ពិធីដង្ហែ និងតម្កល់ ព្រះបរមអដ្ឋិព្រះករុណាសម្តេចព្រះមហាវីរក្សត្រ នរោត្តម សីហនុ ព្រះបរមរតនកោដ្ឋ ក្នុង​ព្រះ​ចេតិយព្រះវិហារព្រះកែវមរកត ក្នុងបរិវេណព្រះបរមរាជវាំង ត្រូវបានប្រព្តឹត្តនិងដំណើរទៅ តាមព្រះរាជប្បវេណីជាតិ និងពិធីសាសនាខ្មែរ។

ពិធីដង្ហែនិងតម្កល់ ព្រះបរមអដ្ឋិព្រះមហាវីរក្សត្រ ថ្ងៃទី១១ ខែកក្កដា ឆ្នាំ២០១៤។ (រូបថត ហ្វេសប៊ុក)

ពិធីសាសនា - ពិធីដង្ហែ និងតម្កល់ ព្រះបរមអដ្ឋិនេះ ក៏បានធ្វើឡើងទៅតាមទំនៀមទំលាប់ និងដូចគ្នា​ទៅនឹងពិធី​បុណ្យ នៃអតីតព្រះមហាក្សត្រខ្មែរបានរៀបចំឡើងនាពេលកន្លងមកដែរ។ ពិធីដង្ហែព្រះបរមអដ្ឋិនេះ បានបង្ហាញ​ឲ្យ​ឃើញពីគំរូវីរភាព នៃអង្គព្រះមហាវីរក្សត្រខ្មែរ ក្នុងការទាមទាឲ្យមានឯករាជ្យភាពទឹកដី ឯកភាពជាតិខ្មែរ និងការ​បង្រួប​បង្រួមជាតិជាដើម។

ពិធីដង្ហែព្រះបរមអដ្ឋិ បានប្រព្រឹត្តិទៅយ៉ាងអធិកអធម ដោយមានការចូលរួមគាំទ្រពីប្រជាពលរដ្ឋ មន្រ្តីរាជការ​គ្រប់​ក្រសួងស្ថាប័ន។ វេលាម៉ោងជាង៧ ព្រឹកថ្ងៃទី១១ ខែកក្កដាឆ្នាំ២០១៤ ពិធីបានចាប់ផ្តើម ដោយចេញពីមុខ​ព្រះបរម​រាជវាំង ឆ្ពោះទៅតាមបណ្តោយផ្លូវសំខាន់ៗនានាជុំវិញព្រះបរមរាជវាំង ដែលនឹងធ្វើការដង្ហែរនោះ។

ក្នុងពិធីដង្ហែ និងតម្កល់ ព្រះបរមអដ្ឋិនេះ វត្តមានដ៏ខ្ពង់ខ្ពស់បំផុតរបស់ព្រះករុណា ព្រះមហាក្សត្រកម្ពុជា​សម្តេច​ព្រះ​បរមនាថ នរោត្តម សីហមុនី និងសម្តេចព្រះវររាជមាតាជាតិខ្មែរ សម្តេចព្រះនរោត្តម មុនីនាថ សីហនុ ព្រមទាំង​ព្រះញាតិវង្សានុវង្ស។ មន្រ្តីថ្នាក់ដឹកនាំក្រសួងស្ថាប័នសំខាន់ៗរូមមានលោក ហេង សំរិន ប្រធានរដ្ឋសភា លោក​នាយករដ្ឋមន្រ្តី ហ៊ុន សែន មន្រ្តីរាជការ គ្រូបង្រៀន សិស្សានុសិស្ស និស្សិត និងប្រជាពលរដ្ឋ ក៏បានចូលរួមគាំទ្រ​យ៉ាងច្រើនកុះករក្រៃលែង។

ដោយឡែកតំណាងគណបក្សសង្គ្រោះជាតិ២៥រូប ក៏បានចូលរួមព្រះរាជពិធីដង្ហែព្រះបរមអដ្ឋិ ព្រះករុណាព្រះបាទ​សម្ដេចព្រះ នរោត្តម សីហនុ នាព្រឹកថ្ងៃទី១១ ខែកក្កដានេះដែរ ដឹកនាំដោយលោកកឹម សុខា ប្រធានស្ដីទីគណបក្ស​សង្គ្រោះជាតិ។

វេទិកាកិត្តិយសមុខព្រះបរមរាជវាំង មានវត្តមានរបស់នាយករដ្ឋមន្ត្រី លោក ហ៊ុន សែន ប្រធានរដ្ឋសភា លោក ហេង សំរិន មន្ត្រីរាជការ និងតំណាងរាស្ត្រគណបក្សប្រជាជនកម្ពុជានៅខាងស្ដាំ។ ឯលោក កឹម សុខា ប្រធានស្ដីទី​គណបក្ស​សង្គ្រោះជាតិ និងតំណាងរាស្ត្រ ក៏មានវត្តមាននៅជួរខាងឆ្វេង ដោយអមព្រះអាសនៈ​ព្រះមហាក្សត្រ​ដូច​គ្នា។

ព្រះរាជពិធី ក្នុងរយៈពេលបីថ្ងៃនេះ រួមមានកម្មវិធីគោរពព្រះវិញ្ញាណក្ខន្ធ កម្មវិធីបាញ់កាំជ្រួច និងបាញ់កាំភ្លើងធំ នា​ពេលដង្ហែ និងពេលបញ្ចុះព្រះបរមអដ្ឋិ។ វេលាម៉ោងជាង៨ ព្រឹកថ្ងៃទី១១ ខែកក្កដា ឆ្នាំ២០១៤នេះ ការដង្ហែ ព្រះបរម​អដ្ឋិ ព្រះបរមរតនកោដ្ឋ បានមកដល់វិមានឯករាជ្យ ដែលមានព្រះសង្ឃជាង ៩០អង្គសូត្រមន្ត ដើម្បីឧទ្ទិកុសល​ទៅ​ដល់ ព្រះបរមរតនកោដ្ឋម្តង។

នៅម៉ោងជិត៩ ការក្បួនដង្ហែ ព្រះបរមអដ្ឋិ ព្រះបរមរតនកោដ្ឋ ក៏បានមកដល់មុខព្រះបរមរាជវាំងវិញ។ ព្រះមហាក្សត្រ​កម្ពុជា​សម្តេចព្រះបរមនាថ នរោត្តម សីហមុនី និងសម្តេចព្រះវររាជមាតាជាតិខ្មែរ សម្តេចព្រះនរោត្តម មុនីនាថ សីហនុ ព្រមទាំងព្រះញាតិវង្សានុវង្ស បានយាងចូលវាំងជ័យ នៅម៉ោង៩ ព្រឹក។

វេលាម៉ោងជាង៩ ព្រឹកក្បួនដង្ហែព្រះបរមអដ្ឋិ ព្រះបរមរតនកោដ្ឋ បានមកដល់ព្រះវិហារព្រះកែវមរកត ក្នុងព្រះ​បរម​រាជវាំង ឯក្បួនដង្ហែព្រះបរមអដ្ឋិក៏បានរំសាយនាពេលនោះដែរ។ ប្រជាពលរដ្ឋ ដែលបានចូលរួមនាំគ្នាលុតជង្គង់ ជា​មួយនឹងការលើកដៃសំពះ យំសោក បង្ហាញនូវភាព ក្រៀមក្រំ ការក្តុកក្តួល និងអាឡោះអាល័យ។

សូមរំលឹកថា ក្នុងព្រះរាជពិធីដង្ហែ និងតម្កល់ ព្រះបរមអដ្ឋិ ព្រះបរមរតនកោដ្ឋនេះ ក៏មានការផ្សាយបន្តផ្ទាល់ ដោយ​ស្ថានីយ៍ទូរទស្សន៍ជាតិ (ទទក)។ ក្រៅពីនោះនៅមានស្ថានីទូរទស្សន៍ និងវិទ្យុជាច្រើនទៀត ក៏បានចាក់ផ្សាយបន្ត​ពីស្ថានីយ៍​ទូរទស្សន៍ជាតិផងដែរ។

ឯស្ថានីយ៍ទូរទស្សន៍រដ្ឋ និងឯកជន ក៏នឹងចាក់ផ្សាយខ្សែភាពយន្តឯកសារ «កោះកេរ អតីតរាជធានីខ្មែរដែល​បាត់​បង់​នាស.វទី១០» នៅក្នុងកំឡុងនៃព្រះរាជពិធីដង្ហែ និងតម្កល់ព្រះបរមអដ្ឋិ ព្រះបរមរតនកោដ្ឋ រយៈពេលបីថ្ងៃនេះ​ចាប់​ពីថ្ងៃទី១០ ១១ និង១២ ខែកក្កដា ឆ្នាំ២០១៤៕