ក្រោយពីវិលត្រលប់មកពីសម្តែង និងច្រៀងនៅលើទឹកដីអាមេរិច ដែលជាដំណើរលើកដំបូងរបស់ខ្លួន ជាមួយ​លោក​ ណាំ ប៊ុណ្ណារ័ត្ន នោះមក កញ្ញាលី អ៊ីវ៉ាធីណា បានថ្លែងដោយមោទនភាពថា នាងទទួលបានការគាំទ្រពីប្រជាពលរដ្ឋ ដែលរស់​នៅទីនោះយ៉ាងច្រើន។

កញ្ញាលី អ៊ីវ៉ាធីណា (ខាងឆ្វេង) និងលោក ណាំ ប៊ុណ្ណារ័ត្ន។ (រូបថត ហ្វេសប៊ុក)

តារា - ក្រោយពីវិលមកពីការចេញទៅសម្ដែង និង ច្រៀងនៅសហរដ្ឋអាមេរិក ដែលមានរយៈពេល ៣ខែ កន្លងទៅ​នេះ កញ្ញា លី អ៊ីវ៉ាធីណា ជាតារាចម្រៀងល្បីមួយរូបរបស់ផលិកម្មថោន បានអះអាងពីជោគជ័យរបស់ខ្លួន ថាជាដំណើរ​ទៅ​ច្រៀង នឹងសម្តែង​របស់ខ្លួនលើកដំបូង តែមានបងប្អូនប្រជាពលរដ្ឋខ្មែរ​នៅទីនោះជាច្រើនបានគាំទ្រដល់រូបនាង។

គិតចាប់ពីថ្ងៃទី ១៥ ខែ មេសា ដល់ថ្ងៃទី ១៥ ខែ កក្កដា ឆ្នាំ ២០១៤ ណាំ ប៊ុណ្ណារ័ត្ន និង កញ្ញា ជាតារាចម្រៀងល្បី​ឈ្មោះ​ប្រចាំផលិតកម្ម Town បានដឹកដៃគ្នាទៅសម្តែង។ បទចម្រៀងរបស់ពួកគេទាំងពីរនាក់កន្លងមក ទទួលបានការចាប់​អារម្មណ៍យ៉ាងច្រើនណាស់ដែរ ពីសំណាក់ទស្សនិកជនទាំងក្នុង និង ក្រៅប្រទេស។

តារាចម្រៀងខ្មែរកាត់ខ្សែស្រលាយចិន វ័យ៣០ឆ្នាំរូបនេះ ដែលស្រង់សម្តីដោយគេហទំព័រក្នុងស្រុកមួយបានឱ្យដឹងថា គ្រាន់តែប្រជាពលរដ្ឋខ្មែរ ដែលរស់នៅសហរដ្ឋអាមេរិច បានឃើញវត្តមាននាងភ្លាម គេក៏លាន់មាត់ថានាងច្រៀង​បាន​ពីរោះ ទឹកដមសម្លេងល្អ។ បទដែលនាងទទួលបានការសរសើរ និងសំណូមពរឱ្យ​នាងច្រើនជាងគេ គឺបទ​«ស្ដាយ មិន​បានថាស្នេហ៍» ក្នុងពេលដែលនាងច្រៀងនៅផលិតកម្ម ប្លូដាយអ៊ឹមិន (Blue Diamond)។

កញ្ញាបន្តថា ក្រៅពីបទនេះ ក៏មានបទចម្រៀងពីដើមៗផ្សេងទៀត ដែលប្រជាជនខ្មែររស់នៅអាមេរិកនិយមចូលចិត្ត​ជាពិសេសបទប្រពៃណី ហើយមួយចំនួនបានស្នើឱ្យនាងច្រៀងចម្រៀងជាភាសាចិន។

កញ្ញា លី អ៊ីវ៉ាធីណា គឺជាតារាចម្រៀង ដែលមានកំណើតចេញពីផលិតកម្មរស្មីស្ទឹងសង្កែ ក្នុងឆ្នាំ២០០៨ ក្រោយមក​នាងបានផ្លាស់ប្តូទ្រនំជ្រកជាបន្តបន្ទាប់ ក្នុងនោះមានផលិតកម្ម ប្លូដាយអ៊ឹមិន ផលិតកម្មយូធូ ផលិតកម្ម ស្ទឹងសែន ផលិតកម្ម អ៊ឹមជាដើម។ បច្ចុប្បន្ននេះ នាងកំពុងច្រៀងនៅក្នុងផលិតកម្ម ថោន៕