នៅប្រទេសអ៊ីតាលី ស្ត្រីម្នាក់បានពរពោះកូនភ្លោះ របស់អ្នកដទៃ តាំងពីខែធ្នូឆ្នាំទៅម៉ិញមក បន្ទាប់ពីការផ្លាស់ប្ដូរ មេ​ជីវិតគ្នាមួយ ត្រូវបានធ្វើដោយមិនសមប្រកប នៅពេលដែលស្ត្រីរងគ្រោះរូបនេះ បានបណ្ដុះមេជីវិត​ញី-ឈ្មោល​ដើម្បី​បានពរពោះ ព្រោះតែចង់បានកូន។

គភ៌របស់ស្ត្រីមានផ្ទៃពោះ។ (រូបថត AFP)

វេជ្ជសាស្ត្រ -  មណ្ឌលវេជ្ជសាស្ត្រមួយ ស្ថិតក្នុងនៅរដ្ឋធានីរ៉ូម ប្រទេសអ៊ីតាលី ដែលជាដើមហេតុនៃការប្រព្រឹត្តិ​កំហុសដ៏ធ្ងន់ធ្ងរនេះ ត្រូវបានដាក់ឲ្យស្ថិតក្រោមការឃ្លាំមើល របស់ប្រព័ន្ធត្រួតពិនិត្យសុខាភិបាលរបស់ប្រទេស ហើយ​សកម្មភាព​ជំនាញរបស់មណ្ឌលសុខភាព ដែលទាក់ទងនឹងការផ្លាស់ប្ដូរមេជីវិត ក៏ត្រូវបានផ្អាកដែរ។ នៅថ្ងៃអាទិត្យ​ទី១៣ ខែមេសាកន្លងមកនេះ ក្រសួងសុខាភិបាល បានបញ្ជូនភ្នាក់ងារអធិការកិច្ច ទៅកាន់មណ្ឌលសុខភាព ដែល​មានឈ្មោះថាមន្ទីរពេទ្យ សេនឌ្រូ ពែរនីទី (Sandro Pertini) ដើម្បីស្វែងរកពន្លឺពាក់ព័ន្ធនឹងការប្រព្រឹត្តិកំហុស។ នេះបើ​តាមសេចក្ដីរាយការណ៍ របស់សារព័ត៌មាន ឡាស្តាំប៉ា (La Stampa) ក្នុងថ្ងៃដដែល។

កាលពីថ្ងៃទី៤ ខែធ្នូកន្លងទៅ គូរស្នេហ៍ចំនួនបួនគូរ ត្រូវបានមន្ទីរពេទ្យឯកទេសខាងផ្លាស់ប្ដូរមេជីវិតនេះ ធ្វើការដក​ចេញនិងចាក់បញ្ចូលនូវមេជីវិត ដើម្បីតម្រូវចិត្តរបស់គូរស្នេហ៍ណាមួយ ដែលចង់បានកូន។ ស្ត្រីបីនាក់បានធ្លាក់ខ្លួន​មានគភ៌ បន្ទាប់ពីពេលនោះមក។ គេនៅមិនទាន់ដឹងពីមូលហេតុពិតប្រាកដ ដែលបង្កឲ្យមានកំហុសនេះទេ។ ប៉ុន្តែ​គេ​អាចយល់បានថា នោះទំនងជាមានការភ័ន្ដច្រឡំ យ៉ាងហោចណាស់ទៅលើស្ត្រីពីរនាក់ នៅពេលដែលមន្ត្រីជំនាញ​របស់មន្ទីរពេទ្យ បានផ្លាស់ប្ដូរមេជីវិត។

ក្រុមគ្រូពេទ្យ ទើបនឹងដឹងរឿងនេះ នៅពេលដែលគេបានធ្វើការវិភាគ«ធាតុផ្សំ» ទៅលើកូនភ្លោះទាំងគូ តែបែរជា​មិន​ត្រូវគ្នានឹង«ធាតុផ្សំ»របស់ឪពុកនិងម្ដាយរបស់ទារកទៅវិញ។ អ្វីដែលគួរឲ្យសោកស្ដាយនោះ គឺគេមិនអាចវិល​ត្រឡប់​ក្រោយវិញបានឡើយ ដោយសារតែកូនភ្លោះទាំងពីរ មានរូបរាងជាទារកពេញលក្ខណៈ នៅក្នុងគភ៌ទៅហើយ។ នៅ​បស្ចឹមលោក ការរំលូតកូនដែលមានរូបរាងជាទារក ជាឧក្រិដ្ឋកម្មដែលមានទោសធ្ងន់ធ្ងរ ពីបទមនុស្សឃាត។ ស្ត្រីពីរ​នាក់​ផ្សេងទៀត ដែលធ្លាក់ខ្លួនមានគភ៌ដែរនោះ ក៏ត្រូវបញ្ជូនឲ្យទៅធ្វើការវិភាគនេះ ដូចគ្នា ដើម្បីកំណត់ឲ្យច្បាស់ថា មន្ត្រីគ្រូពេទ្យមិនបានធ្វើខុសអ្វីទៀតទេ។

ការប្រព្រឹត្តិកំហុសរបស់ក្រុមគ្រូពេទ្យ បានបង្កឲ្យមានការជជែកគ្នាយ៉ាងផុលផុស នៅក្នុងប្រទេស។ តើនរណាទៅ ជាឪពុកម្ដាយពិតប្រាកដរបស់កូនភ្លោះ ដែលនឹងកើតក្នុងពេលខាងមុខនេះ? គណៈកម្មាធិការស៊ើបអង្កេតមួយ បាន​ធ្វើការកោះប្រជុំជាបន្ទាន់ នៅថ្ងៃច័ន្ទនេះ ដើម្បីលើកឡើងពីបញ្ហាពាក់ព័ន្ធទាំងអស់ ដែលត្រូវដោះស្រាយនៅ​មុន​ការ​ចាប់កំណើតរបស់ទារក៕

-------------------------------------------------
ដោយ ឈូករ័ត្ន (ទំនាក់ទំនង៖ [email protected]) - ប៉ារីស ថ្ងៃទី១៤ ខែមេសា ឆ្នាំ២០១៤