ក្នុងពេលដែលអាជីពជាពិការនីកំពុងតែរីកចម្រើន និងទទួលបានប្រជាប្រិយភាពគាំទ្រខ្លាំង ពីទស្សនិកជន​តាមរយៈ​ធ្វើជាពិធីការនី នៅក្នុងកម្មវិធីរាត្រីកម្សាន្ត របស់ស្ថានីយទូរទស្សន៍ស៊ីធីអ៊ិននោះ កញ្ញា គង់ វង្សយ៉ាទី បាននឹង​ពង្រឹង​ខ្លួនបន្ថែមទៀត ដើម្បីក្លាយខ្លួន ជាពិធីការនីល្បីមួយរូប។

កញ្ញា គង់ វង្សយ៉ាទី។ (រូបថតហ្វេសប៊ុក)

តារា - ខណៈពេលដែលកំពុងតែទទួលបានប្រជាប្រិយភាពខ្លាំង ពីមហាជនក្នុងអាជីពជាពិការនី​តាមរយៈវាចារដ៏​ស្រទន់ រួមជាមួយរូបសម្រស់ដ៏ស្រស់ស្អាត ពិធីការិនីវ័យក្មេងក្នុងកម្មវិធីរាត្រីកម្សាន្ត របស់ស្ថានីយទូរទស្សន៍ស៊ីធីអ៊ិន កញ្ញា គង់វង្ស យ៉ាទី ពេលនេះនាងកំពុងតែពង្រឹងខ្លួន ក្នុងអាជីពជាពិធីការនីអោយល្បីល្បាញ និងមានភាពលេច​ធ្លោ​ដូចពិធីការនីល្បីៗមួយចំនួន ដូចជាអ្នកនាង គង់ សុជាតិ និងអ្នកនាង យុគ ចិន្តា ជាដើម ដោយមិនចង់វិលទៅរក​អាជីពចាស់ ជាតារាសម្តែងភាពយន្ត និងខារ៉ាអូខេដូចមុនឡើយ។

ថ្មីៗនេះ មានផលិតកម្មមួយចំនួន បានទាក់ទងនាងអោយសម្តែងខ្សែភាពយន្ត ប៉ុន្តែត្រូវបាននាងបដិសេធ។ ការដែល​នាងបដិសេធចោលមិនសម្តែងភាពយន្តនេះ ដោយនាងបានឲ្យដឹងថា អាជីពជាពិធីការិនីឈរជើងក្នុងវិស័យសិល្បៈ​បាន​យូរ ជាងតារាសម្តែង។ ហើយអាជីពជាពិធីការនី បើសិនជាសាងកេរ្តិ៍ល្បីល្បាញហើយនោះ គឺមិនងាយត្រូវបានគេ​បោះបង់ឡើយ រីឯតារាសម្តែងវិញ ថាបើកាលណាអស់សម្រស់ គេនឹងមិនត្រូវការសម្តែងទៀតឡើយ។

ជាមួយលោក សាយ រតនៈ ដែលជាពិធីករក្នុងកម្មវិធីរាត្រីកំសាន្តនោះ តារាស្រីសាច់សខ្ចីរបស់ស្ថាននីយទូរស្សន៍ ស៊ីធីអ៊ិន រូបនេះបាននឹងកំពុងខិតខំប្រឹងប្រែងហ្វឹកហាត់យ៉ាងខ្លាំង ដោយសារទេពកោសល្យនៃការអត្ថធិប្បាយ របស់​នាងនៅខ្សោយ។ ជាមួយនេះដែរ នាងកំពុងតែហ្វឹកហាត់ជាមួយ ពីធីការនី ដួង ហ្សូរីដា ដើម្បីបង្កើនជំនាញអោយ​កាន់តែខ្លាំងជាងនេះថែមទៀត។

គួរកត់សម្គាល់ថា មុនពេលដែល កញ្ញា គង់ វង្សយ៉ាទី ក្លាយពិធីការនីប្រចាំទូរទស្សន៍ស៊ីអ៊ិន គឺកញ្ញាគ្រាន់តែតារា​សម្តែង ខារ៉ាអូខេនៅតាមផលិតកម្មមួយចំនួនប៉ុណ្ណោះ មិនសូវមានឈ្មោះបោះសម្លេងប៉ុន្មានឡើយ។ ប៉ុន្តែក្រោយ​ពី​នាងចាប់ជាអាជីពជាពិធីការិនី តាមរយៈរូបសម្រស់វ័យក្មេង នាងហាក់បង្កើនចំណាប់អារម្មណ៍ខ្លាំងពីទស្សនិកជន បើទោះបីការប្រើប្រាស់ពាក្យពេជន៍មួយចំនួន នៅមានការឆ្គាំងឆ្គងក៏ដោយ។

យ៉ាងណាក៏ដោយ ទោះសំឡេងមិនសូវបាន បទពិសោធន៍ក៏មិនសូវមានច្រើន ប៉ុន្តែដោយសារនាងមាន​សម្រស់​ទាក់​ទាញ ពិធីការនីវ័យក្មេងរូបនេះ មានឱកាសទទួលបានការងារថ្មីៗជាច្រើន សូម្បីតែកម្មវិធីដែលនាងមិនធ្លាប់​កាន់​​ពី​មុន​មកក៏ កញ្ញាភ្នែកស្រទន់ អាចជំនួសអ្នកចាស់ៗបានដែរ ដែលនេះបញ្ជាក់ឱ្យឃើញថា ពិធីការនីវ័យក្មេងរូបនេះ​មាន​ការ​អភិវឌ្ឈន៍ និងការរីកចំរើនច្រើន ក្នុងអាជីពជាពិធីការនី៕