បណ្ដាញព័ត៌មានក្នុងស្រុកជាច្រើន បានសរសេរតាំងពីច្រើនថ្ងៃមកហើយ នូវភាពលំអិតមួយចំនួន ទាក់ទងនឹង​រដ្ឋធម្មនុញ្ញបណ្ដោះអាសន្ន ដែលនឹងប្រកាសឲ្យប្រើប្រាស់ ដោយគ្មានការអនុម័ត្រពីរដ្ឋសភា (ដោយសាររដ្ឋសភា ត្រូវបានរំលាយចោល) នៅក្នុងពេលដ៏ខ្លីខាងមុខនេះ។ នៅក្នុងរដ្ឋធម្មនុញ្ញនោះ បើទោះជាមានរដ្ឋាភិបាលថ្មី នឹងត្រូវ​បង្កើតឡើងក៏ដោយ តែកងទ័ពថៃនឹងត្រូវដាក់ឲ្យកាន់តំណែង នៅកន្លែងជាច្រើន។

ទាហានថៃមួយរូប នៅកណ្ដាលរាជធានីបាងកក។

នយោបាយថៃ - បើតាមរដ្ឋធម្មនុញ្ញថៃថ្មីនោះ របបយោធាថ្មីរបស់ប្រទេសថៃ នឹងមិនត្រូវបានរំលាយទេ បើទោះជា​រដ្ឋាភិបាលថ្មី នឹងត្រូវដាក់ឲ្យកាន់អំណាច ជាបណ្ដោះអាសន្ននោះក៏ដោយ។  រដ្ឋសភា ដែលត្រូវបង្កើតឲ្យមានរូបរាង​ឡើងវិញ នឹងមានអសនៈមួយផ្នែកធំ ត្រូវកាន់កាប់អង្គុយដោយមេដឹកនាំយោធា។

សមាជិករដ្ឋសភា ទាំង២០០នាក់ នឹងត្រូវតែងតាំងដោយរបបយោធា ហើយក្រុមប្រឹក្សាកំណែទម្រង់ទៅលើប្រព័ន្ធ​នយោបាយ នឹងត្រូ​វបង្កើតឡើងដែរ។

និយាយជារួម និងចំណុចដែលសំខាន់បំផុត ពីក្នុងរដ្ឋធម្មនុញ្ញបណ្ដោះអាសន្ននោះ គឺរបបយោធាននៅតែរក្សា​រូប​រាងរបស់ខ្លួន ហើយនឹងនៅតែមានអំណាច ក្នុងការចេញក្រិត្យណាក៏ដោយ ដែលទាក់ទងនឹងបញ្ហាសន្ដិសុខជាតិ។ រីឯរដ្ឋាភិបាលជាបណ្ដោះអាសន្ន ដែលនឹងត្រូវមានរូបរាងនៅខែកញ្ញាខាងមុននេះ ក៏ត្រូវស្ថិតក្រោមឥទ្ធិពល និង​ការត្រួតពិនិត្យរបស់យោធាដែរ។

តែនេះមិនមានអ្វីប្លែកទេ នៅពេលដែលរដ្ឋធម្មនុញ្ញនៃបរិបទនយោបាយមួយ ត្រូវបានគួសវាសឡើង ដោយរបប​យោធានោះ។ គ្រាន់តែគេនឹងរងចាំមើល ថាតើប្រជាជនថៃដែលកំពុងស្រេកឃ្លានលិទ្ធិប្រជាធិបតេយ្យ អាចទទួល​យកនូវរដ្ឋធម្មនុញ្ញនេះបាន ឬយ៉ាងណា។

សម្រាប់អ្នកវិភាគ រដ្ឋធម្មនុញ្ញរបស់ប្រទេសថៃនេះ ជាការរំកិលខ្លួនធាក់ថយក្រោយ ដ៏គួរឲ្យអស់សំណើច ដែលនឹង​ធ្វើឲ្យរាជាណាចក្រមួយនេះ ធ្លាក់ខ្លួនទៅរករបបផ្ដាច់ការដូចនៅក្នុងទស្សវត្តន៍ឆ្នាំ៥០ និងឆ្នាំ៦០ ជាថ្មីឡើងវិញ។ កាលពីឆ្នាំ២០០៦ របបយោធាដែលទើបនឹងធ្វើរដ្ឋប្រហារហើយ បានប្រគល់អំណាចទាំងស្រុងរបស់ខ្លួន ទៅឲ្យ​រដ្ឋាភិបាលថ្មី ដោយសារក្រុមយោធានៅពេលនោះ ចង់បង្ហាញខ្លួនថាជាអ្នកនៅកំណ្ដាល និងមិនលូកលាន់​នៅក្នុង​រឿង​នយោបាយ។ ប៉ុន្តែ ទំនងជាទទួលមេរៀនពីពេលនោះ ទើបក្រុមយោធានៅពេលនេះ បានក្ដាប់អំណាចនេះនៅ​ក្នុងដៃឲ្យបានណែនជាងមុន ព្រោះស្ថានការណ៍អាចនឹងធ្លាក់ចុះ ដុនដាបសារជាថ្មី ខណៈពេលដែលក្រុមអភិរក្ស​និយម អ្នកអន្ទ្រើសៗ និងក្រុម«អាមាត្យៗ»នៅជាប់ព្រះរាជវាំង នៅតែចង់បង្ហាញវត្តមានរបស់ពួកគេ ក្នុងឆាក​នយោបាយថៃ​ជាបន្តទៅទៀតនោះ៕