ប្រទេសសំាងហ្គាពួរ ដែលមានលក្ខណៈជាទីក្រុងផងនោះ ជាប់ឈ្មោះបោះសម្លេងថា ជាទីក្រុងដែលស្អាតគ្មានសំរាម។ ក្នុងពេលឆាប់ៗខាងមុខ អ្នកដែលចោលកាកសំណល់គ្មានសណ្តាប់ធ្នាប់ នឹងគេចមិនផុតពីការឃ្លាំមើល របស់អាជ្ញាធរ បានឡើយ។

ម៉ាស៊ីនថតតាមដាន ដែលគេនឹងបំពាក់ ជាលក្ខណៈ ៣៦០°។

ភ្នាក់ងារបរិស្ថានជាតិ (NEA) របស់ប្រទេសនេះបានប្រកាសថា គេនឹងបំពាក់ម៉ាស៊ីនថតតាមដាន ដែលអាចចាប់រូបភាព បានច្បាស់ល្អ (HD) នៅតាមកន្លែងមួយចំនួននៅក្នុងពេល៣ខែខាងមុខនេះ។ សំរាប់អ្នកដែលត្រូវគេតាមទាន់ថាបានបោះ សំរាមចោលនៅទីកន្លែងផ្តេសផ្តាសនឹងត្រូវទទួលទោស ហើយអត្តសញ្ញាណរបស់គេនឹងត្រូវបង្ហាញជាសាធារណៈ។ នេះជាការផ្សាយអោយដឹង របស់គេហទំព័រ ឆានែល ញូ អេស៊ី។

កាមេរ៉ាដែលមានបច្ចេកវិទ្យាខ្ពស់ទាំងនេះ ក៏អាចចាប់យករូបភាពអ្នកជក់បារី ដែលចោលកន្ទុយបារីបានដែរ។ ភ្នាក់ងារ បរិស្ថានជាតិ(NEA) បានបញ្ជាក់ថា ថ្មីៗនេះ មានមនុស្សពីរនាក់ហើយ ដែលត្រូវបានគេតាមទាន់ជាក់ស្តែង នៅក្នុងពេល សាកល្បងបំពាក់កាមេរ៉ានេះ ជាលើកដំបូង។ បើបកស្រាយនៅចំពោះមុខតុលាការ ពួកគេនឹងត្រូវផ្តន្ទាទោស ដោយផាក ពិន័យជាទឹកប្រាក់ចំនួនពី ៨០០ ទៅ ១០០០ដុល្លាសាំងហ្កាពួរ (៥០០ ទៅ ៦២៥ អ៊ឺរ៉ូ)។ ច្បាប់នេះបានគ្រោង ការផាកពិន័យ ជាសាច់ប្រាក់ច្រើនបំផុតគឹ ១០០០ដុល្លា រឺ អាចពិន័យអោយធ្វើការងារ ជាប្រយោជន៍ដល់សង្គម រហូតដល់១២ម៉ោង។

ស្របនឹងការពង្រឹង វិធានការបង្ក្រាបការចោលសំរាមផ្តេសផ្តាស ដែលចាក់ឬសនៅក្នុងនយោបាយ «គ្មានការយោគយល់» របស់សាំងហ្កាពួរ ក្រុមអាជ្ញាធរនៃប្រទេសនេះបានតម្លើងទ្វេរដង នូវការផ្សព្វផ្សាយ ពីចូលរួមទទួលខុសត្រូវ ហើយក៏បាន រំលឹកពីកតព្វកិច្ច របស់ពលរដ្ឋអ្នករស់នៅទូទៅ អោយដាក់កំហឹតទៅដល់ជន ដែលបានចោលកាកសំណល់ ពាសវាល ពាសកាល។

ជាទំលាប់ទៅហើយ ដែលរដ្ឋអំណាចសាធារណៈ នៃប្រទេសតូចជាងគេក្នុងពិភពលោកនេះ គិតខ្វល់ខ្វាយពីភាពស្អាតបាត ឥតខ្ចោះនោះ។ នៅក្នុងជំហានថ្មីនេះ ក្រុមអាជ្ញាធរបានបន្ថែមការរំលឹក កាន់តែច្រើនឡើងៗ ទៅដល់ប្រជាពលរដ្ឋ។ ភ្នាក់ងារបរិស្ថានជាតិ (NEA) បានសរសេរនៅក្នុងសេចក្តីថ្លែងការណ៍មួយថា «ប្រទេសសាំងហ្កាពួរ ជាប្រទេសដែលមាន ហេដ្ឋារចនាស័ម្ពន្ធ ទាន់សម័យ និងជឿនលឿន ប៉ុន្តែរបៀបរបបរស់នៅ របស់ប្រជាពលរដ្ឋរបស់ប្រទេសនេះ មិនទាន់ តាមមកទាន់នៅឡើយ។ ការប្រឹងប្រែងទាំងឡាយ សំរាប់ជំរុញផែនការ “រក្សាសំាំងហ្កាពួរអោយនៅស្អាត (Keep Singapor Clean)” ត្រូវបានធ្វើឡើង ក្នុងគោលបំណងលើកកំលាំងចិត្តដល់ប្រជាជន ក្នុងការចែករំលែកទំនួលខុសត្រូវ ដើម្បីធានា អោយបាននូវសោភណ្ឌភាពជាតិ។ ដោយសារការប្រឹងប្រែងទាំងអស់គ្នានេះ យើងនឹងអាចធ្វើការក្នុងចក្ខុវិស័យរួមមួយ សំរាប់ប្រទេសសាំងហ្កាពួរ ដែលនឹងផ្លាស់ប្តូរពី “ទីក្រុងត្រូវបានគេសំអាត” ទៅជា “ទីក្រុងស្អាតពិតប្រាកដ”មួយ៕»

----------------------------------------------
ដោយ៖សុជារស្មី -ភ្នំពេញfថ្ងៃទី១៨ សីហា ឆ្នាំ២០១២
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ