បើលោកអ្នកភ័យបារម្ភ នឹងរលក ឬខ្លាចកូនភ្នំទឹកកកក នោះប្រាកដហើយថា វីដេអូនេះមិនល្អមើល សម្រាប់​លោកអ្នកទេ។ វីដេអូនេះ ត្រូវបានយកមកបង្ហោះ នៅថ្ងៃទី៥ ខែសីហា បង្ហាញពីកូនភ្នំទឹកកកក បានមក​បំបែក​ខ្លួន នៅក្បែរឆ្នេរ ហើយបានបង្ក ឲ្យមានរលកធំៗជាច្រើន។ ហេតុការណ៍បានកើតឡើង នៅភាគឦសាន នៃ​ប្រទេសកាណាដា ក្នុងខេត្ត«Terre-Neuve-et-Labrador»។

ហេតុការណ៍នេះ មិនមែនចម្លែកខុសពីធម្មតានោះទេ តែគេអាចពន្យល់បានថា កូនភ្នំទឹកកកនេះ បាន​អណ្ដែត​មកជិតឆ្នេរ ហើយចាប់ផ្ដើមរលាយ និងបន្ទាប់មកបានក្រឡាប់ បង្កឲ្យកូនភ្នំនេះ បានបែកខ្លួនជាបំណែកៗ ហើយ​បានធ្លាក់ទៅក្នុងទឹក។ ដោយសារតែបំណែកធំៗ នៃដុំទឹកកកទាំងនេះ ធ្លាក់ចុះទៅលើទឹក ដូច្នេះហើយ​ទើប​បង្ក ឲ្យមានរង្វង់រលកធំៗ បានប្រដេញគ្នាចេញពីកន្លែង ដែលផ្ទាំងទឹកកកស្ថិតនៅ។ រលកទាំងនោះ បានរត់​សំដៅ​មកឆ្នេរ តែមិនបានបង្ក ឲ្យមានការខូចខាតអ្វីទេ។

វិទ្យសម្លេងកាណាដា បានផ្សាយឲ្យដឹងថា កូនភ្នំទឹកកកនេះ បានរំកិលខ្លួនចេញពីទីតាំងដើមរបស់វា ដែលស្ថិត​នៅផ្នែកខាងលិច នៃ«Groenland» ហើយបានអណ្ដែតមកដល់ ខេត្ត«» ដែលមានចំងាយសរុបប្រមាណជា ១៨០០ ម៉ៃយ៍ និងបានប្រើពេលពី២ទៅ៣ឆ្នាំ។ កូនភ្នំទឹកកកនេះ បានរលាយអស់ភាគច្រើនហើយ ពោលវា​បាន​រលាយខ្លួន ប្រមាណជា៨៥% ពីទំហំដើមរបស់វា៕