មន្រី្តអ្នកនាំពាក្យគណបក្សសង្រ្គោះជាតិ លោក យឹម សុវណ្ណ បានចោទប្រកាន់គណបក្សប្រជាជនកម្ពុជាថា គ្មានឆន្ទៈពិតប្រាកដ ក្នុងការកែទម្រង់គណៈកម្មាធិការជាតិ រៀបចំការបោះឆ្នោត គ.ជ.ប ទេ។

លោក យឹម សុវណ្ណ អ្នកនាំពាក្យគណបក្សសង្រ្គោះជាតិ។ (រូបថត គណបក្ស)

ការបោះឆ្នោត - ដោយដឹងខ្លួនថា បានចាញ់ការបោះឆ្នោតសកលឆ្នាំ២០១៣ និងភ័យខ្លាចការលាតត្រដាង ពី​ការពិត គណបក្សប្រជាជនកម្ពុជា បានពន្យាពេល និងប្រើយុទ្ធសាស្រ្តគ្រប់យ៉ាង ជាមួយគណបក្សសង្រ្គោះជាតិ សហគមន៍​ជាតិ និងអន្តរជាតិ ដើម្បីបញ្ចៀសការកែទម្រង់ពិតប្រាកដមួយ ទៅលើគណៈកម្មាធិការជាតិរៀបចំ​ការបោះឆ្នោត ហៅកាត់ថា គ.ជ.ប ។ នេះជាការអះអាងរបស់លោក យឹម សុវណ្ណ មន្រ្តីអ្នកនាំពាក្យ របស់​គណបក្ស​សង្រ្គោះជាតិ ចំពោះមុខសកម្មជនរបស់ខ្លួន ក្នុងពិធីសម្ពោធទីស្នាក់ការថ្មីគណបក្សសង្គ្រោះជាតិ ខណ្ឌមានជ័យ រាជធានីភ្នំពេញ នៅថ្ងៃទី០៧ ខែកក្កដា ឆ្នាំ២០១៤នេះ។

សម្រាប់មន្រ្តីអ្នកនាំពាក្យ គណបក្សជំទាស់ដដែលនេះ បានពន្យល់ថា បន្ទាប់ពីការចរចាជាច្រើនលើក គណបក្ស​សង្រ្គោះជាតិ សង្កេតឃើញថា គណបក្សប្រជាជនកម្ពុជាគ្មានឆន្ទៈពិតប្រាកដ ក្នុងការកែទម្រង់គណៈកម្មាធិការ​ជាតិរៀបចំការបោះឆ្នោត ហើយថាគណបក្សប្រជាជនកម្ពុជា មិនចង់កែទម្រង់តែម្តង។ លោក យឹម សុវណ្ណ បាន​សង្កត់​ធ្ងន់ថា៖ «ឥឡូវទាំងជាតិ និងអន្តរជាតិគេដឹង ហើយទាមទារត្រូវតែកែទម្រង់។ (...) តែបក្សប្រជាជនកម្ពុជា​យកហាសិបបូកមួយដដែល អត់កែអ្វីទាំងអស់។»

ដើមខែកក្កដា ឆ្នាំ២០១៤នេះ លោកនាយករដ្ឋមន្រ្តី ហ៊ុន សែន បានអះអាងថាគណបក្សប្រជាជនកម្ពុជា បន្ត​ការពារ​រូបមន្តហាសិបបូកមួយដដែល ហើយក៏មិន«ខ្វល់» ចំពោះការធ្វើពហិការរបស់គណបក្សសង្រ្គោះជាតិ មិនចូល​ប្រជុំ​សភានោះទេ ព្រោះប្រទេសកម្ពុជានឹងដំណើរការទៅមុខជាប្រក្រតី លើគ្រប់វិស័យ និងស្ថាប័នទាំងអស់ បើទោះ​ជាមានតែគណបក្សប្រជាជនចូលប្រជុំសភា ក៏ដោយ។

ក្នុងពេលដែលរូបលោកធ្លាប់ស្នើ ឲ្យប្រទេសជប៉ុនជួយកម្ពុជា ក្នុងការកែទម្រង់គ.ជ.ប នោះ លោកនាយករដ្ឋមន្រ្តី ហ៊ុន សែន ក្នុងជំនួបជាមួយប្រមុខការទូតជប៉ុន ដែលបំពេញទស្សនកិច្ចនៅកម្ពុជា ពីពេលថ្មីៗនេះ បានថ្លែងថា កម្ពុជានៅតែអាចកែទម្រង់ គណៈកម្មាធិការជាតិរៀបចំការបោះឆ្នោត គ.ជ.ប បានដោយខ្លួនឯង បើទោះជា​គ្មាន​ជំនួយពីបរទេសក៏ដោយ។

ចំពោះការទាមទារសំឡេងពីរភាគបី នៃសមាជិកសភាសម្រាប់អនុម័តសមាសភាព នៃ គ.ជ.ប ដោយគណបក្ស​សង្រ្គោះជាតិ ត្រូវបានអនុប្រធានគណបក្សប្រជាជនកម្ពុជាលោក ហ៊ុន សែន បានថ្លែងប្រាប់រដ្ឋមន្រ្តីការបរទេស​ជប៉ុន ហ្វូមីអូ ពីដើមខែកក្កដា ឆ្នាំ២០១៤ នេះ ថា៖ «ជាការសម្លាប់លិទ្ធិប្រជាធិបតេយ្យនៅប្រទេសកម្ពុជា»៕