អាពាហ៍ពិពាហ៍របស់ពួកគេ បានត្រូវគ្រោងទុកនៅខែកក្កដាខាងមុខ ដើម្បីឲ្យចំជាមួយនឹងអាយុ៣០ឆ្នាំ របស់បុរស​ជាស្វាមី។ តែហេតុការណ៍ ដែលនឹកស្មានមិនដល់មួយ បានកើតឡើង។

រូបថត អាពាហ៍ពិពាហ៍ នៅមន្ទីរពេទ្យ។ (រូបថតផ្ដិតពីវីដេអូ)

ជីវិត - នៅចុងខែនេះ រ៉ូវដេន (Rowden) អាយុ២៩ឆ្នាំ តម្រូវចូលព្យាបាលថ្លើម ដែលរងគ្រោះដោយជម្ងឺមហារីក ដ៏រ៉ាំរ៉ៃ និងឈានមកដល់ដំណាក់កាលចុងក្រោយ។ ជាមួយនឹងស្ថានភាសុខភាព របស់បុរសជាតិហ្វីលីពីនរូបនេះ ដែល​អាច​នឹងមានការប្រែប្រួលយ៉ាងឆាប់រហ័សនោះ ញាតិមិត្តនិងជាពិសេសគូរស្នេហ៍របស់ រ៉ូវដេន បានបំពេញនូវបំណង​ចុង​ក្រោយមួយ ឲ្យបុរសដ៏អភ័ព។

បំណងចុងក្រោយរបស់ រ៉ូវដេន គឺបានរៀបអាពាហ៍ពិពាហ៍ជាមួយនឹង ស្ត្រីប្រចាំជីវិតរបស់នាយ កញ្ញា ឡីសែល (Leizel) នៅចំពោះមុខកូនស្រីរបស់ពួកគេ។

ជាមួយនឹងការរៀបចំ ដែលប្រើរយៈពេលតែ១២ម៉ោងប៉ុណ្ណោះ គ្រួសាររបស់រ៉ូវដេន បានរៀបចំពិធីនេះ នៅក្នុង​មន្ទីរ​ពេទ្យតែម្ដង ដោយសារតែបុរសអ្នកជំងឺ មិនអាចងើបដើរទៅធ្វើនៅកន្លែងផ្សេង ឬនៅព្រះវិហារបាន។ វីដេអូដ៏កំសត់​ស្រក់ទឺកភ្នែកខាងក្រោមនេះ ត្រូវបានថតដោយ ហាសេត (Hasset) ប្អូនប្រុសរបស់ រ៉ូវដេន ហើយទើបនឹងយក​មក​ចុះផ្សាយ កាលពីសប្ដាហ៍មុន។

រ៉ូវដេន បានស្លាប់នៅថ្ងៃទី ១១ ខែមិថុនា ឆ្នាំ២០១៤ នៅអំឡុងជា១០ម៉ោងក្រោយប្រយោគ«មាស» ដែល​នាយ​បាន​ឆ្លើយទៅកាន់លោកអាចារ្យ នៅចំពោះភរិយាខ្លួនថា៖ «បាទ ខ្ញុំចង់បាននាងជាភរិយារបស់ខ្ញុំ»៕