ជនជាតិយួន ដែលជាអាជីវករលក់ដូ នៅផ្សារនាគមាស បានប៉ះទង្គិចពាក្យសម្តីគ្នា ជាមួយស្រ្តីជនជាតិខ្មែរម្នាក់ បណ្តាលឲ្យរងរបួសចំក្បាល។ អ្វីដែលគួរឲ្យហួសចិត្តនោះ ជម្លោះបានកើតឡើងនៅកណ្ដាលផ្សារ តែជនដែលបង្ក​របួសស្នាមទាំងបួននាក់ បាននាំគ្នារត់យករួចខ្លួនបាត់ ដោយ«សុវត្ថិភាព» បើទោះជាមានបណ្ដាជនផ្សេងទៀត ជួយ​ឈឺឆ្អាល មកចូលជួយក៏ដោយ។

រូបភាព កំទេចកំទី ទំនិញរបស់ជនជាតិវៀតណាម ដែលត្រូវបានបណ្ដាជនវាយបំផ្លាញ។ (រូបថតផ្តិតពីវីដេអូ)

ជម្លោះបង្ករបួសស្នាម - អាជីវករដែលត្រូវបានគេស្គាល់ថា ជាជនជាតិវៀតណាមមានគ្នាបួននាក់ លក់ដូរនៅ​ផ្សារ​នាគមាស បានវាយស្ត្រីជនជាតិកម្ពុជា ដែលជាមូយទិញអីវ៉ានរបស់ខ្លួនឲ្យរងរបួសជា ទម្ងន់។ សាក្សីនៅផ្ទាល់កន្លែង បានរៀបរាប់ថា ដើមហេតុដំបូង​ ដែល​បង្ករឲ្យកើតមានជំលោះនេះ គឺដោយសារតែស្ត្រីជនរងគ្រោះ បានផ្ញើរឥវ៉ាន់​ទុក​នៅនឹងតង់របស់ស្រ្តី ដែលវាយខ្លួនឲ្យរបួស​នោះ ដើម្បីទៅទិញឥវ៉ាន់ផ្សេងទៀត។ លុះត្រឡប់មកវិញ សួររក​អីវ៉ាន់​របស់ខ្លួនតែត្រូវបានម្ចាស់តង់នោះ ប្រកែកថាមិនដឹងទៅវិញ ដោយហេតុថា ម្ចាស់តង់ទំនងជាបានលក់ច្រលំ ឫក៍អ្នក​ទិញដទៃទៀតបន្លំយក ទៅក៍មិនដឹង។

ព្រឹត្តការណ៍វាយតប់ បានកើតឡើងនាព្រឹកថ្ងៃទី ២៥ ខែកក្កដា នៅផ្សារនាគមាស រាជធានីភ្នំពេញ។

នៅពេលដែលអីវ៉ាន់ត្រូវបានបាត់ដូច្នេះ ស្រ្តីរងគ្រោះក៍បានសុំឲ្យម្ចាស់តង់ ជួយចេញថ្លៃអីវ៉ាន់នោះពាក់កណ្តាល ព្រោះ​ថាខ្លួនគ្មានលុយសំរាប់ទិញអីវ៉ាន់ទៀតទេ។ ស្ត្រីទាំងពីរ បានជជែកគ្នាយ៉ាងតឹងសសៃករ រៀងៗខ្លួន ក៍ស្រាប់ តែ​បុរស​ម្នាក់ដែលជាជនជាតិវៀតណាម នៅក្នុងតង់នោះដូចគ្នា បានស្ទុះមកវាយស្រ្តីជនរងគ្រោះ។ បន្ទាប់មកទៀត​ អាជីវករ​វៀតណាមដូចគ្នា បីនាក់ទៀត ក៏ចូលទៅវាយស្រ្តីនោះតាមក្រោយបន្ថែមទៀត។

ដោយឃើញថា ស្ត្រីជនរងគ្រោះមានតែម្នាក់ឯង ហើយត្រូវគេព្រួតវាយដ៍ទៅបួននាក់នោះ បងប្អូនអាជីវករ និងអ្នករត់​រ៉ឺមក អ្នកអូសរទេះអីវ៉ាន់នៅផ្សារនេះ នាំគ្នាស្រែកឆោឡោ រកគេឲ្យជួយ និងរកនគរបាលមកធ្វើអន្តរាគមន៍។  ប៉ុន្តែជា​លទ្ធផល ជនដៃដល់វៀតណាមទាំងបួននាក់នោះ បានរត់រួចខ្លួនបាត់ដោយសុវត្ថិភាព។

ការក្ដៅក្រហាយបានកើតឡើងភា្លមៗ បន្ទាប់មក ដែលបណ្ដាលឲ្យបណ្ដាជននៅទីនោះ រួមនឹង​ស្វាមីស្រ្តីរងគ្រោះផង បានរួមគ្នាវាយកំទេច អីវ៉ាន់ជនជាតិវៀតណាមទាំងបួននាក់នោះខ្ទេចខ្ទី។ បន្ទាប់មក នគរបាលបានមកដល់ ធ្វើការ​សួរនាំ និងបានប្រាប់ទៅជនរងគ្រោះ ឲ្យបញ្ចប់រឿងនោះតែម្តងទៅ។

នគរបាលប៉ុស្ត៍ប្រចាំសង្កាត់នោះ នៅមិនទាន់អាចទាក់ទងបាននៅឡើយ ទាក់ទងនឹងករណីខាងលើ។

សាក្សីមួយរូប អ្នកស្រី ធា បាននិយាយប្រាប់ទស្សនាវដ្តីមនោរម្យ.អាំងហ្វូ ថា នេះមិនជាលើកទីមួយ ទេដែល​ស្ត្រី​ជន​ជាតិវៀតណាមឈ្លោះប្រកែក ជាមួយនឹងអ្នកទិញ និងអ្នកលក់ដូរផ្សេងទៀត ជិតស្តង់របស់ខ្លួននោះ។ ប៉ុន្តែមិនដែល​ឃើញមានដោះស្រាយ ឬធ្វើការឃាត់ខ្លួនជនបង្ករបួសស្នាមទាំងនេះ ទៅតាមច្បាប់ទម្លាប់ឡើយ៕

វីដេអូខាងក្រោមនេះ បានថតដោយប្រិយមិត្តហ្វេសប៊ុក នៅពេលហេតុការណ៍បានបញ្ចប់រួចទៅហើយ៖