ក្រោមសមាសភាព១០នាក់ នៃភាគីទាំងសងខាង របស់បក្សទាំងពីរ នាល្ងាចថ្ងៃទី១៨ ខែសីហា ឆ្នាំ២០១៤ លោក ប៊ិន ឈិន ដឹកនាំគណបក្សប្រជាជនកម្ពុជា ឯលោក គួយ ប៊ុនរឿន ដឹកនាំគណបក្ស​សង្គ្រោះជាតិ បាន​នាំក្រុមបច្ចេកទេសរបស់ខ្លួន នាវិមានរដ្ឋសភា ស្តីពីការរៀបចំ និងការប្រព្រឹត្តទៅនៃ​ស្ថាប័ន គ.ជ.ប ព្រម​ទាំង​សេចក្តីព្រាងច្បាប់ស្នើវិសោធនកម្ម ច្បាប់បោះឆ្នោតជ្រើសតាំងតំណាងរាស្ត្រ។

សមាសភាពមន្រ្តីជាន់ខ្ពស់សំខាន់ៗនៃគណបក្សទាំងពីរ ដែលបានចូលរួមមាន ខាងគណបក្សសង្គ្រោះជាតិ លោក គួយ ប៊ុនរឿន, លោក អេង ឆៃអៀង, លោក សុន ឆៃ, លោក ញ៉ែម ប៉ុញ្ញរិទ្ធ, លោក ហូរ វ៉ាន់ និងកញ្ញា គឹម មនោវិទ្យា។ ឯខាងគណបក្សប្រជាជនកម្ពុជារួមមាន លោក ប៊ិន ឈន, លោក ព្រំ សុខា, លោក ជាម យៀប, លោក កើត រិទ្ធិ, លោក សក់ សេដ្ឋា និងលោក សិក ប៊ុនហុក។

មន្ត្រីជាន់ខ្ពស់គណបក្សសង្គ្រោះជាតិម្នាក់ បានលើកឡើង មុននឹងបន្តកិច្ចពិភាក្សានេះថា ដើម្បីឲ្យស្រប​តាម​ស្មារតីកិច្ចព្រមព្រៀងកាលពីថ្ងៃទី២២ ខែកក្កដា ក្រុមការងារវិសោធនកម្មរដ្ឋធម្មនុញ្ញរបស់បក្សទាំងពីរ បាន​ធ្វើការផ្តោតសំខាន់ទៅលើសេចក្តីស្នើច្បាប់ ស្តីពីការប្រព្រឹត្តទៅរបស់ស្ថាប័នគ.ជ.ប និងសេចក្តីព្រាង​ច្បាប់​នៃ​ការស្នើវិសោធនកម្មច្បាប់បោះឆ្នោត ជ្រើសតាំងតំណាងរាស្ត្រ ជាបន្តបន្ទាប់។

សូមរំលឹកថា កាលពីថ្ងៃទី១១ ខែសីហា ក្រុមការងារវិសោធនកម្មរដ្ឋធម្មនុញ្ញ របស់បក្សទាំងពីរខាងលើ បាន​បញ្ចប់កិច្ចប្រជុំរបស់ពួកគេ ជា​មួយ​នឹងគោលការណ៍បីចំណុច ដែលត្រូវបានយកមកពិភាក្សា និងសម្រេច​។

គោលការណ៍ទាំងបីនោះ រួមមាន អនុម័តសេចក្តីព្រាងច្បាប់រដ្ឋធម្មនុញ្ញ ស្តីពីវិសោធនកម្មមាត្រា៧៦ និងការ​បង្កើតជំពូក១៥ថ្មី ស្តីពីអង្គការៀបចំការបោះឆ្នោត និងធ្វើការបោះឆ្នោតជ្រើសតាំងសមាសភាពគ.ជ.បថ្មី។ រៀបចំសេចក្តីព្រាងសេចក្តីស្នើច្បាប់ ស្តីពីការរៀបចំ និងការប្រព្រឹត្តទៅនៃស្ថាប័ន គ.ជ.ប និងរៀបចំសេចក្តី​ព្រាងសេចក្តីស្នើច្បាប់ស្តីពីវិសោធនកម្មច្បាប់ ស្តីពីការបោះឆ្នោតជ្រើសតាំងតំណាងរាស្ត្រ។ និងទីបី​ ស្វ័យ​ភាព​​នៃការរៀបចំមន្ត្រីបោះឆ្នោត នៅថ្នាក់ក្រោមជាតិ តាមរយៈការគំទ្រនៃតំណាងបក្សទាំងពីរ សម្រេច​ដាក់​ក្នុងសេចក្តីស្នើច្បាប់ស្តីពីការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត។