បុរសម្នាក់ដែលបានតាំងខ្លួនឯងថា ជាព្រះសិរអារ្យមេត្រី ស្លៀកពាក់ឈុតស ជិះផ្កាឈូក ដែលអះអាងថា ខ្លួនជាអ្នក​មានបុណ្យមកត្រាស់ដឹង បានធ្វើឱ្យមានការភ្ញាក់ផ្អើលជាខ្លាំង។ នៅលើបណ្តាសង្គមហ្វេសប៊ុក ព្រះសិរអារ្យមេត្រី​«ថ្មី»​ម្នាក់នេះ បានបង្កឲ្យមានការរិះគន់ ជាមួយនឹងវីដេអូរឿងរ៉ាវជាច្រើន ត្រូវបានយកមកបង្ហោះ និងចែកចាយគ្នា​យ៉ាង​ព្រោងពាត។ មន្រ្តីមួយរូបនៅក្រសួងធម្មការនិងសាសនា បានអះអាងថា រឿងនេះបានកើតឡើងយូរហើយ ហើយ​វីដេអូដែលបែកធ្លាយ ចេញមកផ្សាយជាសាធារណៈនោះ គឺដោយសារតែរឿង«ចែកលុយគ្នាមិនត្រូវ»។

រូបផ្សាយពាណិជ្ជកម្ម នៅក្នុងវត្តទួលរាជា បង្ហាញថាតាបស ធាន វុទ្ធី ជាព្រះពុទ្ធទី៥។ (រូបថត ហ្វេសប៊ុក)

អបិយជំនឿ - បើតាមរូបភាព ដែលគេបានបង្ហោះនៅលើបណ្ដាញសង្គមហ្វេសប៊ុក បានបង្ហាញថា មានប្រជាពលរដ្ឋ​មួយចំនួន រួមទាំងលោកតាអាចារ្យ និងព្រះសង្ឃជាច្រើនអង្គ បាននាំគ្នាដេករណូករណែល ដើម្បីឱ្យ​ព្រះ​សិរអារ្យមេត្រី​ ដ៏មានមហិទ្ធិរិទ្ធនោះ ដើជាន់ពីលើ។ លើលពីនេះទៅទៀត ព្រះសិរអារ្យមេត្រីដែលគេស្គាល់ឈ្មោះថា ធាន វុទ្ធី បាន​បង្គាប់ឱ្យព្រះសង្ឃ ដែលត្រូវបានចាត់ទុកជាសង្ការៈជនដ៏ខ្ពង់ខ្ពស់នោះ មិនអាចថ្វាយបង្គំអ្នកណាទាំងអស់ តែបែជា​អាចថ្វាយបង្គំខ្លួនបាន ដោយអះអាងថា ខ្លួនជាអ្នកមានបុណ្យលើសគេ (ជាព្រះសិរអារ្យមេត្រី)។

សកម្មភាព និងទង្វើរបស់ព្រះសិរអារ្យមេត្រី«ថ្មី» បានបង្កឲ្យមានការរិះគន់យ៉ាងផុលផុស ពីមជ្ឈដ្ឋានដែលមិនជឿលើ ព្រះសិរអារ្យមេត្រីដ៏ចម្លែករូបនេះ ជាពិសេសនៅលើបណ្តាញសង្គមហ្វេសប៊ុក ដែលពេញប្រៀបទៅដោយក្រុមយុវជន​ជំនាន់កំព្យូទ័រ។ ពួកបានលើកឡើងថា បុរសនេះបានកំពុងធ្វើឱ្យព្រះពុទ្ធសាសនា ដែលជាសាសនារបស់រដ្ឋ ដាំក្បាល​ធ្លាក់ចុះយ៉ាងខ្លាំង។ ការរិះគន់បានកើតមានខ្លាំងក្លា ទៅលើរូបភាពវីដេអូជាច្រើន ដែលបង្ហាញថា​ ព្រះសិរអារ្យមេត្រី ធាន វុទ្ធី បានឡើងគង់លើបល័ង្គរូបផ្កាឈូក ទេសនាដាស់តឿនដល់មហាជន ហើយមានប្រជាពលរដ្ឋខ្មែរមិនតិចទេ ដែលបានយកដង្វាយជាលុយ មក«ថ្វាយ»បុរសនោះ ដែលអាចធ្វើឱ្យបុរសក្លាយជាសេដ្ឋីបាន។

បើតាមការឱ្យដឹងពីប្រជាពលរដ្ឋម្នាក់ កញ្ញា ស៊ីណា រស់ក្បែរវត្តទួលរាជា ដែលជាទីកន្លែងរបស់បុរសនោះស្នាក់នៅ បានប្រាប់​ទស្សនាវដ្តីមនោរម្យ.អាំងហ្វូថា តាមពិតពលរដ្ឋនៅក្នុងស្រុកកោះធំផ្ទាល់ គឺមិនសូវជឿប៉ុន្មានទេ មានតែ​១០%តែ​ប៉ុណ្ណោះ ដែលជឿបុរសឈ្មោះ ធាន វុទ្ធី នោះ។ ប៉ុន្តែភាគច្រើនគឺអ្នកដែលរស់នៅក្រៅស្រុក និងអ្នករស់នៅ​តាម​ខេត្ត​ផ្សេងៗ​ ទៅ​វិញទេ ដែលគេចេះតែមកធ្វើបុណ្យ និងល្បីតៗគ្នា។

កញ្ញា ស៊ីណា បានពន្យល់ពីមូលហេតុ ដែលពលរដ្ឋប្រុសស្រី ពីស្រុកក្រៅមកគោរពបូជាតាបស ធាន វុទ្ធី នេះ យ៉ាង​ដូច្នេះថា ដោយសារតែលោកបានបួសរៀន តាំងពីរអាយុ១៦វស្សា រហូតមកដល់ពេលនេះ ដែលមាន​អាយុ៣៦​វស្សា​ហើយលោកនៅមិនទាន់សឹកទៀត ហើយលោកតែងតែទៅសមាធិក្នុងព្រៃរហូត។ អភូតហេតុអស្ចារ្យ ដែលធ្វើឱ្យគេ​កាន់​តែជឿលង់ទៅលើតាបស ធាន វុទ្ធី ទៀតនោះ គឺមានដើមពោធិ៍មួយដើម ដុះឡើងនៅកន្លែងមួយដោយឯងៗ ដោយគ្មានអ្នកណាដាំ។ នៅពេលនោះ លោក ធាន វុទ្ធី បានប្រាប់ពលរដ្ឋថា ខ្លួនបានយល់សប្តិឃើញ មានគេឱ្យ​ដើម​ពោធិ៍មួយដើម។ បន្ទាប់ពីបានប្រាប់ប្រជាពលរដ្ឋយ៉ាងដូច្នេះហើយ ក៏បាននាំគ្នាផ្អើលទៅមើល ស្រាប់តែឃើញ​មាន​ដើមពោធិ៍មួយដើម ដុះនៅកន្លែងនោះមែន ហេតុនេះហើយ ទើបធ្វើកេរ្តិ៍ឈ្មោះលោក ធាន វុទ្ធី កាន់តែល្បី។

កញ្ញា ស៊ីណា បន្តថា នាងមិនដែលបានជួបផ្ទាល់ ព្រះសិរអារ្យមេត្រីថ្មីម្នាក់នេះទេ ព្រោះលោកតែងតែ​ទៅសុំសីល​នៅ​ក្នុងព្រៃ តែបើតាមយាយជី ដែលនៅក្នុងវត្តនោះបានប្រាប់នាងថា សង្ឃរាជវត្តទួលរាជា ធាន វុទ្ធី នេះ គឺជា​ព្រះសិរអារ្យ​មេត្រី ដែលមិនទាន់បានត្រាស់ដឹង ហើយឥលូវនេះគាត់កំពុងតែសន្សំបុណ្យ ដើម្បីឡើងទៅ«និពាន្វ»។

ប៉ុន្តែក្រុមអ្នកប្រើប្រាស់បណ្ដាញសង្គមភាពច្រើន មិនគិតដូច្នេះទេ។ ម្ចាស់គណនីហ្វេសប៊ុកមួយ អមដោយវីដេអូ បាន​លើកឡើងថា ទង្វើរបស់ព្រះសិរអារ្យមេត្រី ធាន វុទ្ធី មានលក្ខណៈជាការបោកប្រាស់ ដើម្បលាភសក្ការៈ​ប្រាក់​កាស ដោយបុរសរូបនេះ បានយកព្រះពុទ្ធរូបទៅកប់ រួចហើយតាំងមកអះអាងថា «ព្រះពុទ្ធរូបផុស» និងបានលើកខ្លួន​ជា​ព្រះ​សិរអារ្យមេត្រី ឬជាសម្ដេចព្រះសង្ឃរាជ ជួន ណាត ចាប់ជាតិជាដើម។ មិនតែប៉ុណ្ណោះ បុរសដែលអះអាងថាខ្លួនជា​ ព្រះ​សិរអារ្យមេត្រី ម្នាក់នេះ ថែមទាំងបានពោលពាក្យ ប្រមាថដល់ព្រះសង្ឃនោះទៀត។

ទាក់ទងនឹងការប្រមាថដល់ព្រះសង្ឃ និងការឱ្យព្រះសង្ឃក្រាបសំពះខ្លួន រហូតមកដល់ពេលនេះ នៅមិនទាន់ឃើញ​ក្រសួងធម្មការ និងសាសនា សម្ដែងប្រតិកម្មឬ ចំណាត់ការណាមួយ ទៅលើព្រះសិរអារ្យមេត្រី«ថ្មី»រូបនេះឡើយ។ លោក សេង សុមុនី អ្នកនាំពាក្យក្រសួងធម្មការ និងសាសនា មិនអាចសុំការធ្វើអធិប្បាយបានទេ ដោយលោកជាប់​រវល់ប្រជុំ។ ប៉ុន្តែមន្រ្តីម្នាក់ក្នុងក្រសួងធម្មការនិងសាសនា បានឱ្យដឹងថា ករណីបុរសព្រះសិរអារ្យមេត្រី«ថ្មី» គង់​នៅ​វត្តទួលរាជានេះ គឺជាទង្វើដែលខុសទៅនឹងច្បាប់ព្រះពុទ្ធសាសនា ហើយឥលូវនេះ ក្រសួងបាន​ចាត់ចំណាត់​ការ​ទៅ​លើ​បុរសនេះរួចហើយ។ មន្ត្រីនោះ បាននិយាយទៀតថា ក្រសួងក៏ធ្លាប់បានហៅ ព្រះសិរអារ្យមេត្រី«ថ្មី»ម្នាក់នេះ មក​ព្រមាន​​ណែនាំម្តងដែរ។

ក្នុងល័ក្ខខ័ណ្ឌមិនបញ្ចេញឈ្មោះ មន្រ្តីក្រសួង បានបន្តថា៖ «រឿងនេះចេញយូហើយ ទើបតែបែកធ្លាយក្នុងពេលនេះ ព្រោះឈ្លោះរឿងទានវស្សាចែកលុយគ្នាមិនត្រូវ ដល់អញ្ចឹងទៅ វាបង្ហោះរូបហ្នឹងមក»៕

ការបែកធ្លាយជាច្រើន នៅតាមបណ្ដាញសង្គមនោះ បានធ្វើឲ្យមានការលេចឮថា បុរសព្រះសិរអារ្យមេត្រី«ថ្មី» ធាន វុទ្ធី មាន​ជាប់ខ្សែស្រឡាញ ជាមួយនឹងមន្ត្រីជាន់ខ្ពស់ដ៏មានអំណាច នៅក្នុងរដ្ឋាភិបាលកម្ពុជា។ ប៉ុន្តែការលេចឮនេះ នៅ​មិន​ទាន់មានអ្វីមកបញ្ជាក់នៅឡើយ ដោយគ្រាន់តែគេឃើញនៅតាមទូរទស្សន៍ជាតិ បុរស ធាន វុទ្ធី ធ្លាប់បានទៅចូល​រួមសម្ដែងគាវរកិច្ច ទទួលលោកនាយករដ្ឋមន្ត្រី ហ៊ុន សែន ដល់ជើងឧទ្ធម្ភាគចក្រ៕

ទស្សនាវីដេអូ ពី«ព្រះសិរអារ្យមេត្រី«ថ្មី» របស់ក្រុមអ្នកប្រើប្រាស់ហ្វេសប៊ុក ដូចតទៅ៖