ជនសង្ស័យមួយរូប ត្រូវបានឃាត់ខ្លួន ដោយក្រុមនគរបាល់ទីក្រុង ដេនវ័រ (Denver) សហរដ្ឋអាមេរិក ទាក់ទងនឹង​សំនុំ​រឿងមួយ នៃការរំលោភលើច្បាប់ប្រើប្រាស់អាវុធ។ ប៉ុន្តែ នៅពេលមកដល់ស្នងការនគរបាល បើទោះជាបុរសនេះ ត្រូវ​បានឆែកឆេរយ៉ាងម៉ត់ចត់ មុននឹងឲ្យចូលទៅក្នុងការិយាល័យនគរបាលក៏ដោយ តែបុរសនេះ បានធ្វើឲ្យកង​កម្លាំង​នគរបាលជាច្រើន ភ្ញាក់ផ្អើលយ៉ាងខ្លាំងម្ដងទៀត ដោយបានដកយកកាំភ្លើងខ្លី ដ៏តូចមួយដើម ដែលគាត់បាន​លាក់​ទុក​នៅក្នុងកំប៉េះគូថ ចេញមក។

ប្រភេទអាវុធ រវ៉ុលវ៉ែ កាលីព ២៥ ដែលជនសង្ស័យលាក់ក្នុងចន្លោះកំប៉េះគូថ។ (រូបថតនគរបាល)

ពីនេះពីនោះ - កងកម្លាំងនគរបាល របស់ប្រទេសមហាអំណាចខ្លាំងជាងគេនៅលើពិភពលោក តែងបានជួបជា​ញឹក​ញាប់ នូវរឿងមិននឹកស្មានដល់ និងគួរឲ្យភ្ញាក់ផ្អើល។ ហេតុការណ៍នេះកើតឡើងតាំងពីថ្ងៃទី១៤ ខែឧសភា​កន្លងទៅ នៅទីក្រុង ដេនវ័រ ក្នុងរដ្ឋកូឡូរ៉ាដូ (Colorado) ផ្នែកកណ្ដាលភាគ ខាងលិចនៃសហរដ្ឋអាមេរិក តែទើបនឹង​ត្រូវ​បាន​ទម្លាយឲ្យដឹង នៅក្នុងប៉ុន្មានថ្ងៃកន្លងមកនេះ។

នៅថ្ងៃនោះ ភ្នាក់ងារនគរបាល បានធ្វើការឃាត់ខ្លួនជនសង្ស័យមួយរូប ទាក់ទងនឹងសំនុំរឿងការប្រើប្រាស់​អាវុធ​ខុស​ច្បាប់ ប៉ុន្តែជននោះទំនងជាកំពុងញៀនថ្នាំ។

ដោយសារតែជនសង្ស័យរូបនេះ ត្រូវបានស្គាល់ដោយនគរបាលរួចហើយ នៅក្នុងដីការឃាត់ខ្លួនមួយ ទាក់ទងនឹង​សំនុំរឿងដូចគ្នានេះ ទើបកងកម្លាំងនគរបាលទាំងអស់ មានការប្រុងប្រយ័ត្នយ៉ាងខ្លាំងទៅលើជននេះ ហើយបាន​ធ្វើ​ការឆែកឆេរលើខ្លួនយ៉ាងម៉ត់ចត់។ បន្ទាប់ពីបានឆែកឆេររួច នគរបាលបានរកឃើញ នៅក្នុងខ្លួនបុរសនេះ នូវកាំបិត​មួយ នឹងខ្សៀសម្រាប់ជក់ថ្នាំមួយទៀត។

ប៉ុន្តែក្រុមនគរបាលទាំងនោះ ទំនងជាមិនសូវស្គាល់ជំនាញខាងលាក់អាវុធ របស់ជនសង្ស័យនេះ ឲ្យបានច្រើន​នោះ​ទេ។ មិនត្រឹមតែប៉ុណ្ណោះ ជនស្រវឹងគ្រឿងញៀននេះ បានស្រែកព្រមាននៅក្នុងរថយន្ដនគរបាល ពេលនាំខ្លួន​ទៅ​កាន់ស្នងការ នូវប្រយោគជាច្រើន ដូចយ៉ាង៖ «អញមានរបស់ផ្សេងទៀត ឲ្យហ្អែង» «ហ្អែងគួតែពាក់អាវការពារទៅ» ឬ«អញនឹងបង្ក្រាបពួកហ្អែង»ជាដើម។ តែដឹងអី ...ការព្រមានទាំងនេះ បានកើតមានឡើង«មែន» នៅពេល​បន្ដិច​ក្រោយ​មក។

មកដល់ស្នងការនគរបាល បុរសល្មើស បានដកកាំភ្លើងរវ៉ុលវ៉ែ ធុនកាលីព២៥ ពីចន្លោះកំប៉េះគូថរបស់ខ្លួន ហើយ​បាន​បាញ់ចេញពីរគ្រាប់ សំដៅក្រុមនគរបាល បណ្ដាលឲ្យរបួសត្រង់ពោះម្នាក់។ ជាសំណាងល្អ កាំភ្លើងនោះ បាញ់មិន​ចេញគ្រាប់បន្តទៅទៀត បង្កឱកាសឲ្យនគរបាលធ្វើការបង្ក្រាបបានជាថ្មី។ ហួសចិត្តដោយសារក្រុមខ្លួនឆែកអាវុធ ពី​បុរសនេះមិនអស់ ទើបធ្វើការរាវលើខ្លួនប្រាណបុរសនេះជាលើកទីពីរ ក៏ស្រាប់តែបានរកឃើញប​ន្ថែម នូវគ្រឿងញៀន​ចំនួន​បីកញ្ចប់ទៀត លាក់ទុកក្នុង«ប្រហោងគូថ»។

ជនសង្ស័យដ៏អស្ចារ្យមកដល់ថ្ងៃនេះ ត្រូវបានជាប់ចោទ ក្នុងបទល្មើសថ្មីមួយទៀត នោះគឺ«ប៉ងធ្វើឃាតកម្ម ដោយ​មានការគ្រោងទុកមុន» ហើយនឹងត្រូវប្រឈមនឹងសវនាការកាត់ក្ដី ក្នុងពេលខាងមុខ៕