បើតាមអ្នកជំនាញជាច្រើននាក់ បានថ្លែងឲ្យដឹងថា អ្នកស្រី ដួងចៃ សាម៉ាក់សាម៉ាម ជាមនុស្សតែម្នាក់គត់ ក្នុង​ពិភពលោក​យើងនេះ ដែលបានកើតជំងឺដ៏ចម្លែកនេះ។ ជំងឹដែលបានធ្វើឲ្យដៃទាំងទ្វេរបស់អ្នកស្រី ចាប់ពី​ដើម​​ដៃ​រហូត​ដល់ចុងម្រាម រីកធំឡើង និងមានទម្ងន់ដ៏ធ្ងន់អស្ចារ្យ។ ស្ត្រីចំណាស់ជាតិថៃរូបនេះ បាន​ត្អូញ​​ឡើង​ថា៖ «ដៃ​ខ្ញុំ​ទាំងពីរ មានទម្ងន់ធ្ងន់ណាស់ ធ្ងន់រហូតដល់ខ្ញុំមិនអាចលើកវា មកប្រើកក់សក់ ឬងូតទឹក។ ពិបាក​មែនទែន។ សូម្បីតែស្លៀកពាក់ ក៏ពិបាក ហើយវាធ្វើឲ្យឈឺផ្សារណាស់។»

អ្នកជំនាញខាងវេជ្ជសាស្ត្រ បានអះអាងទៀតថា នៅក្នុងដៃទាំងគូរនេះ មានដុំខ្លាញ់ជាច្រើន ដែល​ចេះតែ​ពង្រីក​ខ្លួនព័ទ្ធជុំវិញ ដៃរបស់អ្នកស្រី ដួងចៃ។ តាំងពីអ្នកស្រីមានអាយុ២៥ឆ្នាំមក អ្នកស្រីតែងបាន​ឆ្លងកាត់​ការ​វះកាត់ ជាច្រើនលើកច្រើនសារ ដើម្បីបូមយកដុំខ្លាញ់ទាំងនេះចេញ តែវានៅតែមានលទ្ធភាព ក្នុង​ការ​ពង្រីក​ខ្លួន​ឡើង​មក​វិញ។

គ្រូពេទ្យរបស់អ្នកស្រី បានលើកឡើងពីមធ្យោបាយតែមួយគត់ ដើម្បីជួយអ្នកស្រីបាន នោះគឺត្រូវ«កាត់ដៃ»​នេះ​ចោល។ តែមធ្យោបាយនេះ មិនត្រូវបានអ្នកស្រី ដួងចៃយល់ស្របឡើយ នៅក្នុងពេលនេះ បើទោះជា​ការ​ឈឺ​ចាប់ដែលចេញមកពីដៃទាំងពីរ បានកើនឡើងកាន់តែខ្លាំង និងបង្កបញ្ហាគ្រប់បែបយ៉ាង រំខាន់ដល់ជីវិត​របស់​គាត់។ អ្នកស្រី បានរំលឹកឡើងវិញថា៖ «ម្ដាយខ្ញុំបានប្រាប់ខ្ញុំថា ខ្ញុំមានបញ្ហានេះតាំងពីកំណើតមក ខ្ញុំ​ភ័យ​ខ្លាច​ណាស់ រហូតមិនបានទៅរៀនសូត្រនឹងគេ។ អញ្ចឹងហើយបានខ្ញុំ មិនចេះអានអក្សរនឹងគេ។»

ក្នុងពេលនេះ ដើម្បីបន្លប់នូវទុក្ខព្រួយ បូករួមនឹងការឈឺចាប់នោះផង អ្នកស្រីនៅតែព្យាយាមធ្វើការ និង​លក់​ដូររបស់របរបន្តិចបន្តួច ក្នុងក្ដីសង្ឃឹមថា នៅថ្ងៃណាមួយវេជ្ជសាស្ត្រ អាចនឹងមានលទ្ធភាព រករបកគំហើញថ្មី អាចព្យាបាលដៃរបស់គាត់បាន៕