នៅព្រឹកថ្ងៃទី១១ខែកញ្ញាឆ្នាំ២០១៥ មានករណីភ្ញាក់ផ្អើលមួយ នៅតាមបណ្តោយផ្លូវ ១៣៨ ក្រុមទី៣១ ភូមិ៥ សង្កាត់វាលវង់ ខណ្ឌ៧មករា រាជធានីភ្នំពេញ ក្នុងផ្ទះលេខ១Eo ដោយសារបុរសម្នាក់ បានដេកស្លាប់ ទាំង​គ្មាន​មូលហេតុ។

ប្រភពព័ត៌មានបានឲ្យដឹងថា សាកសពដែលស្លាប់ឈ្មោះ ស៊ុង ភី អាយុ២២ឆ្នាំ ស្នាក់នៅក្នុងហាងម៉ូតូ អាស័យដ្ឋាន​ខាងលើ។ ប្រភពបន្តថា គ្មានអ្នកណាម្នាក់បានដឹងថា មានហេតុការណ៍អ្វីកើតឡើង មុនពេល​បុរសនេះស្លាប់នោះទេ ព្រោះសាកសពនៅតែម្នាក់ឯង រហូតដល់ម៉ោង៧ ទើបគេប្រទះឃើញសព។

ក្រោយពីមានការឆោឡោ ក្រុមមន្រ្តីសមត្ថកិច្ចមូលដ្ឋាន បានមកដល់ទីតាំងកើតហេតុ និងបានធ្វើ​កោសល្យ​វិច័យ​ភ្លាមៗដែរ។ មន្ត្រីសមត្ថកិច្ចទាំងនោះ បានសន្និដ្ឋានក្នុងជំហានដំបូងថា បុរសខាងលើបានស្លាប់ ដោយ​សារខ្យល់គរ គ្មានអ្នកជួយ។ ប៉ុន្តែសមត្ថកិច្ចមិនអាចដឹងថា បុរសរូបនេះបានស្លាប់ តាំង​ពីពេលណា​នោះ​ទេ។

ក្រោយពីបញ្ចប់ ការត្រួតពិនិត្យសាកសព សមត្ថកិច្ចមូលដ្ឋានបានប្រគល់សព ឲ្យទៅក្រុមគ្រួសារ ដើម្បី​យក​ទៅធ្វើបុណ្យ នៅស្រុកកំណើត ស្ថិតភូមិលើកដែក ឃុំកោះធំ ស្រុកស្អាង ខេត្តកណ្តាល៕