សម្រាប់លោក រ៉េ បាយហ្វ័រ (Ray Byford) ភាពផិតក្បត់ ត្រូវតែសងសឹកវិញ ឲ្យចាស់ដៃ។ ការជម្រះបញ្ជីគ្នានេះ បានកើតឡើងបន្ទាប់ពីលោក រ៉េ បានសងំស្ងៀម ក្នុងរយៈពេលមួយ បើទោះជាបានដឹងថា សង្សារួមរស់ជា​មួយ​គ្នា នាងបានលួចទៅផិត ជាមួយអ្នកថ្មី តាំងពីយូរមកហើយក្ដី។ លោក រ៉េ រង់ចាំដល់ថ្ងៃបុណ្យខួបកំណើត​មក​ដល់ ដើម្បីធ្វើការសងសឹកនេះ និងជាការបញ្ជាក់ទៅនាងថា អ្វីទៅជាការឈឺចាប់។

វីដេអូដែលថតពីការជម្រះបញ្ជីជាមួយសង្សានេះ ត្រូវបានបង្ហោះ​នៅលើគេហទំព័រយូធូប កាលពីពាក់​កណ្ដាល​ខែកក្កដា តែបានទាក់ទាញមនុស្សម្នា ទូទាំងពិភពលោកឲ្យបានដឹង និងបានចុចចូលទៅទស្សនា ប្រមាណជា​ជាង១១លានដង គ្រាន់តែក្នុងរយៈពេល ១សប្ដាហ៍ដំបូងប៉ុណ្ណោះ។ នៅក្នុងវីដេអូ ដែលមានរយៈពេល ១នាទី​និង៣៥វិនាទីនេះ គេបានស្ដាប់ឮលោក រ៉េ បាយហ្វ័រ និយាយពីសេចក្ដីស្នេហារបស់ខ្លួន ទៅកាន់សង្សារបស់​ខ្លួន មុននឹងសុំឲ្យនាងបិតភ្នែក ដើម្បីទទួលយកនូវ«អំណោយពិសេស» ដែលលោកបានរៀបចំឲ្យនាង សម្រាប់ថ្ងៃ​ខួបកំណើតនេះ។

ចម្រៀង«រីករាយថ្ងៃបុណ្យកំណើត»

ច្រើនវិនាទីកន្លងផុត គេឃើញនាងជាសង្សា ដែលមានភ្នែកបិតជិត បានដើរកាត់ខាងក្នុងផ្ទះ ក្នុងបំណង​ចង់​ឃើញអំណោយ ដែលលោក រ៉េ ប្រគល់ឲ្យខ្លួន។ តែទីបំផុត... ទើបគេបានឃើញអំណោយដ៏ពិសេស ដែល​នាង​ត្រូវទទួល៖ «គ្រប់ប្រដាប់ប្រដា សម្លៀកបំពាក់ គ្រឿងតុបតែងខ្លួន។ល។ មួយចំនួនត្រូវបានខ្ចប់យ៉ាងស្អាត នៅ​ក្នុងហិប​ក្រដាស និងមួយចំនួនទៀត ដាក់រាយប៉ាយ នៅលើសាឡុង»។ គេថែមទាំងបានស្ដាប់ឮ លោក រ៉េ ច្រៀង​បទ​«រីករាយថ្ងៃបុណ្យកំណើត» នោះ​ទៀត។

ជាមួយនឹងភាពស្រឡាំងកាំង ព្រោះ«អំណោយពិសេស»ទាំងនេះ នាងជាសង្សា បានសួរថា ហេតុអ្វី? ចម្លើយ​យ៉ាងសមញ្ញ និងមានន័យវែង របស់លោក រ៉េ បានបន្លឺឡើង នៅមុនចុងបញ្ចប់នៃវីដេអូ យ៉ាងដូច្នេះថា៖ «ព្រោះ​បងបានដឹងថា អូនឯងក្បត់ចិត្តបង!»៕