ប៉ុន្មានឆ្នាំចុងក្រោយនេះ ភោជនីយដ្ឋាននៅក្នុងប្រទេសកម្ពុជា មានសន្ទុះកើនឡើងយ៉ាងច្រើនគួរសម ទន្ទឹមនឹងការកើនឡើងនេះ ក៏មានបញ្ហាប្រឈមមួយចំនួន កើតមានផងដែរ ដែលធ្វើឱ្យវិស័យភោជនីយដ្ឋាន ​បង្កើតក្នុងប្រទេសកម្ពុជា ពិបាកនឹងប្រកួតប្រជែងជាមួយ ភោជនីយដ្ឋានដែលមានឈ្មោះល្បីៗ ពីក្រៅស្រុក។

ក្នុងសន្និសីទសារព័ត៌មានមួយ ដែលរៀបចំឡើងដោយម្ចាស់ភោជនីយដ្ឋានផាកកាហ្វេ កាលថ្ងៃទី២០ ខែ​សីហា​នេះអនុប្រធានសមាគមភោជនីយដ្ឋានកម្ពុជា លោក ចាន់ ស៊ី បានលើកឡើងថា បញ្ហាប្រឈមដែល វិស័យភោជនីយដ្ឋានក្នុងស្រុក កំពុងជួបបញ្ហាចំបងនោះ គឺកង្វះខាតធនធានមនុស្ស និងមានកត្តាមួយចំនួនទៀតពាក់ព័ន្ធនឹងវិស័យនេះ ដែលនាំឱ្យធ្លាក់ចុះនូវគុណភាពចំណីអាហារ។

បើតាមរបាយការណ៍ស្ទង់មតិ ធ្វើទៅលើថ្នាក់ដឹកនាំភោជនីយដ្ឋាន ក្នុងរាជធានីភ្នំពេញសម្រាប់ឆ្នាំ២០១៤ ដែលបានចេញផ្សាយដោយផាកការហ្វេ បានឱ្យដឹងថា បញ្ហាកង្វះធនធានមនុស្សនេះ ក៏អាចបណ្ដាលឲ្យភោជនីយដ្ឋាន ក្នុងស្រុកមួយចំនួនបិទទ្វារដែរ ខណៈថ្នាក់ដឹកនាំភោជនីយដ្ឋាន ៥០% ពិបាក ក្នុងការបំពេញចិត្តអតិថិជន។

ពាក់ព័ន្ធនឹងបញ្ហានេះដែ លោក ចាន់ ស៊ី បានបញ្ជាក់បន្តថា មូលហេតុដែលនាំឱ្យមានបញ្ហា កង្វះធនធានមនុស្ស ដោយសារតែអ្នក ដែលធ្វើនៅក្នុងភោជនីយដ្ឋាន ភាគច្រើនមិនបានចេញ ពីសាលាបណ្តុះបណ្តាលនោះទេ។ ភាគច្រើននៃអ្នកធ្វើការក្នុងវិស័យភោជនីយដ្ឋាន ក្នុងនោះមានតែក្រុមនិស្សិត ដែលរៀនជំនាញផ្សេងៗ ដែលមិនបានចាត់ទុកការងារក្នុងវិស័យនេះ ជាកាងារអាជីពរបស់ពួកគេនោះទេ គឺធ្វើបណ្ដោះអាសន្នប៉ុណ្ណោះ ហើយពេលណាពួកគេ ទទួលបានការងារត្រូវជំនាញ នោះនឹងពួកបោះបង់ការងារ ក្នុងភោជនីយដ្ឋានចោល។ លោកបន្តដំណោះស្រាយក្នុងបញ្ហានេះ រដ្ឋាភិបាលគួរតែជួយគិតគូរអំពី ដោយជួយបង្កើតធនធានមនុស្ស តាមរយៈការបើកវគ្គបណ្តុះបណ្តាលបន្ថែម ដើម្បីផ្តល់ជំនាញដល់អ្នកដែល ចង់ធ្វើការក្នុងភោជនីយដ្ឋាន៕