួយរូប នឹងត្រូវធ្វើការកាត់​សេចក្ដី ពី​អនាគត​របស់​ពួកសត្វឆ្មារនៅរស់ទាំង​នោះ នៅ​ក្នុង​រវាង​៣០ថ្ងៃខាងមុខ។

អ្នកទទួលខុសត្រូវរូបនេះ បាននិយាយថា គេគួរតែធ្វើកោសល្យវិច្ឆ័យ ទៅលើសាកសពសត្វឆ្មារទាំងនោះ តែ​ដោយសារអង្គការលោក មិនមានថវិកាគ្រប់គ្រាន់ ការវិភាគដើម្បីចង់ដឹងពីមូលហេតុ នៃការស្លាប់​របស់​ពួក​សត្វ​ឆ្មារ អាចធ្វើបានត្រឹមតែ២ទៅ៣ក្បាលប៉ុណ្ណោះ៕