ពលរដ្ឋបួនគ្រួសារ ចោទប្រកាន់តុលាការប៉ៃលិនថា មិនគោរពច្បាប់ ស្តាប់តាមបញ្ជាអ្នកមានលុយ មានអំណាច ចាប់​ពលរដ្ឋ​ក្រីក្រ​ស្លូតត្រង់ដាក់ពន្ធនាគារ។ ពលរដ្ឋទាំងនោះ បានចង្អុលដាក់លោកស្រី បាន ស្រីមុំ តំណាងរាស្ត្រមកពី​គណបក្សប្រជាជនកម្ពុជា និងជាភរិយារបស់អតីតអភិបាលខេត្ត អ៊ី ឈាន ថាជាអ្នកនៅពីក្រោយការចាប់ចងទាំងនេះ ដោយសារតែចង់បានដីលំនៅដ្ឋានរបស់ខ្លួន។ ការ​បញ្ជូនខ្លួនចូលពន្ធនាគារ ត្រូវបានធ្វើឡើងដោយគ្មានការស្រាវជ្រាវ និងដំណោះស្រាយអ្វីឡើយ មកទល់ពេលនេះ ក្រោមបទចោទប្រកាន់​រុក​រានដីរដ្ឋ។

ក្រុមគ្រួសារពលរដ្ឋ ដែលត្រូវបានអាជ្ញាធរខេត្តប៉ៃលិន ចាប់ឃុំ។ (រូបថត បណ្ដាញដីធ្លី)

សិទ្ធិដីធ្លី - ប្រជាពលរដ្ឋដែលមានឈ្មោះលោក ពេជ្រ សុធា, អ្នកស្រី ឱម សំអូន, អ្នកស្រី ឆាយ ឆាត និងអ្នកស្រី ឱម សំអាត ត្រូវបានចាប់ខ្លួន ដោយអាជ្ញាធរខេត្តប៉ៃលិន សហការជាមួយអាជ្ញាធរមូលដ្ឋាន ក្រោមបញ្ជាផ្ទាល់ពីអតីត​អភិបាលខេត្ត លោក អ៊ី ឈាន ដែលត្រូវជាស្វាមីរបស់លោកស្រី បាន ស្រីមុំ តំណាងរាស្ត្រមកពីគណបក្ស​ប្រជាជន​កម្ពុជា និងជាភាគីទំនាស់ជាមួយប្រជា​ពលរដ្ឋ ក្នុងរឿង​ដីធ្លី កាលពីថ្ងៃទី៣១ ខែមីនា ឆ្នាំ២០១៤ ដាក់ពន្ធនាគាររហូត​មកទល់ពេលនេះ។

ប្រជាពលរដ្ឋដែលត្រូវបានឃុំខ្លួននោះ បានចោទប្រកាន់លោកស្រី បាន ស្រីមុំ ថាបានយកដីពួកគាត់លក់ឲ្យក្រុមហ៊ុន តែបែរជាចោទប្រកាន់មកលើពលរដ្ឋថា ជាអ្នករុករានយកដីរដ្ឋទៅវិញ។ ក្នុងកិច្ចសម្ភាសជាមួយទស្សនាវដ្តី មនោរម្យ.អាំងហ្វូ លោក ញឹក ញ៉ាន ត្រូវជាស្វាម៉ីអ្នកស្រី ឱម សំអាត បានបញ្ជាក់ប្រាប់ថា ក្រោយការចាប់ខ្លួនមក​ទល់​ពេលនេះ មានរយៈពេលជិតបីខែហើយ មិនមានការដោះស្រាយអ្វីទាំងអស់ពីអាជ្ញាធរភូមិឃុំ ក៏ដូចជាស្រុក និងខេត្ត ពិសេសតុលាការ។ «ខ្ញុំចាំមើលផ្លូវរាល់តែថ្ងៃ មិនឃើញមានការដោះស្រាយសោះ។ (...) រឿងដីធ្លីតិចតួចសោះ ចាប់គ្នា​ដាក់គុក។»

យ៉ាងនេះក៏ដោយ លោកបានហៅការចាប់ខ្លួនប្រពន្ធរបស់លោក ក៏ដូចជាពលរដ្ឋបីនាក់ផ្សេង​ទៀត​នោះថា ជាការធ្វើ​ឡើងទាំងមិនដឹងអ្វីទាំងអស់ របស់តុលាការ ដែលចាំតែធ្វើតាមការបញ្ជារបស់លោកស្រី បាន ស្រីមុំ តែ​ប៉ុណ្ណោះ។

លោក ឱម សុភាព ត្រូវជាប្អូនលោក ឱម សំអុល ក៏បានលើកឡើងប្រហែលគ្នានេះដែរ គឺគ្មានអាជ្ញាធរណាម្នាក់​មក​ឈឺឆ្អាលពីសុខទុក្ខប្រជាពលរដ្ឋនោះទេ ក្រៅពីចង់បានដីប្រជាពលរដ្ឋនោះ។ លោកបន្តថា ក្រោយពីគ្មានដំណោះ​ស្រាយពីអាជ្ញាធរ លោកក៏ដូចជាពលរដ្ឋផ្សេងទៀត ក៏បានស្វែងរកអង្គការសិទ្ធិមនុស្សឲ្យជួយអន្តរាគមន៍ និងបាន​ប្តឹង​ឧទ្ធរណ៍ចំពោះករណីចាប់ខ្លួន និងឃុំខ្លួននេះ។ «ដីទាំងនេះត្រូវបានចែកដោយលោកមេភូមិ ហេង សារ៉ន និងអនុភូមិ សឿន សុឃឿន មិនមែនពលរដ្ឋទៅចាប់យកនោះទេ។»

ទស្សនាវដ្តីមនោរម្យ.អាំងហ្វូ មិនអាចសុំការសហការពីលោកស្រី បាន ស្រីមុំ តំណាងរាស្ត្រមណ្ឌលខេត្តប៉ៃលិន មកពី​គណបក្សកាន់អំណាច ដើម្បីបំភ្លឺលើការចោទប្រកាន់ខាង​លើ​បានទេ។ តែតាមការបញ្ចាក់របស់លោក ញឹក ញ៉ាន បាន​លើកឡើងថាថ្មីៗនេះ លោកបានទៅជួបជាមួយលោកស្រី បាន ស្រីមុំ ដើម្បីស្វែងរកដំណោះស្រាយ និងបញ្ចប់​រឿង​នេះ។ លោកបានបន្តថា ពេលនោះស្ត្រីតំណាងរាស្ត្ររូបនេះ បានបង្ខំឲ្យពួកគាត់ផ្តិតមេដៃឈប់ទាមទារ និងយក​ដីនោះ ទើបឲ្យតុលាការសម្រេចលើកលែងទោសឲ្យ តែមិនមែនទាំងស្រុងទេ គឺភាគច្រើន និងសម្រេចព្យួទោស​ឲ្យនៅ​ក្រៅឃុំ​តែប៉ុណ្ណោះ។ «តុលាការ បើលោកស្រី បាន ស្រីមុំ ឲ្យលែងទើបបានហ៊ានលែន បើមិនឲ្យលែងទេ​មិនហ៊ាន​លែង​ទេ។ (...) មានកិច្ចសន្យាម្នាក់មួយៗមក សរសេរថាប្រគល់ដីធ្លីនេះឲ្យទៅគេ(លោកស្រី បាន ស្រីមុំ) គេនឹងឲ្យ​រួចខ្លួន។»

ដោយឡែកអ្នកស្រី សុឃឿន ដែលជាភរិយារបស់លោក ពេជ្រ សុធា បានលើកឡើងថា ប្តីអ្នកស្រីត្រូវបាន​ចាប់​ខ្លួន​ទាំងអយុត្តិធម៌។ អ្នកស្រីបញ្ជាក់ថា៖ «ដីធ្លីជារបស់យើង ដែលបានកាន់កាប់តាំងពីឆ្នាំ២០០០មក។ ទើបឆ្នាំ​២០១៤ គេ (អាជ្ញាធរ) មកចាប់ខ្លួនដោយគ្មានបង្ហាញដីកាអ្វីទាំងអស់ ព្រមទាំងរុញបញ្ចូលឡានតែម្តង ជាមួយនឹងការចោទប្រកាន់​ថាមករស់នៅខុសច្បាប់ លើដីបម្រុងទុករបស់រដ្ឋ និងជាដីព្រលានយន្តហោះ។»

មេធាវីអង្គការអាដហុក ដែលកាន់រឿងក្តីនេះលោកស្រី គា សុផល បានធ្វើការពន្យល់ទៅនឹងការចាប់ខ្លួននេះថា ថ្វីបើ​រឿងដីធ្លី តែដើមបណ្តឹងបានប្តឹងក្នុងរឿងព្រហ្មទណ្ឌ មិនមែនប្តឹងក្នុងរឿងស៊ីវិលទេ។ អ្នកស្រីបន្តថា ដើមបណ្តឹង​នោះ​មានតួនាទីជាអភិបាលរងស្រុកសាលាក្រៅ បានចោទប្រកាន់ប្រជាពលរដ្ឋទាំងនោះថា បានកាន់កាប់ដី​សាធារណៈ​របស់រដ្ឋ ទើបចេញដីការនាំខ្លួនតែម្តង ដោយគ្មានបានកោះហៅមកសាកសួរ ឬណែនាំអ្វីទេ។

លោកស្រីមេធាវីបញ្ជាក់ថា ពេលនេះកូនក្តីលោកស្រី បានដាក់ពាក្យបណ្តឹងនេះ មកកាន់សាលាឧទ្ធរណ៍ហើយ តែ​សំណុំរឿងទាំងនោះ នៅមិនទាន់មកដល់សាលាឧទ្ធរណ៍នៅឡើយទេ បើគិតមកដល់ថ្ងៃទី១៨ ខែមិថុនា ឆ្នាំ២០១៤​នេះ។ «ពួកគាត់កំពុងនៅក្នុងឃុំ។ យើងបានសុំឲ្យនៅក្រៅឃុំបណ្តោះអាសន្ន តែចៅក្រមស៊ើបសួរមិនអនុញ្ញាតិ។ ពួក​គាត់បានប្តឹងឧទ្ធរណ៍ លើដីការសម្រេចមិនឲ្យនៅក្រៅឃុំបណ្តោះអាសន្ននេះ។»

ក្រុមគ្រួសារពលរដ្ឋ ដែលត្រូវបានអាជ្ញាធរខេត្តប៉ៃលិន ចាប់ឃុំ។ (រូបថត បណ្ដាញដីធ្លី)

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ពីលោក សំ សារ៉េត អភិបាលរងស្រុកសាលាក្រៅ លោក ខ្លូត ភាព មេភូមិ និងលោក សឿន សុឃឿន អនុភូមិ បានទេក្នុងល្ងាចនេះ។ តែតាមការបញ្ជាក់របស់លោក ញឹម ញ៉ាន បាន​ប្រាប់​ថា អ្នកទាំងបីនាក់នេះជាអ្នកចេញមុខប្តឹង ជាអ្នកមកសម្របសម្រួលជាមួយប្រជាពលរដ្ឋដើម្បីបានដីនេះ និង​ក៏ជា​អ្នក​ទទួលស្គាល់ក្នុងការប្រគល់ដីនេះ មកឲ្យប្រជាពលរដ្ឋ ក្នុងឆ្នាំ២០០០ដែរ។

ពលរដ្ឋទាំងបួននាក់ខាងលើ តំណាងឲ្យពលរដ្ឋ១៩គ្រួសារ ហើយជាអ្នកចេញមុខក្នុងការប្តឹងផ្តល់ តវ៉ា​រឿងដីធ្លីនេះ។ លោក ញឹក ញ៉ាន ស្វាម៉ីអ្នកស្រី ឱម សំអាត បានពន្យល់រំលឹកឡើងវិញថា ដីទំនាស់នេះ ត្រូវបានអាជ្ញាធរដកហូត​កាលឆ្នាំ២០១២កន្លងមក ថាធ្វើជាព្រលានយន្តហោះ ដោយ​ជំនួសមកវិញនូវទីតាំងថ្មី។ ប្រជាពលរដ្ឋទាំង១៩គ្រួសារ សម្រេចប្រគល់ដីនោះតាមការស្នើសុំ។ ក្រោយពីថ្ងៃ​ប្រគល់​ដីនោះ អាជ្ញាធរខេត្តមិនបានដោះស្រាយដីថ្មីឲ្យទេ។ នៅ​ពេលដែលប្រជាពលរដ្ឋសួរ ឬហៅតាមទូរស័ព្ទតែងតែគេច បិទ ឬមិនទទួលជាដើម។ ផ្ទុយទៅវិញ ដីទាំងនោះ បែរ​ជា​ត្រូវបានតំណាងរាស្ត្រសព្វថ្ងៃ របស់គណបក្សប្រជាជានកម្ពុជា លោកស្រី បាន ស្រីមុំ ដែលត្រូវជាភរិយាលោក អ៊ី ឈាន អតីតអភិបាលខេត្តប៉ៃលិន ជាអ្នកចូលទៅកាន់កាប់ និងបញ្ជាឲ្យរុករាន និងដាំដំឡូង និងមិនមែនយកទៅធ្វើ​ជា ព្រលានយន្ដហោះអ្វីឡើយ៕