មិនមែនតែគណបក្សប្រជាជនកម្ពុជានោះទេ តែឥឡូវនេះគណបក្សសង្រ្គោះជាតិ ក៏ផ្តើមបង្ហាញនយោបាយ​គ្រួសារ​និយម ឬបក្សពួកនិយម ក្នុងការទទួលបានមុខតំណែងសំខាន់នោះដែរ។ មុខតំណែង ដែលមិនស័ក្ដិសមនឹងទទួល​បាន ហើយត្រូវទទួលរងការរិះគន់ពីសាធារណៈមតិ។

កញ្ញា កឹម មនោរវិទ្យា កំពុងទទួលទានបាយ នៅក្នុងកន្លែងដ៏ល្អមួយ ខណៈឪពុករបស់កញ្ញា  លោក កឹម សុខា កំពុង​ទទួលទានបាយ នៅ​លើស្មៅតាមចិញ្ចើមថ្នល់ ក្នុងពេលឃោសនាបោះឆ្នោតកន្លងមក។ (រូបថតផ្តិតពីទំព័រហ្វេសប៊ុក)

គ្រួសារនិយម - បន្ទាប់ពីធ្លាយព័ត៌មានក្រៅផ្លូវការ តែឥឡូវសឹងតែប្រែជាផ្លូវការដែរ ចំពោះលទ្ធភាពដែលគណបក្ស​សង្រ្គោះ​ជាតិ អាចនឹងដាក់កញ្ញា កឹម មនោវិទ្យា កូនស្រីរបស់លោក កឹម សុខា អនុប្រធានគណបក្សសង្រ្គោះជាតិ ឲ្យកាន់​តំណែង​ជាសមាជិកដឹកនាំ គណៈកម្មាធិការជាតិរៀបចំកាបោះឆ្នោត គ.ជ.ប។ នេះបើតាមការអះអាងដោយ​ផ្ទាល់មាត់ ​លោក សម រង្ស៊ី ប្រធានគណបក្សសង្រ្គោះជាតិ។

ឆ្លើយទៅនឹងសំណួរដែលថាកញ្ញា កឹម មនោវិទ្យា អាចជាបេក្ខភាពក្នុងសមាជិក គ.ជ.ប ឬយ៉ាងណានោះ លោក សម រង្ស៊ី ប្រធានគណបក្សសង្រ្គោះជាតិ បានពន្យល់ក្នុងកិច្ចសម្ភាសជាមួយវិទ្យុបារាំង ផ្សាយជាខេមរភាសារថា៖ «អាចជា​បេក្ខនារីមួយរូប។ តែគណបក្សសង្រ្គោះជាតិ នៅមិនទាន់ជ្រើសបេក្ខភាពណាមួយជាស្ថាពរនៅឡើយទេ។ (...) តែនឹង​បើកចំហឲ្យបានច្រើន។»

សម្រាប់កញ្ញា កឹម មនោវិទ្យា វិញ បានសារភាពថា នាងពិតជាចាប់អារម្មណ៍ទទួលតំណែង ជាសមាជិក​ គ.ជ.ប.។ ថ្លែង​ប្រាប់​ប្រព័ន្ធសារព័ត៌មានក្នុងប្រទេសកម្ពុជា កូនស្រីច្បងរបស់លោក កឹម សុខា រូបនេះ បានសង្កត់ធ្ងន់ថា​មូលហេតុ​ដែល​​នាងចង់ទទួលបានតំណែងជាសមាជិក គ.ជ.ប ព្រោះតំណែងនេះ អាចឲ្យនាងជួយដល់ប្រទេសកម្ពុជាបានច្រើន តាមរយៈការពង្រឹងស្ថាប័នឯករាជ្យនៅកម្ពុជា។

ប្រសិនបើ កញ្ញា កឹម មនោវិទ្យា ដែលមិនធ្លាប់កាន់ការនៅក្នុងរដ្ឋការម្ដងណាសោះ បានជាប់ជាសមាជិក នៅក្នុង​ចំណោមថ្នាក់ដឹកនាំសំខាន់ៗទាំង៩រូបរបស់ គ.ជ.ប នោះមែន ករណីនេះត្រូវបានក្រុមអ្នកតាមដាន​ស្ថានការណ៍​សង្គមកម្ពុជា ផ្ដល់ការវាយតម្លៃជាពីរចំណុច៖ «នោះគឺ​ការ​មិនទុកចិត្តអ្នកដទៃ ក្រៅពីកូនស្រីក្រុមគ្រួសាររបស់ខ្លួន និងឆ្លុះ​បញ្ចាំងពីដំបៅរស៊ីរូងផ្ទៃក្នុងរបស់សង្គមកម្ពុជា ដែល​កែមិនឡើង ព្រោះបើសូម្បីតែក្រុមគណបក្សប្រឆាំង ដែល​អួតអាងពីភាព​ស្អាត​ស្អំនោះ ក៏មានបញ្ហាបក្ខពួកនិយម ឬគ្រួសារនិយមនេះ នៅ​ជាប់ស្អិតដូចជាគណបក្ស​ប្រជាជន​កម្ពុជា ដែលកំពុង​កាន់អំណាច​ដែរ»។

គណបក្សប្រជាជនកម្ពុជា បានផ្តល់តំណែងសំខាន់​ក្នុងជួររដ្ឋាភិបាល កម្លាំងប្រដាប់អាវុធ ជាដើម ដល់យុវជន​ជំនាន់​ក្រោយ ដែលភាគច្រើនជាសាច់ញាតិជិតស្និត របស់មន្រ្តីជាន់ខ្ពស់​គណបក្សប្រជាជនកម្ពុជា។ ការផ្ទេរតំណែងនេះ ត្រូវបានមន្រ្តីគណបក្សសង្រ្គោះជាតិ និងអង្គការសង្គមស៊ីវិលមួយចំនួនរិះគន់ ពីប្រព័ន្ធគ្រប់គ្រងពោរពេញដោយភាព​អយុត្តិធម៌ ព្រោះអ្នកដែលមានលក្ខណៈសម្បត្តិល្អជាងនេះ មិនងាយនឹងទទួលបានតំណែងសំខាន់ៗដូចនេះទេ។

ប្រធានអង្គការតម្លាភាពកម្ពុជាលោក ព្រាប កុល បានចាត់ទុកការ ដែលគណបក្សនយោបាយណាមួយ ដែលហ៊ាន ដាក់ឈ្មោះកូន ឬសាច់ញាតិបង្កើត របស់ខ្លួន ទៅធ្វើជាសមាជិកម្នាក់ក្នុងចំណោមសមាជិក ៩ រូប នៃស្ថាប័នរៀបចំការ​បោះឆ្នោត ថានឹងនាំឲ្យមានការរិះគន់ជាសាធារណៈ ហើយថានឹងនាំឲ្យមានទំនាស់ផលប្រយោជន៍នៅពេលអនាគត។ ករណីនេះ លោក ព្រាប កុល បញ្ជាក់ថា៖ «ប្រសិនបើធ្លាប់គិតលេងៗ សូមមេត្តាប្តូរចិត្តវិញជាបន្ទាន់ កុំឲ្យយឺតពេល»៕