អាជ្ញាធរតំបន់បានថ្លែងឲ្យដឹងថា កុមារដែលមានអាយុពី៣ខែដល់១០ឆ្នាំ ត្រូវបានបាញ់សម្លាប់ដោយជីតា​របស់​ខ្លួន។ ជនសង្ស័យ មានឈ្មោះថា ដុនឆាល ស្ពីរីត (Don Charles Spirit) អាយុ៥១ឆ្នាំ ជាអ្នកទូរស័ព្ទ​ទៅ​ប្រាប់​ផ្នែកអន្តរាគមន៍បន្ទាន់ របស់កងកម្លាំងអាជ្ញាធរ។ ប៉ុន្តែនៅពេល ដែលកងកម្លាំងបានទៅដល់​កន្លែង​កើត​ហេតុ បុរសវ័យកណ្ដាលរូបនេះ បានសម្លាប់ខ្លួនបាត់ទៅហើយ។

មេភូមិ លោក រ៉ូប៊ែរ ស៊ូល្ត៍ (Robert Schultz) បានថ្លែងប្រាប់អ្នកសារព័ត៌មានថា៖ «ខ្ញុំមិនដែលឃើញឧក្រិដ្ឋកម្ម ដែលកើតឡើងក្នុងទ្រង់ទ្រាយបែបនេះទេ។ នៅក្នុងភូមិដ៏តូចនោះ យើងមានភាពស្រយ៉ុតស្រយ៉ង់យ៉ាងខ្លាំង​ជាមួយនឹងហេតុការណ៍នេះ។ សមាជិកក្នុងភូមិ សុទ្ធសឹងជាបងប្អូនជាប់សាច់ឈាមគ្នាទាំងអស់។» ប៉ុន្តែ​ដោយ​ការស៊ើបអង្កេតកំពុងដំណើរការធ្វើនៅឡើយ លោក រ៉ូប៊ែរ មិនអាចពន្យល់ប្រាប់ ឲ្យបាន​លំអិត​ជាង​នេះ​បាន​ឡើយ។

តាមសារព័ត៌មានក្នុងតំបន់បានរាយការណ៍ឲ្យដឹងថា កាលពីឆ្នាំ២០០១ ជនសង្ស័យធ្លាប់បានសម្លាប់​ដោយ​ចៃដន្យ កូនប្រុសរបស់ខ្លួនម្នាក់ ដែលកាលនោះទើបនឹងមានអាយុ៨ឆ្នាំ នៅពេលចេញទៅ​បរបាញ់​សត្វ។ នៅ​ចំពោះតុលាការ ជនសង្ស័យបានទទួលកំហុសរបស់ខ្លួន ប្ដូរនឹងការផ្ដន្ទាទោស ក្នុងកម្រិតស្រាលមួយ។

នេះជាករណីបាញ់សម្លាប់ ដោយប្រើអាវុធថ្មីមួយទៀត ក្នុងចំណោមករណីបាញ់សម្លាប់រាប់មិនអស់ នៅ​សហរដ្ឋអាមេរិក។ សហព័ន្ធស៊ើបអង្កេតរបស់ប្រទេសនេះ ហៅកាត់ថា អេសប៊ីអាយ (FBI) បានផ្ដល់​របាយ​ការណ៍​ថា នៅឆ្នាំ២០១១ មនុស្សចំនួនជាង១សែននាក់ ត្រូវបានបាញ់សម្លាប់។ មួយចំនួនធំពីក្នុងចំណោម​ឧក្រិដ្ឋកម្ម​ទាំងនោះ បានកើតឡើងនៅក្នុងសាលារៀន។

គួររំលឹកដែរពីព្រឹត្តិការណ៍ដ៏រន្ធត់ នៃការបាញ់សម្លាប់មួយកាលពីខែមុន ដោយក្មេងស្រីម្នាក់អាយុ៩ឆ្នាំ បាន​ទៅរៀនបាញ់កាំភ្លើង តែបានរាកៃបែរមកបាញ់សម្លាប់បុរស ដែលកំពុងបង្ហាត់នាង ឲ្យចេះបាញ់​កាំភ្លើង​នោះ​ទៅវិញ៕